Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

1 Corintios 9:1-27

9  ¿Ndarekói piko liverta ajapo hag̃ua ajaposéva? ¿Che piko ndahaʼéi apóstol*? ¿Ndahechái piko raʼe ñande Ruvicha Jesúspe? ¿Peẽ piko ndahaʼéi che rembiapokue aservívo ñande Ruvichápe?  Jepe che ndahaʼéi apóstol umi ótrope g̃uarã, peẽme g̃uarã katuete haʼe; peẽ haʼégui pe séllo ohechauka porãva che haʼeha apóstol aservíva ñande Ruvichápe.  Kóva haʼéta añedefende hag̃ua umi chehusgávagui:  Ore roguereko derécho rokaru ha romboyʼu hag̃ua, ¿ajépa?  Roguereko derécho romenda hag̃ua peteĩ ermánare ha rogueraha hag̃ua orendive roviaha jave, ojapoháicha umi ótro apóstol, ñande Ruvicha ermanokuéra ha Cefas, ¿ajépa?  ¿Térã piko Bernabé ha chénte la rombaʼapo vaʼerã roñemantene hag̃ua?  ¿Oĩ piko soldádo opagapáva igástore oservi aja ehérsitope? ¿Oĩ piko oñotỹva parrál ha ndoʼúi hiʼa? ¿Oĩ piko oñangarekóva hymbakuérare ha ndotokái chupe michĩmi jepe pe hymba kambykue?  Koʼã mbaʼe ndaʼéi chejehegui reínte. Pe Léipe* ningo heʼi avei koʼã mbaʼe.  Moisés Léipe ojehai voi: “Ani remoĩ vosál ne rymba guéire* ojykýi jave trígo”. ¿Heʼise piko upéva Ñandejára ojepyʼapyha umi guéire? 10  ¿Térã piko ñanderehehápe heʼi hína ko mbaʼe? Añetehápe, ko mbaʼe ojehai ñanderehehápe, pe kuimbaʼe oaráva ha pe ojykýiva oreko vaʼerã esperánsa hoʼutaha michĩmi jepe pe kógagui. 11  Ore roñotỹramo pende apytépe umi mbaʼe oúva Ñandejáragui, ¿oĩ vaíta piko koʼág̃a rojeruréramo peẽme ore remikotevẽ? 12  Ha ótro kuimbaʼekuéra oguerekóramo derécho ojerurévo peẽme upéva, koʼýte ore upéicharõ roguereko derécho. Upéicharamo jepe, ndorojevaléi upévare, roaguanta guei opa mbaʼe ani hag̃ua ni mbaʼevéicharõ romoĩ estórvo umi marandu porãme* oñeʼẽva Crístore. 13  ¿Ndapeikuaái piko umi kuimbaʼe ombaʼapóva témplope, orresiviha hembiʼurã pe témplope, ha umi akóinte ombaʼapóva pe altárpe* orresiviha peteĩ párte umi mbaʼe oñekuaveʼẽvagui pe altár ári? 14  Upéicha avei ñande Ruvicha heʼi umi oikuaaukáva marandu porã, okaru vaʼerãha marandu porã rupive. 15  Péro che ndaiporúi ni peteĩ koʼã mbaʼe. Añetehápe ndahaíri peẽme koʼã mbaʼe ojejapo hag̃ua péicha che kásope. Iporãvéta amano aheja rangue ojepeʼa chehegui pe derécho arekóva añembotuichávo. 16  Péro aikuaaukáramo umi marandu porã, ndahaʼéi upe haguére aikótava añembotuicha; upéva ningo che ajapónte vaʼerã voi. ¡Añetehápe ivaíta chendive ndapredikáiramo umi marandu porã! 17  Ajapóramo upéva vyʼápe, oñemeʼẽta chéve peteĩ rregálo; opáichavo ajapóramo ndajaposéirõ jepe, upéva hína pe tembiapo Ñandejára omeʼẽ vaʼekue voínte chéve. 18  ¿Mbaʼépa upéicharõ la che rregálo? Che ndakovrái apredika haguére umi marandu porã ha upéicha ndaiporúi pe derécho aguerekóva aikuaauka haguére umi marandu porã. 19  Che ndaguerekóiramo jepe ovligasión avavéndi, aiko opavave rembiguáiramo, ikatu hag̃uáicha aipytyvõ opa ikatúvape oiko hag̃ua chugui kristiáno*. 20  Aimérõ guare umi hudíondi aiko hudíoicha, aipytyvõ hag̃ua umi hudíope. Aimérõ guare umi oĩva Léi poguýpe apytépe, akumpli pe Léi, jepe che naiméi Léi poguýpe; ajapo péicha aipytyvõ hag̃ua umi oĩvape Léi poguýpe. 21  Aimérõ guare umi orekoʼỹva Léi apytépe, aiko ndarekoiramoguáicha Léi, jepe che asegi Ñandejára Léi ha aime Cristo Léi poguýpe; ajapo péicha aipytyvõ hag̃ua umi orekoʼỹvape Léi. 22  Aimérõ guare umi ikangýva ndive, aiko ikangývaramo, aipytyvõ hag̃ua umi ikangývape. Ajapo opa mbaʼe aipytyvõ hag̃ua opaichagua tapichápe, ha añehaʼãmbaite asalva mbovymi jepe ijapyteguikuéra. 23  Péro ajapo opa mbaʼe umi marandu porã rehehápe, ikatu hag̃uáicha apredika che rapichakuérape. 24  ¿Peẽ piko ndapeikuaái peteĩ karrérape enterove odiparaha, péro peteĩmente oñemeʼẽ pe prémio? Pediparána pegana hag̃uáicha pe prémio. 25  Avei entéro kuimbaʼe opartisipáva peteĩ karrérape* ojejokokuaa opa mbaʼépe. Añetehápe haʼekuéra ojapo upéva ogana hag̃ua peteĩ koróna upe rire oñehundíva, ñande katu ñagana hag̃ua peteĩ koróna oñehundiʼỹva arakaʼeve. 26  Upévare che adipara aikuaa rupi moõpa aha, ha nañorairõi ku ainupãramoguáicha yvytu rei. 27  Upéva rangue chepuʼaka che retére ha areko che rembiguáiramo, ani ág̃a upéi, apredika rire ótrope, aju apyta vai Ñandejára renondépe.

Nóta

Ehecha “Apóstol”, diksionário oĩva ko Bíbliape.
Ehecha “Léi”, diksionário oĩva ko Bíbliape.
Griégope heʼi: “tóro”.
Ehecha “Marandu Porã”, diksionário oĩva ko Bíbliape.
Ehecha “Altár”, diksionário oĩva ko Bíbliape.
Ehecha “Kristiáno”, diksionário oĩva ko Bíbliape.
Griégope heʼi: “kompeténsiape”. Pévape oike heta kláse depórte.