Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

1 Juan 3:1-24

3  ¡Pepensamína mbaʼeichaitépa pe Túva ñanderayhu! Haʼe heʼi ñande haʼeha itaʼýra ha añetehápe ñande itaʼýra* hína. Upévare pe múndo* nañandekuaái, haʼekuéra ndoikuaái rupi chupe.  Che ermanokuéra pohayhuetéva, koʼág̃a ñande Ñandejára raʼy hína, péro ndojekuaaukái gueteri ñandéve mbaʼéichatapa ñande rekove amo gotyove. Jaikuaa ningo haʼe ojehechauka vove jajoguataha chupe, añetehápe jahecháta rupi chupe.  Opavave orekóva esperánsa hese oñemopotĩ ijupe voi, haʼe ipotĩháicha.  Enterove opeka meméva oñemoĩ umi léi rehe, upéicharõ pe pekádo heʼise ñañemoĩha umi léi rehe.  Peẽ peikuaa avei Jesús ojehechauka hague oipeʼa hag̃ua ñande pekadokuéra, péro haʼe ndorekói ni peteĩ pekádo.  Opavave akóinte opytáva hendive, ndoikói opeka meme; ni peteĩ opeka meméva ndohechái ni ndoikuaái chupe.  Che raʼykuéra pohayhuetéva, aníke avave penembotavy, pe ojapo meméva iporãva hekojoja hína Jesús hekojojaháicha.  Pe opeka meméva ou pe Añágui*, pe Aña opekágui iñepyrũ guive. Upearã Ñandejára Raʼy ojehechauka vaʼekue: ohundi hag̃ua pe Aña rembiapokue.  Entéro haʼéva Ñandejára raʼy ndoikói opeka meme, orekógui pe espíritu sánto* Haʼe omeʼẽva, ha haʼe ndaikatúi opeka meme haʼégui Ñandejára raʼy. 10  Japilla hag̃ua mávapa Ñandejára raʼy ha mávapa Satanás* raʼy jahecha vaʼerã ko mbaʼe: entéro ndojapomeméiva iporãva ha pe ndohayhúiva iñermánope, ndahaʼéi Ñandejára raʼy. 11  Kóva hína pe marandu peẽ pehendu vaʼekue iñepyrũ guive, jajoayhu vaʼerãha. 12  Ani jajogua Caínpe, haʼe ningo haʼe vaʼekue Satanás raʼy ha ojuka iñermánope. Ha, ¿mbaʼérepa ojuka raʼe chupe? Caín hembiapo vai rupi, péro iñermáno ojapo iporãva. 13  Che ermanokuéra, ani pehecharamo ko múndo ndaijaʼéiramo penderehe. 14  Ñande jaikuaa ñamanóma hague, péro koʼág̃a jaikove jahayhu rupi ñane ermanokuérape. Pe ndohayhúiva iñermánope omano hína. 15  Enterove ndochaʼéiva iñermánore oporojuka hína, ha peẽ peikuaa ni peteĩ oporojukáva ndohupytymoʼãiha jeikove opaveʼỹva. 16  Ñande jaikuaa mbaʼépa heʼise pe mborayhu, Jesucristo omano* rupi ñanderehehápe. Ha ñande jareko avei pe ovligasión ñameʼẽvo ñande rekove* ñane ermanokuéra rehehápe. 17  Péro oimeraẽ orekóva umi mbaʼe oikotevẽva oikove hag̃ua ha ohecha iñermáno oikotevẽha, péro ndoiporiahuverekoséi chupe, ¿mbaʼéicha piko jaʼéta hese ohayhuha Ñandejárape? 18  Che raʼykuéra pohayhuetéva, aníke ñande jurúpente japorohayhuete guaʼu, síno jahechauka vaʼerã japorohayhu añeteha umi mbaʼe jajapóva rupive. 19  Péicha jaikuaáta ñaimeha pe añetegua ykére, ha jagueroviáta ñande pyʼaite guive Ñandejára ñanderayhuha: 20  ñane korasõ ñanekondenáramo jepe, umi mbaʼe jajapo vaʼekuére, ñanemanduʼáke Ñandejára tuichaveha ñane korasõgui ha oikuaaha opa mbaʼe. 21  Che ermanokuéra pohayhuetéva, ñane korasõ nañanekondenáiramo, ikatu ñañeʼẽ Ñandejárape kyhyjeʼỹre. 22  Oimeraẽ mbaʼe jajeruréva chupe omeʼẽ ñandéve, ñakumpli rupi imandamiénto ha jajapógui umi mbaʼe haʼe oguerohorýva. 23  Añetehápe kóva hína imandamiénto: jajerovia vaʼerã Itaʼýra Jesucristo rérare, ha jajoayhu vaʼerã haʼe omanda haguéicha ñandéve. 24  Avei pe okumplíva imandamientokuéra osegi oiko Ñandejárandi, ha Ñandejára oĩ hendive. Haʼe omeʼẽ rupi ñandéve ijespíritu jaikuaa opytaha ñanendive.

Nóta

Griégope heʼi: “Ñandejára raʼykuéra”.
Ehecha “Múndo”, diksionário oĩva ko Bíbliape.
Térã: “Diablo”, ehecha diksionário oĩva ko Bíbliape.
Griégope heʼi: “semílla”.
Ehecha “Satanás”, diksionário oĩva ko Bíbliape.
Griégope heʼi: “omeʼẽ hiʼálma”. Ehecha “Álma”, Informasión Oĩvéva 7A-pe.
Griégope heʼi: “ñane álma”.