Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

1 Corintios 11:1-34

11  Pesegi che ehémplo, che asegiháicha Cristo* ehémplo.  Koʼág̃a poguerohory penemanduʼa haguére cherehe opa mbaʼépe, ha akóinte pejapo rupi hekoitépe umi mbaʼe pomboʼe vaʼekue.  Péro aipota peikuaa Cristo omoakãha entéro kuimbaʼekuérape; pe kuimbaʼe katu omoakã kuñáme, ha Ñandejára omoakã hína Crístope.  Entéro kuimbaʼe oguerekóva iñakã rehegua oñemboʼe térã oprofetisa* jave, omotĩ iñakãme.  Péro peteĩ kuña nomoĩriva iñakã rehegua oñemboʼe térã oprofetisa jave, omotĩ iñakãme; haʼete voi oñemoakãperõva* chupe.  Pe kuña nomoĩmoʼãirõ iñakã rehegua, toikytĩ iñakãrague; péro haʼe otĩramo iñakãrague mbyky térã iñakãperõ hag̃ua, tomoĩ iñakã rehegua.  Ñandejára ojapo pe kuimbaʼépe ijoguaháramo ha ombotuicha hag̃ua chupe, upévare pe kuimbaʼe nomoĩri vaʼerã iñakã rehegua. Pe kuña katu ombotuicha pe kuimbaʼépe,  pe kuimbaʼe ndoúi rupi kuñágui, síno pe kuña ou rupi pe kuimbaʼégui.  Hiʼarive pe kuimbaʼépe ndojejapói kuña rehehápe, síno pe kuñáme ojejapo kuimbaʼe rehehápe. 10  Upévare, pe kuña oguereko vaʼerã iñakã rehegua, ohechauka hag̃ua oñemoĩha iména poguýpe, ha ojapo vaʼerã avei upéva umi ánhel rehehápe. 11  Ñande Ruvicha segidorkuéra apytépe, pe kuimbaʼe oikotevẽ kuñáre ha kuña oikotevẽ kuimbaʼére. 12  Pe kuña ouháicha kuimbaʼégui, upéicha avei pe kuimbaʼe ou kuña rupive, péro opa mbaʼe ou Ñandejáragui. 13  Pehusga peẽ voi ko mbaʼe: ¿Oĩ porã piko pe kuña oñemboʼe Ñandejárape omoĩʼỹre iñakã rehegua? 14  ¿Ndapehechakuaái piko pendejehegui rei pe kuimbaʼe iñakãrague pukúramo, upéva omotĩha chupe; 15  péro pe kuña iñakãrague pukúramo, upéva ombotuichaha chupe? Pe iñakãrague ningo oñemeʼẽ chupe omoĩ rangue iñakã rehegua. 16  Upéicharõ, oĩramo jepe opensáva ko mbaʼe oĩ vaiha, ñande ndajarekói ótra kostúmbre ha Ñandejára kongregasionkuéra* ndorekói avei. 17  Peẽ peñembyaty jave pejapo ivaíva pejapo rangue iporãva, upévare che ndapoguerohorýi haʼévo peẽme koʼã mbaʼe. 18  Ñepyrũrã, ahendu peñembyaty jave rreunionrã pejoavyha jepi oñondive, ha agueroviaséma voi upeichaha. 19  Añetehápe oĩta sékta* pende apytépe, ikatu hag̃uáicha ojekuaa máva mávapepa Ñandejára oguerohory. 20  Upéicha peikógui, peñembyaty jave peteĩ lugárpe, ndaikatúi peʼu pe pan ha pe víno* pegueromanduʼa hag̃ua ñande Ruvichápe. 21  Ha peʼu jave katu, oĩ osenambámava upe mboyve; upévare oĩ ivareʼáva ha ótro katu okaʼu. 22  Añetehápe ningo peẽ peguereko pende róga pekaru ha pemboyʼu hag̃ua, ¿ajépa? ¿Térã piko peapoʼi Ñandejára kongregasión ha pemotĩ umi ndorekóivape mbaʼeve? ¿Mbaʼépa haʼéta peẽme? ¿Poguerohorýta piko? Ni mbaʼevéicharõ. 23  Ñande Ruvicha chemboʼe haguéicha, upéicha che pomboʼe kuri: pe pyhare oñetraisionátarõ guare ñande Ruvicha Jesúspe, haʼe ojagarra peteĩ pan, 24  ha oagradese rire Ñandejárape, ombojaʼo ha heʼi: “Kóva orrepresenta che rete, oñemeʼẽva penderehehápe. Pesegíkena pejapo kóva penemanduʼávo cherehe”. 25  Osenamba rire haʼe ojagarra pe kópa ha ojapo avei upéicha heʼívo: “Ko kópa orrepresenta pe kompromíso* pyahu ojejapóva che ruguy rupive. Pesegíkena pejapo kóva, peʼu jave chugui, penemanduʼávo cherehe”. 26  Peẽ peʼu jave ko pan ha ko víno, pesegi peikuaauka ñande Ruvicha omano hague, haʼe og̃uahẽ meve. 27  Upéicharõ, oimeraẽ hoʼúva pe pan térã pe víno omeʼẽva ñande Ruvicha, péro ndorrespetái upéva, opeka hína ñande Ruvicha rete ha huguy kóntrape. 28  Primero, pe kuimbaʼe ojepyʼamongeta vaʼerã ohecha hag̃ua mbaʼépa oreko ipyʼapýpe, ha upéi ae hoʼu vaʼerã pe pan ha pe víno. 29  Oĩramo ndohechakuaáiva upéva orrepresentaha ñande Ruvicha rete, haʼe oñekondena ijupe voi hoʼu ha omboyʼúramo. 30  Upévare pende apytépe oĩ heta ikangýva, hasýva ha avei heta omanóva*. 31  Péro jahechakuaáramo mbaʼeichagua persónapa ñande, avave nañandehusgamoʼãi. 32  Upéicharõ jepe, oĩramo ñandehusgáva, Jehová* ñandekorrehi hína ani hag̃ua ñañekondena ko múndo* ndive. 33  Upévare che ermanokuéra, peñembyaty jave peʼu hag̃ua pe séna, peñohaʼarõ. 34  Oĩramo ivareʼáva, tokaru hógape, ani hag̃ua peñekondena peñembyaty vove. Umi mbaʼe ofaltáva katu ahecháta ág̃a aha vove upépe.

Nóta

Ehecha “Cristo”, diksionário oĩva ko Bíbliape.
Ehecha “Profesía”, diksionário oĩva ko Bíbliape.
Péva hína peteĩ kastígo hekovai haguére.
Ehecha “Kongregasión”, diksionário oĩva ko Bíbliape.
Ehecha “Sékta”, diksionário oĩva ko Bíbliape.
Griégope heʼi: “ñande Ruvicha séna”.
Térã: “pákto ỹrõ kontráto”.
Kóva ndeʼiséi haʼekuéra añetehápe omanoha, síno noĩporãveimaha Ñandejárandi.
Ehecha Informasión Oĩvéva 1.
Ehecha “Múndo”, diksionário oĩva ko Bíbliape.