Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

1 Corintios 7:1-40

7  Koʼág̃a ahai peẽme upe peporandu vaʼekuére: kuimbaʼépe g̃uarã iporã ndopokói* kuñáre.  Péro oĩ rupi hetaiterei hekovaíva*, káda kuimbaʼe oreko vaʼerã hembireko ha káda kuña oreko vaʼerã iména.  Ména omeʼẽ vaʼerã hembirekópe oikotevẽva*, ha tembireko omeʼẽ vaʼerã avei iménape oikotevẽva.  Tembireko nomandavéima hetére, síno iména; upéicha avei pe ména nomandavéima hetére, síno hembireko.  Ani penega ojuehegui upéva, noiméirõ peñemoĩ peteĩ ñeʼẽme ha pedesidi ndapekemoʼãiha oñondive peteĩ tiémpore, ikatu hag̃uáicha peñemboʼe. Upéi katu peke jey oñondive ani hag̃ua Satanás* pendereity iñuhãme ndapejejokokuaáigui.  Haʼe peẽme ko mbaʼe poipytyvõ hag̃uánte, ndahaʼéi amoĩva peẽme peteĩ léi pekumpli vaʼerã.  Péro aipota entéro kuimbaʼe opyta soltéro chéicha. Upéicharõ jepe Ñandejára omeʼẽ káda únope peteĩ rregálo, upévare oĩ omendáva ha oĩ opytáva soltéro.  Koʼág̃a haʼese umi omendaʼỹva ha umi viúdape iporãha chupekuéra opytárõ chéicha.  Péro ndojejokokuaáirõ tomendánte hikuái, cháke iporãvéta omendáramo oiko rangue iñakãraku. 10  Umi omendávape katu añemoñeʼẽ, ndahaʼéi voi che, síno ñande Ruvicha: tembireko ndohejái vaʼerã iménape. 11  Péro ohejáramo chupe topytánte omendaʼỹre, térã toiko porã jey iménandi; ha pe ména ndohejái vaʼerã hembirekópe. 12  Péro umi ótrope che haʼe, ndahaʼéi ñande Ruvicha: peteĩ ermáno orekóramo hembireko ojeroviaʼỹva Ñandejárare, péro hembireko opytase hendive, ani oheja chupe. 13  Peteĩ ermána orekóramo iména ojeroviaʼỹva Ñandejárare, péro iména opytase hendive, ani oheja chupe. 14  Pe ména ojeroviaʼỹva imarangatu hembireko rupive, ha pe tembireko ojeroviaʼỹva imarangatu iména rupive. Ndahaʼéirire upéicha ningo umi mitã ikyʼa vaʼerãmoʼã Ñandejára renondépe, péro koʼág̃a imarangatúma hikuái. 15  Péro pe ojeroviaʼỹva odesidíramo oho, toho; oikóramo upéva pe ermáno térã ermána ndorekói ovligasión opytávo hendive, Ñandejára omeʼẽ peẽme pyʼaguapy. 16  Nde tembireko, ¿mbaʼéicha reikuaa ndaikatumoʼãipa resalva ne ménape? Nde ména, ¿mbaʼéicha reikuaa ndaikatumoʼãipa resalva ne rembirekópe? 17  Péro káda uno toiko Jehová* omeʼẽ haguéicha chupe, oĩ haguéicha voi ohenóirõ guare chupe Ñandejára. Péicha amanda entéro kongregasiónpe*. 18  Ñandejára ohenóiramo peteĩ kuimbaʼe oñesirkunsida vaʼekuépe, topytánte upéicha. Ha ohenóiramo peteĩ noñesirkunsidái vaʼekuépe, topytánte avei upéicha. 19  Pe iñimportánteva hína ñakumpli Ñandejára mandamiénto, ndahaʼéi peteĩ tapicha oñesirkunsidápa térãpa noñesirkunsidái. 20  Pe ñaime haguéicha ñañehenóirõ guare, upéichante japyta. 21  ¿Nde piko tembiguái raʼe reñehenóirõ guare? Ani reheja upéva ndepyʼapy. Péro ikatúramo ereko liverta, reaprovecha vaʼerã. 22  Oimeraẽ oservíva ñande Ruvichápe ha oñehenói vaʼekue haʼérõ guare tembiguái, oreko liverta ñande Ruvicha rupive. Ha pe oreko vaʼekue liverta oñehenóirõ guare, oiko chugui Cristo* rembiguái. 