Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

1 Corintios 15:1-58

15  Koʼág̃a pomomanduʼase che ermanokuéra umi marandu porã* aikuaauka vaʼekue peẽme, umíva peẽ peguerovia vaʼekue ha pesegi pejerovia hese.  Peñakarama hatãramo umi marandu porã amombeʼu vaʼekuére peẽme pejesalva hína, ndaupéichairamo katu reiete pejerovia ñande Ruvicháre.  Che ningo pomboʼe pe iñimportantevéva aaprende vaʼekue: Cristo* omano hague ñande pekádore, heʼiháicha Ñandejára Ñeʼẽme.  Chupe oñeñotỹ ha upéi oñemopuʼã tres día haguépe, heʼiháicha Ñandejára Ñeʼẽme.  Haʼe ojechauka Céfaspe ha upéi umi dócepe.  Upe rire peteĩ árape ohecha chupe quinientos ermánorupi, ha ijapyteguikuéra heta oĩ gueteri ñanendive, péro oĩ avei umi omanómava*.  Upéi ojechauka Santiágope ha upe rire enterove umi apóstolpe*.  Péro ipahaitépe ojechauka avei chéve, upéicha rupi che ajogua peteĩ mitã onase vaʼekuépe og̃uahẽ mboyve itiémpo.  Che ningo pe michĩvéva umi apóstol apytépe ha namereséi ojeʼe cherehe haʼeha apóstol, ymave apersegi rupi Ñandejára kongregasión*. 10  Péro Ñandejára imbaʼeporãiterei* rupi ikatu ajapo ko tembiapo. Jepe ambaʼapove umi ótro apóstolgui ha ajapo heta mbaʼe porã, ndahaʼéi chejehegui rei ajapóva umi mbaʼe porã, síno Ñandejára imbaʼeporã rupi chendive. 11  Upéicharõ, tahaʼe che térã umi apóstol, peteĩnte pe marandu ropredikáva ha péicha peẽ peñepyrũ kuri peguerovia. 12  Upéicharõ, oñemombeʼúramo hína Crístope oñemopuʼã hague omanóva apytégui, ¿mbaʼéicha piko pende apytépe oĩ heʼíva umi omanóva noñemoingovejeymoʼãiha? 13  Añetehápe, umi omanóva noñemoingovejeymoʼãiramo, Crístope noñemopuʼãi avei. 14  Péro Crístope noñemopuʼãiramo, añetehápe japredika rei ha jajerovia rei. 15  Umi omanóva noñemopuʼãmoʼãirõ, Ñandejára nomopuʼãi avei Crístope, upéva heʼise ñandejapuha Ñandejára kóntrape jaʼévo haʼe omopuʼã hague Crístope. 16  Umi omanóva noñemopuʼãmoʼãirõ, Crístope noñemopuʼãi avei. 17  Ha Crístope noñemopuʼãirõ, pende jerovia ndovaléi mbaʼeverã ha pende pekádo noñeperdonái gueteri. 18  Ha upéicha avei umi Cristo disípulo* omano* vaʼekue oñehundíma opa ára g̃uarã. 19  Jarekóramo esperánsa Crístore jaikove ajánte, upéicharõ ñane situasión ivaive enterove umi ótrogui. 20  Péro añetehápe Crístope oñemopuʼã omanóva apytégui, chupe raẽve* oñemoingove jey vaʼekue. 21  Pe ñemano ningo ou peteĩ kuimbaʼe rupive, upévare umi omanóvape oñemoingove jey peteĩ kuimbaʼe rupive. 22  Adán káusare enterove omano, upéicha avei Cristo rupive enterovépe oñemoingove jeýta. 23  Péro káda uno oikove jeýta otoka vove chupe: Cristo raẽve* oñemoingove jey, upéi umi haʼéva Cristo mbaʼe oñemoingove jeýta haʼe oĩ* aja. 24  Upe rire ipahaitépe haʼe omeʼẽta pe Rréino Itúva Ñandejárape, ohundipaite rire entéro goviérno, autorida ha podér. 