Ehecha oĩva pype

Ehecha oĩva pype

1 Corintios 4:1-21

4  Entéro kuimbaʼe ohecha vaʼerã roserviha Crístope*, ha ore haʼeha tembiguái* roñangarekóva Ñandejára sekréto marangatúre*.  Jaikuaaháicha pe patrón oipota umi hembiguái ojapo hekópe hembiapo.  Chéve g̃uarã ndahaʼeiete voi mbaʼeve chehusgárõ peẽ, térã peteĩ trivunál. Añetehápe ni che voi ndajehusgái chejupe.  Che konsiénsia* ipotĩ, péro upéva ndohechaukái cherekojojaha; Jehová hína upe chehusgáva.  Upévare ani pehusga mbaʼeve og̃uahẽ mboyve pe tiémpo, pehaʼarõ guei ou peve ñande Ruvicha, haʼe oguenohẽta hesakãháme umi mbaʼe ñemi oĩva pytũmbýpe ha ohechaukáta mbaʼépa jareko ñane korasõme. Upévo káda únope Ñandejára ombotuicháta hembiapokuére.  Che ermanokuéra, koʼã mbaʼe haʼe peẽme chejehe ha Apolos rehe, ikatu hag̃uáicha ideprovécho peẽme ha peaprende ko mbaʼe: “Pesegínte umi mbaʼe ojehaíva Ñandejára Ñeʼẽme”, péicha ndapeikomoʼãi peñemombaʼeguasu pepenságui peteĩva ivaleveha pe ótrogui.  ¿Máva piko heʼi nde ndevaleveha ótrogui? ¿Nomeʼẽingaʼu piko ndéve Ñandejára opa mbaʼe? Ha añetehápe omeʼẽramo ndéve, ¿mbaʼére piko upéicharõ reñemombaʼeguasu ku rehupytyramoguáicha ndejehegui reínte?  Peẽ ningo peguerekopáma la peipotáva, ¿ajépa? Peẽ pendepláta hetáma, ¿ajépa? Peñepyrũma pegoverna orereheʼỹ, ¿ajépa? Hiʼãite chéve peñepyrũma pegoverna, ore avei rogoverna hag̃ua penendive.  Chéverõ g̃uarã, Ñandejára oremoĩ ore apostolkuérape* ultimoite roike hag̃ua pe esenáriope, opavave orerecha hag̃ua, roñekondena rupi romano hag̃ua. Pe múndo* kompletoite orerecha, tahaʼe umi ánhel térã yvyporakuéra. 10  Ojeʼe orerehe orevyroha rosegi haguére Crístope, peẽ katu peje penearanduha pesegi haguére Crístope; ore orekangy péro peẽ penembarete; penderehe oñeñeʼẽ porã ha oréve katu oĩ oreapoʼíva. 11  Koʼág̃a peve rosegi oreñembyahýi, oreyʼuhéi, ndaoreaói, roñemaltrata, ndaorerógai, 12  ha rombaʼapo pohýi. Umi hénte oñeʼẽ vai jave orerehe, rojerure Ñandejárape tohovasa* chupekuéra; oĩ jave orepersegíva, orepasiénsia ha roaguanta. 13  Ojetaky jave orerehe, rombohovái pyʼaguapýpe porãnte; koʼág̃a peve rojeguereko haʼeramoguáicha yty ha mbaʼe kyʼa ko mundopegua. 14  Ahai koʼã mbaʼe añemoñeʼẽ hag̃ua peẽme, che raʼykuéra ahayhúvaicha, ndahaʼéi pomotĩ hag̃ua. 15  Peguerekóramo jepe diez mil mboʼehára penemboʼéva mbaʼéichapa pesegi vaʼerã Crístope, ndapeguerekói heta túva. Che ningo pende túvaicha, pomboʼe vaʼekue umi marandu porã* ha mbaʼéichapa pesegi vaʼerã Cristo Jesúspe. 16  Upévare ajerure jey jey peẽme pesegi hag̃ua che ehémplo. 17  Upéicha rupi amondo pene rendápe Timotéope, haʼe ningo che raʼy ahayhuetéva, ojapóva hekoitépe ñande Ruvicha rembiapo. Haʼe penemomanduʼáta mbaʼéichapa che ajapo opa mbaʼe aservívo Cristo Jesúspe, ha mbaʼéichapa aporomboʼe hína entéro kongregasiónpe* ha opa hendárupi. 18  Pende apytépe oĩ opensáva ndahamoʼãiha pene rendápe ha upévare oñemombaʼeguasu hikuái. 19  Jehová oipotáramo katu, koʼẽrõitéma aháta pene rendápe, péro che ndaikuaaséi mbaʼépa heʼi umi oñemombaʼeguasúva, síno aikuaase orekópa hikuái Ñandejára podér. 20  Pe ohechaukáva jaiketaha Ñandejára Rréinope ndahaʼéi umi mbaʼe jaʼéva, síno jajapóva, koʼãva ohechauka jarekoha Ñandejára podér. 21  ¿Mbaʼéichapa peipota aha pene rendápe? ¿Peteĩ garrótere, térã mborayhu ha pyʼaguapýpe porãnte?

Nóta

Ehecha “Cristo”, diksionário oĩva ko Bíbliape.
Térã: “majordómo”, ehecha diksionário oĩva ko Bíbliape.
Ehecha “Sekréto Marangatu”, diksionário oĩva ko Bíbliape.
Ehecha “Konsiénsia”, diksionário oĩva ko Bíbliape.
Ehecha “Apóstol”, diksionário oĩva ko Bíbliape.
Ehecha “Múndo”, diksionário oĩva ko Bíbliape.
Térã: “tovendesi”. Ehecha “Vendisión”, diksionário oĩva ko Bíbliape.
Ehecha “Marandu Porã”, diksionário oĩva ko Bíbliape.
Ehecha “Kongregasión”, diksionário oĩva ko Bíbliape.