23  Ñandejára hepy opaga penderehe, anive upéicharõ peiko kuimbaʼekuéra rembiguáiramo. 24  Che ermanokuéra, pe ñaime haguéicha ñañehenóirõ guare, upéichante japyta Ñandejára renondépe. 25  Umi nomendáivape* g̃uarã ndarekói mandamiénto ñande Ruvichágui, péro haʼéta che apensáva. Ha ñande Ruvicha cheporiahuvereko rupi ikatu pejerovia haʼévare. 26  Koʼã tiémpo ijetuʼu rupi, che apensa iporãvetaha pe kuimbaʼe opytánte oĩháicha. 27  Oimérõ remendáma, anive rehejase ne rembirekópe. Oimérõ neremendái gueteri, anive reheka ne rembirekorã. 28  Péro remendáramo, upéva ndahaʼemoʼãi pekádo. Ha peteĩ soltéro* omendáramo, ndahaʼemoʼãi pekádo. Upéicharamo jepe umi ojapóva upéicha, heta iprovlémata. Péro che posalvase upévagui. 29  Che ermanokuéra, haʼéta avei peẽme: Saʼipaitéma pe tiémpo hembýva. Koʼág̃a guive umi omendáva toiko omendaʼỹrõguáicha*, 30  umi hasẽva toiko hasẽʼỹvaicha, umi ovyʼáva toiko ovyʼaʼỹvaicha, ha umi ojoguáva toiko orekoʼỹvaicha upe ojogua vaʼekue, 31  ha umi oiporúva ko múndo*, ani oiporupaite ko múndo; cháke umi mbaʼe oĩva ko múndope okambia ohóvo. 32  Añetehápe ndaipotái pejepyʼapy mbaʼevére. Pe kuimbaʼe soltéro ojepyʼapy ñande Ruvicha rembiapóre añónte, ombovyʼase rupi ñande Ruvichápe. 33  Pe kuimbaʼe omendáva katu ojepyʼapy umi mbaʼe ko mundopeguáre, oipotágui hembireko oguerohory chupe, 34  ha upévare ipyʼamokõi. Avei pe kuña omendaʼỹva ha pe vírhen ojepyʼapy ñande Ruvicha rembiapóre, imarangatu hag̃ua opensáva* ha ojapóva. Péro pe kuña omendáva ojepyʼapy umi mbaʼe ko mundopeguáre, oipotágui iména oguerohory chupe. 35  Che haʼe peẽme koʼã mbaʼe ideprovécho hag̃ua peẽme, ndahaʼéi pojokoségui, síno pomokyreʼỹse ikatu hag̃uáicha pejapo iporãva ha peservi meme pende pyʼaite guive ñande Ruvichápe, mbaʼeve pendestorvaʼỹre. 36  Péro oĩramo opensáva ndaikatumoʼãiha ojejoko, ha ndahaʼéi la imitãitereíva, upéicharõ haʼe ojapo vaʼerã ko mbaʼe: tomenda omendaséramo, upéva ndahaʼéi pekádo. 37  Ha oĩramo opensáva natekotevẽiha omenda, ojejokokuaa ha odesidi ipyʼaite guive nomendamoʼãiha, ojapo porã hína. 38  Upéicharõ pe omendáva ojapo porã, péro pe nomendáiva ojapo porãvéntema. 39  Peteĩ tembireko ojoaju iménare haʼe oikove aja, iména omanóramo katu haʼe ikatu omenda omendasévare, haʼéma guive peteĩ ojeroviáva ñande Ruvicháre. 40  Péro chéverõ g̃uarã haʼe ovyʼave opytánterõ oĩháicha. Añetehápe, apensa che arekoha avei Ñandejára espíritu.

Nóta

Péva oiméne heʼise: “nomendái ha ndorekói rrelasión sexuál”.
Ehecha “Tekovai”, Informasión Oĩvéva 4-pe.
Koʼápe oñeñeʼẽ hína rrelasión sexuál rehe.
Ehecha “Satanás”, diksionário oĩva ko Bíbliape.
Ehecha Informasión Oĩvéva 1.
Ehecha “Kongregasión”, diksionário oĩva ko Bíbliape.
Ehecha “Cristo”, diksionário oĩva ko Bíbliape.
Griégope heʼi: “vírhen”. Koʼápe oñeñeʼẽ kuimbaʼe térã kuñáre.
Griégope heʼi: “vírhen”. Koʼápe oñeñeʼẽ kuimbaʼe térã kuñáre.
Péva heʼise ani hag̃ua omotenonde imatrimónio Ñandejárape rangue.
Ehecha “Múndo”, diksionário oĩva ko Bíbliape.
Griégope heʼi: “ijespíritu”.