25  Haʼe ogoverna vaʼerã Ñandejára omoĩ meve ipy guýpe entéro iñenemigokuérape. 26  Ha ñane enemígo ipahaite oñehundítava haʼe pe ñemano. 27  Ñandejára “omoĩ Cristo py guýpe opa mbaʼe”. Péro haʼe heʼívo ‘oñemoĩ hague opa mbaʼe ipy guýpe’, hesakã porã noñeñeʼẽiha hína Ñandejárare, upe omoĩ vaʼekue Cristo py guýpe opa mbaʼe. 28  Ha oñemoĩ vove ipoguýpe opa mbaʼe, upévo pe Taʼýra oñemoĩta avei Ñandejára poguýpe, haʼe ningo Upe omoĩ vaʼekue opa mbaʼe Cristo poguýpe. Upéicha Ñandejára añoite omoakãta opa mbaʼe. 29  Upéicharõ, ¿mbaʼépa ojapóta umi ojevautisáva* omano hag̃ua? Umi omanóvape ni mbaʼevéicharõ noñemopuʼãmoʼãiramo, ¿maʼerã piko upéicharõ ojevautisa hikuái omano hag̃uánte? 30  ¿Mbaʼére piko avei upéicharõ manterei jajapeligra? 31  Che ermanokuéra avyʼa pendereheve, peẽ haʼégui ñande Ruvicha Cristo Jesús disípulo, upévare ahura peẽme ára ha ára haimetemeteha amano. 32  Éfesope che añorairõ vaʼekue umi mymba ñarõndi, umi ótro ojapo haguéicha, ¿ha mbaʼépepa ideprovécho chéve? Umi omanóvape noñemopuʼãmoʼãiramo, “jakaru ha ñamokõ katu, cháke koʼẽrõ ñamanóta”. 33  Aníke peheja ótro penembotavy. Umi júnta vai ohundi umi mbaʼe porã pejepokuaáva pejapo. 34  Pendehuísio porã jeýna ha pejapo iporãva, anive pepeka. Pende apytépe oĩ ndoikuaáiva Ñandejárape. Haʼe peẽme koʼã mbaʼe jahecha napetĩripa. 35  Upéicharõ jepe oĩta heʼíva: “¿Mbaʼéichapa oñemopuʼãta umi omanóvape? ¿Mbaʼeichaguáta piko hete oñemopuʼã vove?”. 36  ¡Aje piko ndevyroite! Pe reñotỹva ningo omano raẽ vaʼerã upéi okakuaa hag̃ua. 37  Nde nereñotỹmoʼãi peteĩ plánta okakuaapyre, síno peteĩ semílla, tahaʼe trígo térã ótra semílla. 38  Péro Ñandejára omongakuaa haʼe oipotaháicha, ha káda semílla okakuaáva idiferénte ojuehegui. 39  Jaikuaaháicha, yvyporakuéra rete idiferénte umi vaka retégui, ha umi guyra idiferénte avei umi pirágui. Añetehápe enterove idiferénte ojuehegui. 40  Umi oikóva yvágape hete diferénte umi oikóvagui ko yvy ape ári. Upéicha avei umi yvagapegua iporã peteĩ hendáicha ha umi yvy arigua iporã ótro hendáicha. 41  Pe kuarahy omimbi peteĩ hendáicha, pe jasy omimbi ótro hendáicha ha umi estrélla omimbi ótro hendáicha. Añetehápe umi estrélla omimbi diferentepa ojuehegui. 42  Upéicha avei oiko oñemoingove jey vove umi omanóvape. Oñeñotỹ hete ikatúva oñembyai ha oñemopuʼã peteĩ ikatuʼỹva oñembyai. 43  Oñeñotỹvo haʼe peteĩ mbaʼe ojeapoʼíva ha oñemopuʼãvo katu haʼe peteĩ mbaʼe oñemombaʼéva. Oñeñotỹvo ikangy ha oñemopuʼãvo imbarete. 