Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

1 Corintios 14:1-40

14  Peñehaʼãmbaitéke pejoayhu; péro avei peñehaʼã vaʼerã pehupyty umi rregálo* oúva Ñandejáragui, upéicharõ jepe ikuentave peprofetisa*.  Pe oñeʼẽva ótro idióma noñeʼẽi kuimbaʼekuérape síno Ñandejárape, avave nohendúigui chupe, ha haʼe omombeʼu umi sekréto marangatu* pe espíritu rupive.  Pe oprofetisáva katu iñeʼẽ rupive omombarete, omokyreʼỹ ha okonsola kuimbaʼekuérape.  Pe oñeʼẽva ótro idiómape oñemombarete ijupe, pe oprofetisáva katu omombarete kongregasiónpe*.  Che ningo aipota enterove peẽ peñeʼẽ ótro idióma, péro aipotave peprofetisa. Añetehápe pe oñeʼẽva ótro idióma otradusi vaʼerã omombarete hag̃ua pe kongregasiónpe, péro ndojapóiramo upéva, pe oprofetisáva tuichave chugui.  Che ermanokuéra, koʼág̃a aháramo pene rendápe ha añeʼẽ peẽme ótro idiómape, ¿mbaʼéicha piko upéva penepytyvõta? Poipytyvõséramo, amombeʼu vaʼerã peẽme umi mbaʼe Ñandejára oikuaaukáva chéve, umi mbaʼe iñeʼẽme heʼíva, peteĩ profesía térã umi mbaʼe Ñandejára chemboʼe vaʼekue.  Upeichaite avei oiko oñembopu jave fláuta térã árpa*, oĩramo nombopuporãiva umi nóta, ndaikatumoʼãi oñentende pe músika oñembopúva.  Gerrahápe noñembopuporãiramo pe trompéta, avave ndojepreparamoʼãi oñorairõ hag̃ua.  Upéicha avei, peẽ peiporúramo ñeʼẽ hasýva oñentende hag̃ua, ¿mbaʼéicha piko oñentendéta la pejéva? Añetehápe peñeʼẽta hína yvytúpe. 10  Ko múndope* oñeñeʼẽ heta idióma, ha enterovete ikatu oñentende. 11  Upévare, che nantendéiramo pe idióma oñeñeʼẽva, che hína peteĩ tetã ambuegua upe oñeʼẽvape g̃uarã, ha haʼe avei peteĩ tetã ambuegua chéve g̃uarã. 12  Upéicha avei, peẽ peñehaʼãmbaite rupi pehupyty umi rregálo oúva Ñandejáragui, peñehaʼã avei pehupyty heta rregálo omombaretétava kongregasiónpe. 13  Upéicharõ, pe oñeʼẽva peteĩ idiómape toñemboʼe ikatu hag̃uáicha otradusi upe heʼíva. 14  Añemboʼéramo peteĩ idiómape, ndahaʼéi che la añeʼẽva, síno pe rregálo oñemeʼẽva chéve espíritu sánto* rupive. Upévare che nantendéi upe haʼéva. 15  ¿Mbaʼépa ojejapóta upéicharõ? Añemboʼe hag̃ua aiporúta pe rregálo oñemeʼẽva chéve espíritu rupive ha añemboʼéta avei oñentende hag̃uáicha upe haʼéva. Apurahéi hag̃ua aiporúta pe rregálo oñemeʼẽva chéve espíritu rupive ha apurahéita avei oñentende hag̃uáicha upe haʼéva. 16  Péro reiporúramo pe rregálo oñemeʼẽva ndéve espíritu rupive remombaʼeguasu hag̃ua Ñandejárape, ha pende apytépe oĩramo peteĩ ijeskuelaʼíva ha nontendéi la eréva, ¿mbaʼéicha piko heʼíta “Taupéicha*”? 17  Añetehápe iporãiterei remombaʼeguasu lája Ñandejárape, péro upéva nomombaretéi pe ótro kuimbaʼépe. 18  Aagradese Ñandejárape añeʼẽ haguére hetave idióma pendehegui. 19  Upéicharõ jepe, pe kongregasiónpe chéve g̃uarã iporãve añeʼẽ saʼimi* oñentende hag̃uáicha, añeʼẽ puku* rangue peteĩ idióma avave ontendeʼỹvape. 20  Che ermanokuéra, peiporúke pene akã pentende hag̃ua opa mbaʼe, ha ani pepensa mitã opensaháicha, péro umi mbaʼe vairã ikuentave pepensa umi mitãicha. 21  Pe Léipe* ojehai voi: “Jehová* heʼi: ‘Añeʼẽ hag̃ua ko puévlope, ajevaléta umi tapicha oñeʼẽvare diferénte idióma ha umi arrivéñore, ha ni upeichavérõ nacherendumoʼãi hikuái’”. 