Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

1 Juan 4:1-21

4  Che ermanokuéra pohayhuetéva, ani peguerovia entéro profesía*, síno pehecha raẽ añetehápepa umíva ou Ñandejáragui. Cháke heta proféta japu osẽ ko múndope*.  Péicha peikuaáta pe profesía ouha Ñandejáragui: Entéro profesía heʼíva Jesucristo ou hague yvypóraicha, ou hína Ñandejáragui.  Péro entéro profesía heʼíva Jesús ndoúi hague yvypóraicha, ndoúi Ñandejáragui. Avei kóva hína pe profesía omombeʼúva pe oñemoĩva* Crístore, peẽ pehendu kuri haʼe omombeʼúta hague umi mbaʼe, ha koʼág̃a oñeñeʼẽma upévare ko múndope.  Che raʼykuéra pohayhuetéva, peẽ peju Ñandejáragui ha pendepuʼaka umi proféta japúre, pe oĩva penendive tuichave rupi pe oĩvagui ko múndondi.  Haʼekuéra ou ko múndogui, upévare umi mbaʼe heʼíva hikuái ou ko múndogui, ha ko múndo ohendu chupekuéra.  Ñande katu jaju Ñandejáragui. Pe oikuaáva Ñandejárape ñanerendu ñandéve; pe ndoúiva Ñandejáragui nañanerendúi. Péicha japilla mávapa pe profesía añeteguáva ha mávapa pe profesía japu.  Che ermanokuéra pohayhuetéva, jasegíkena jajoayhu pe mborayhu ou rupi Ñandejáragui, ha entéro oporohayhúva haʼe hína Ñandejára raʼy ha oikuaa Ñandejárape.  Pe ndoporohayhúiva ndoikuaái Ñandejárape, Ñandejára haʼe rupi mborayhu.  Péicha ojehechauka Ñandejára mborayhu ñande kásope: Ñandejára ombou Itaʼýra peteĩete ko múndope, ikatu hag̃uáicha haʼe rupive jahupyty pe jeikove. 10  Pe mborayhu ndeʼiséi ñande jahayhu hague Ñandejárape, síno haʼe la ñanderayhu vaʼekue ha ombou Itaʼýrape oñemeʼẽ hag̃ua sakrifísioramo, ikatu hag̃uáicha ojeheja rei ñande pekádo ha jaiko porã jey hendive. 11  Che ermanokuéra pohayhuetéva, Ñandejára ñanderayhúramo péicha, ñande jareko avei ovligasión jajoayhúvo. 12  Avave ndohechái arakaʼeve Ñandejárape. Jasegíramo jajoayhu, Ñandejára akóinte opytáta ñanendive ha imborayhu imbaretevéta ñande apytépe. 13  Haʼe omeʼẽ rupi ñandéve ijespíritu, ñande jaikuaa japytaha hendive ha haʼe opytaha ñanendive. 14  Avei ñande voi jahecha ha jaikuaauka pe Túva ombou hague Itaʼýrape osalva hag̃ua ko múndope. 15  Oĩramo ogueroviáva Jesucristo haʼeha Ñandejára Raʼy, upéicharõ Ñandejára opyta hendive ha haʼe opyta Ñandejárandi. 16  Ñande jaikuaa ha jaguerovia Ñandejára ñanderayhuha. Ñandejára ningo mborayhu, ha pe akóinte oporohayhúva opyta Ñandejárandi ha Ñandejára opyta hendive. 17  Upévare pe mborayhu imbareteve ñande apytépe, ikatu hag̃uáicha ñañeʼẽ kyhyjeʼỹre pe Huísio Árape*, ñande jajogua rupi Crístope* ko múndope. 18  Pe ohayhúva Ñandejárape ndokyhyjéi, pe mborayhu hekopeguáva ñanepytyvõ ani hag̃ua jakyhyje. Añetehápe, oĩramo okyhyjéva, upéva ojoko chupe. Pe okyhyjéva ndoporohayhúi hekoitépe. 19  Ñande katu japorohayhu, haʼe raẽve ñanderayhu rupi. 20  Oĩramo heʼíva: “Che ahayhu Ñandejárape”, péro ndohayhúi iñermánope, ijapu. Ndaikatúi ohayhu Ñandejárape arakaʼeve ndohecháivape, ndohayhúiramo iñermáno ohechávape. 21  Ko mandamiénto haʼe omeʼẽ ñandéve: pe ohayhúva Ñandejárape ohayhu vaʼerã avei iñermánope.

Nóta

Ehecha “Profesía”, diksionário oĩva ko Bíbliape.
Ehecha “Múndo”, diksionário oĩva ko Bíbliape.
Griégope heʼi: “anticristo”, ehecha diksionário oĩva ko Bíbliape.
Ehecha “Huísio Ára”, diksionário oĩva ko Bíbliape.
Ehecha “Cristo”, diksionário oĩva ko Bíbliape.