44  Oñeñotỹ yvypóra rete ha oñemopuʼã peteĩ espíritu. Yvyporakuéra orekoháicha hete, umi espíritu oreko avei hete. 45  Ojehaiháicha Ñandejára Ñeʼẽme: “Pe kuimbaʼe ypykue Adán, haʼe vaʼekue peteĩ yvypóra* oikovéva”. Pe último Adán katu haʼe peteĩ espíritu oporomoingovéva. 46  Upéicharõ jepe, pe oĩ vaʼekue ñepyrũrã haʼe hína yvypóra rete, ndahaʼéi espíritu rete. 47  Pe primer kuimbaʼe ou yvýgui ha ojejapo yvýgui, pe segundo kuimbaʼe katu ou yvágagui. 48  Umi hénte ko mundopegua* ojogua upe Ñandejára ojapo vaʼekuépe yvýgui. Umi yvagapegua katu ojogua upe ou vaʼekuépe yvágagui. 49  Ha jajogua haguéicha upe ojejapo vaʼekuépe yvýgui, upéicha avei jajoguáta upe ou vaʼekuépe yvágagui. 50  La haʼeséva peẽme che ermanokuéra, soʼo ha tuguy ndaikatuiha oike Ñandejára Rréinope; upéicha avei pe oñembyaívagui ndaikatúi oiko peteĩ mbaʼe oñembyaiʼỹva. 51  ¡Péina! Haʼe peẽme peteĩ sekréto marangatu*: Naentéroi japytáta jake ñemanóme, péro enterove ñañekambiáta. 52  Upéva oikóta peteĩ tesapirĩme, ipu vove pe última trompéta. Pe trompéta ipúvo umi omanóvape oñemopuʼãta, orekóta hikuái hete oñembyaiʼỹva ha enterove ñande ñañekambiáta. 53  Pe oñembyaívagui oiko vaʼerã peteĩ mbaʼe oñembyaiʼỹva ha pe omanóvagui oiko vaʼerã peteĩ ikatuʼỹva omano. 54  Pe oñembyaívagui oiko vove peteĩ mbaʼe oñembyaiʼỹva ha pe omanóvagui oiko vove peteĩ ikatuʼỹva omano, upévo oñekumplíta upe ojehai vaʼekue: “Pe ñemano oñehundíta* opa ára g̃uarã”. 55  Ñemano, ¿moõ piko oĩ la ne mbaretekue? Ñemano, ¿moõ piko oĩ la ne venéno? 56  Pe venéno oporojukáva haʼe hína pekádo, ha pe Léi* omeʼẽ podér pe pekádope. 57  Péro jaagradese Ñandejárape, haʼe ñanepytyvõ haguére ñandepuʼaka hag̃ua ñemanóre ñande Ruvicha Jesucristo rupive. 58  Upévare che ermanokuéra, pejepytaso mbaretékena, ani peheja mbaʼeve penemomýi, ha akóinte penerembiapo heta ñande Ruvicha servísiope, peikuaágui umi mbaʼe pejapóva chupe g̃uarã ndopytareimoʼãiha.

Nóta

Ehecha “Marandu Porã”, diksionário oĩva ko Bíbliape.
Ehecha “Cristo”, diksionário oĩva ko Bíbliape.
Griégope heʼi: “okémava”.
Ehecha “Apóstol”, diksionário oĩva ko Bíbliape.
Ehecha “Kongregasión”, diksionário oĩva ko Bíbliape.
Térã: “ohechauka rupi mbaʼeporã ijojahaʼỹva”. Ehecha “Mbaʼeporã Ijojahaʼỹva”, diksionário oĩva ko Bíbliape.
Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Griégope heʼi: “oke”.
Griégope heʼi: “kosécha tenondegua”.
Griégope heʼi: “kosécha tenondegua”.
Griégope heʼi: “presénsia”, ehecha Informasión Oĩvéva 5.
Ehecha “Vautísmo”, diksionário oĩva ko Bíbliape.
Griégope heʼi: “álma”, ehecha Informasión Oĩvéva 7A.
Ehecha “Múndo”, diksionário oĩva ko Bíbliape.
Ehecha “Sekréto Marangatu”, diksionário oĩva ko Bíbliape.
Griégope heʼi: “oñemokõta”.
Ehecha “Léi”, diksionário oĩva ko Bíbliape.