22  Upéicharõ, umi idióma haʼe hína peteĩ señál, ndahaʼéi umi ojeroviávape g̃uarã, síno umi ndojeroviáivape g̃uarã. Umi profesía katu umi ojeroviávape g̃uarã, ndahaʼéi umi ojeroviaʼỹvape g̃uarã. 23  Upévare pe kongregasión kompletoite oñembyatýramo peteĩ lugárpe ha enterove oñeʼẽ diferénte idióma, ha oike umi ijeskuelaʼíva térã ojeroviaʼỹva, ¿ndeʼimoʼãi piko penderehe pendetavyraipamaha? 24  Péro enterove peẽ peprofetisáramo ha oikérõ peteĩ ojeroviaʼỹva térã ijeskuelaʼíva, haʼe ojepyʼamongeta ha ohechakuaáta hembiapo vaiha ohendúvo opavave heʼíva. 25  Ojekuaáta umi mbaʼe ñemi oĩva ipyʼapýpe, upévo oñesũ ha oñakãity, ha omombaʼeguasu Ñandejárape heʼívo: “Añetehápe Ñandejára oĩ pende apytépe”. 26  ¿Mbaʼépa ojejapóta upéicharõ che ermanokuéra? Peẽ peñembyaty jave, peteĩva opurahéi Ñandejárape, ótro oporomboʼe, ótro omombeʼu umi mbaʼe Ñandejára oikuaaukáva chupe, ótro oñeʼẽ diferénte idiómape, ha ótro otradusi ha omyesakã. Ojejapo vaʼerã ningo opa mbaʼe oñemombarete hag̃ua pe kongregasión. 27  Upévare, oĩramo oñeʼẽva ótro idióma, toñeʼẽ mokõi térã mbohapy tapichánte. Péro káda uno tohaʼarõ otoka vove chupe, ha oĩ vaʼerã avei otradusíva. 28  Ndaipóriramo otradusíva katu, tokirirĩnte peñembyaty jave ha toñeʼẽ ipyʼapýpe Ñandejárape. 29  Avei oñeʼẽ vaʼerã mokõi térã mbohapy proféta ha umi ótro ohendu vaʼerã ohechakuaa hag̃ua mbaʼépa la heʼiséva. 30  Péro oguapy aja upépe oĩramo ótro oñeʼẽva umi mbaʼe Ñandejára oikuaaukávare chupe, tokirirĩnte pe oñeʼẽ vaʼekue ñepyrũrã. 31  Peẽ enterove ikatu peprofetisa peteĩteĩ, opavave oaprende hag̃ua ha opavave ikyreʼỹ hag̃ua. 32  Umi proféta oñatende vaʼerã mbaʼéichapa oiporu hikuái pe rregálo omeʼẽva pe espíritu. 33  Ñandejára ndojapói mbaʼeve sarambikuépe, síno omoĩ pyʼaguapy. Oikoháicha enterove umi imarangatúva kongregasiónpe, 34  umi kuña tokirirĩ umi kongregasiónpe, ndorekói hikuái permíso oñeʼẽ hag̃ua, síno oñemoĩ vaʼerã umi kuimbaʼe poguýpe, pe Léi heʼiháicha avei. 35  Haʼekuéra oikuaaséramo peteĩ mbaʼe, oporandu vaʼerã iménape hógape. Ñemotĩ ningo pe kuñáme g̃uarã oñeʼẽramo kongregasiónpe. 36  ¿Pendehegui piko osẽ raʼe Ñandejára Ñeʼẽ, térã piko peẽme año penderupyty rakaʼe? 37  Oĩramo opensáva haʼeha peteĩ proféta térã orekoha peteĩ rregálo oñemeʼẽva espíritu rupive, ohechakuaa vaʼerã umi mbaʼe che ahaíva peẽme haʼeha ñande Ruvicha mandamiénto. 38  Péro oĩramo nontendéiva, upéva osegíta oikuaaʼỹre. 39  Upéicharõ che ermanokuéra, peñehaʼã meméke peprofetisa, péro ani peproivi oñeñeʼẽ diferénte idióma. 40  Opa mbaʼe tojejapo hekopete ha hendaitépe.

Nóta

Kóva hína pe katupyry Ñandejára omeʼẽva káda únope.
Ehecha “Profesía”, diksionário oĩva ko Bíbliape.
Ehecha “Sekréto Marangatu”, diksionário oĩva ko Bíbliape.
Ehecha “Kongregasión”, diksionário oĩva ko Bíbliape.
Térã: “umi mbaʼe ndoguerekóiva tekove”.
Ehecha “Múndo”, diksionário oĩva ko Bíbliape.
Ehecha “Espíritu Sánto”, diksionário oĩva ko Bíbliape.
Térã: “Amén”.
Griégope heʼi: “cinco palávra”.
Griégope heʼi: “diez mil palávra”.
Ehecha “Léi”, diksionário oĩva ko Bíbliape.
Ehecha Informasión Oĩvéva 1.