Ehecha oĩva pype

Ehecha oĩva pype

1 Corintios 16:1-24

16  Pembyatýta vove pláta umi imarangatúvape g̃uarã, pejapo vaʼerã haʼe haguéicha umi kongregasión* Galaciaguápe.  Káda semána, pe primer día pemboyke vaʼerã upe ikatúva pemeʼẽ, ani hag̃ua oñembyaty pláta che ag̃uahẽ vove.  Péro aime vove upépe amondóta umi kuimbaʼe peẽ perrekomendáva pende kártape, oraha hag̃ua Jerusalénpe pe pláta pemeʼẽ vaʼekue pyʼaporãme.  Ha tekotevẽramo che aha avei, upéicharõ haʼekuéra ohóta chendive.  Aháta hína pene rendápe ahasa rire Macedóniarupi, koʼág̃a ningo aháta hína Macedóniarupi.  Ha ikatu voi apyta térã ahasa araroʼy penendive, ikatu hag̃uáicha che aha vove ótro lugárpe, peẽ peho chendive tapekuʼa peve.  Che ningo ndapohechaséi koʼág̃a ahasakuévonte, hiʼãite chéve apyta aremi penendive, Jehová* oipotáramo.  Péro apytáta Éfesope og̃uahẽ meve Pentekostés* arete.  Peteĩ okẽ tuichaitereíva ojavri chéve ajapo hag̃ua heta tembiapo, péro oĩ heta oñemoĩva cherehe. 10  Ha Timoteo og̃uahẽramo, peipytyvõ chupe ani hag̃ua ojepyʼapyeterei oĩ aja pende apytépe, haʼe ningo chéicha avei ombaʼapo hína Jehovápe g̃uarã. 11  Upéicharõ, aníkena avave oapoʼi chupe. Pemoirũ chupe tapekuʼa peve og̃uahẽ hag̃ua pyʼaguapýpe che rendápe, che ahaʼarõgui chupe umi ermánondi. 12  Ñane ermáno Apólospe che haʼe jey jey oho hag̃ua pene rendápe umi ermánondi, péro haʼe ndohoséi koʼág̃a, síno amo gotyove ohóta ija vove chupe. 13  Peñatende porãkena, peñakarama hatãkena pende jeroviáre, pendepyʼaguasu ha penembaretékena. 14  Pejapókena opa mbaʼe mborayhúpe. 15  Peẽ peikuaa umi Estéfanas rogayguakuéra raẽvete ojerovia hague Crístore* Acáyape, ha haʼekuéra oñemeʼẽmbaite hague oipytyvõ hag̃ua umi imarangatúvape. Upévare, pomokyreʼỹ che ermanokuéra 16  akóinte peñemoĩ hag̃ua koʼãichagua persóna poguýpe, ha avei entéro umi oporopytyvõva ha ombaʼapo jejopýva poguýpe. 17  Péro avyʼa oĩ* haguére Estéfanas, Fortunato ha Acaico, haʼekuéra tuicha chepytyvõ peẽ napeiméi aja. 18  Haʼekuéra ombopiroʼy che pyʼapy* ha pende pyʼapy avei. Upévare peguerohorýkena koʼãichagua kuimbaʼépe. 19  Umi kongregasión oĩva Ásiape* orahauka peẽme salúdo. Áquila, Prisca ha pe kongregasión oñembyatýva hogapekuéra orahauka avei peẽme salúdo, enterove haʼégui ñande Ruvicha disípulo*. 20  Enterove umi ermáno orahauka peẽme salúdo. Pejosaludávo peñohetũ*. 21  Chete Pablo, ahai ko salúdo. 22  Oĩramo ndohayhúiva ñande Ruvichápe toñehundi. ¡Ejúna ore Ruvicha! 23  Ñande Ruvicha Jesús taimbaʼeporã* penendive. 24  Che mborayhu toĩ penendive, peẽ haʼégui Cristo Jesús disípulo.

Nóta

Ehecha “Kongregasión”, diksionário oĩva ko Bíbliape.
Ehecha Informasión Oĩvéva 1.
Ehecha “Pentekostés”, diksionário oĩva ko Bíbliape.
Ehecha “Cristo”, diksionário oĩva ko Bíbliape.
Griégope heʼi: “presénsia”, ehecha Informasión Oĩvéva 5.
Griégope heʼi: “che espíritu”.
Ehecha nóta oĩva Hch 2:9-pe.
Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Griégope heʼi: “ñehetũ marangatu”. Péicha ojosaluda vaʼekue kristianokuéra ojotopa jave.
Térã: “tohechauka peẽme mbaʼeporã ijojahaʼỹva”. Ehecha “Mbaʼeporã Ijojahaʼỹva”, diksionário oĩva ko Bíbliape.