Ehecha oĩva pype

Ehecha oĩva pype

1 Corintios 10:1-33

10  Koʼág̃a aipota peikuaa che ermanokuéra: entéro ñande rukuéra ypykue oĩ hague pe arai guýpe ha opavave ohasa hague pe mar.  Ha upéicha enterove ojevautisa* osegi aja Moiséspe, oĩrõ guare pe arai guýpe ha ohasárõ guare pe mar,  ha opavave hoʼu pe tembiʼu Ñandejára omeʼẽ vaʼekue chupekuéra.  Enterove avei hoʼu pe y Ñandejára omeʼẽ vaʼekue. Heta vése hoyʼu hikuái pe ita guasúgui, upéva oĩ vaʼekue ijypypekuéra. Upéva ou Ñandejáragui ha orrepresenta Crístope*.  Upéicharamo jepe, Ñandejára ndoguerohorýi enterovépe. Upévare omanomba hikuái pe desiértope.  Koʼã mbaʼe ningo ehémplo ñandéve g̃uarã, ani hag̃ua jajapose ivaíva haʼekuéra ojapose haguéicha.  Ani avei ñamombaʼeguasu ñandejára guaʼu*, oĩ haguéicha ijapytepekuéra umi ojapóva; ojehaiháicha Ñandejára Ñeʼẽme: “Umi hénte oguapy okaru ha omboyʼu, ha opuʼã ojediverti hag̃ua”.  Ha ani ñanderekovai*, oĩ haguéicha ijapytepekuéra umi hekovaíva, ha omano hikuái veintitrés mil un díape.  Ani jajapo mbaʼeve jadesafia hag̃ua Jehovápe*, oĩ haguéicha ijapytepekuéra umi ojapóva; ha oisuʼu chupekuéra mbói ha omanomba hikuái. 10  Ani avei jaiko jajeplagea, oĩ haguéicha ijapytepekuéra umi ojeplageáva, ha upévare pe oporohundíva* ojukapa chupekuéra. 11  Koʼã mbaʼe oikóva hesekuéra oservi ñandéve ehémploramo, ha ojehai ñanerekomboʼe hag̃ua ñandéve, jaikóva hína ko múndo* ára pahápe. 12  Upévare, pe opensáva ojepytaso mbareteha, toñatendéke ani hoʼa. 13  Umi tentasión oúva pende ári ou avei entéro yvypóra ári. Péro ikatu pejerovia Ñandejárare, haʼe ndohejamoʼãi pehasa mbaʼeve ndaikatumoʼãiva pegueropuʼaka. Upéva rangue, pehasa jave peteĩ mbaʼe ijetuʼúva, ohechaukáta peẽme mbaʼéichapa pesẽta chugui, peaguanta hag̃ua. 14  Upéicharõ, che ermanokuéra ahayhuetéva, aníkena ni mbaʼevéicharõ* pemombaʼeguasu ñandejára guaʼu. 15  Peẽ ningo pehechakuaa iporãva ha ivaíva; upéicharõ peẽ voi pehusga vaʼerã umi mbaʼe haʼéva. 16  Pe kópa de víno jaagradeseha Ñandejárape orrepresenta Cristo ruguy, ¿ajépa? Pe pan ñambojaʼóva orrepresenta avei Cristo rete, ¿ajépa? 17  Peteĩnte pe pan, ha ñande ñanderetáramo jepe, enterove jaʼu pe pan, upévare enterove ñande peteĩnte hína. 18  Pemañami umi Israelguáre: Umi hoʼúva umi sakrifísio, okomparti hína pe altár* ndive. 19  ¿Upéicharõ piko che haʼese hína pe sakrifísio oñekuaveʼẽva umi ñandejára guaʼúpe* iñimportanteha, térã pe ñandejára guaʼu iñimportanteha? 20  Nahániri, la haʼeséva hína umi sakrifísio ojapóva umi tetãnguéra, ojapoha umi demóniope* g̃uarã ha ndahaʼéi Ñandejárape g̃uarã. Ha che ndaipotái peẽ pekomparti umi demónio ndive. 21  Peẽ ndaikatúi peyʼu Jehová kópagui ha umi demónio kópagui; ndaikatúi pekaru “Jehová meságui” ha demoniokuéra meságui. 22  ¿Térã piko “ñambopochyse* hína Jehovápe”? Ñande ningo nañanembaretevéi chugui, ¿ajépa? 23  Opa mbaʼe ningo ovale jajapo, péro naentéroi ideprovécho. Opa mbaʼe ovale jajapo, péro naentéroi ñanemombarete. 24  Upévare káda uno jasegi vaʼerã jajapo pe ideprovéchotava ñande rapichápe, ha ani ñandévente. 25  Peẽ ikatu pesegi peʼu oimeraẽ mbaʼe oñevendéva karniseríape, peporanduʼỹre mbaʼeve, pene konsiénsia* rehehápe, 26  peikuaágui “Jehová mbaʼeha ko yvy ha opa mbaʼe oĩva ipype”. 27  Peteĩ ojeroviaʼỹva peneinvitáramo pekaru hag̃ua, ha peẽ pehose, ikatu peho ha peʼu oimeraẽ mbaʼe oñemoĩva pene renondépe, peporanduʼỹre mbaʼeve pene konsiénsia rehehápe. 28  Péro oĩramo heʼíva peẽme: “Ko soʼo oñekuaveʼẽ umi ñandejára guaʼúpe”, ani peʼu; ani hag̃ua pemoñepysanga pe omombeʼu vaʼekuépe, ha ani hag̃ua avave omongyʼa ikonsiénsia pende káusare. 29  Ha ndahaʼéi voi ne konsiénsia rehehápe, síno nde rapicha konsiénsia rehehápe. ¿Mbaʼére piko che arekohápe liverta, che rapicha konsiénsia chehusga vaʼerã? 30  Jepe che aagradese Ñandejárape upe haʼúvare, iporãve ndaʼúinte, upéva omoñepysangátaramo che rapichápe. 31  Upévare, tahaʼe pekaru, pemboyʼu térã pejapóramo oimeraẽ mbaʼe, pejapo vaʼerã opa mbaʼe pembotuicha hag̃ua Ñandejárape. 32  Peñatende ani pemoñepysanga tahaʼe hudío, griégo, térã Ñandejára kongregasiónpe*. 33  Che avei ndajapói umi mbaʼe chévente ideprovéchotava, ikatu hag̃uáicha ameʼẽ gústo entéro tapichápe opa mbaʼépe, ojesalva hag̃ua hikuái.

Nóta

Ehecha “Vautísmo”, diksionário oĩva ko Bíbliape.
Ehecha “Cristo”, diksionário oĩva ko Bíbliape.
Ehecha “Idolatría”, diksionário oĩva ko Bíbliape.
Ehecha “Tekovai”, Informasión Oĩvéva 4-pe.
Ehecha Informasión Oĩvéva 1.
Oiméne koʼápe oñeñeʼẽ Ñandejára ánhel rehe.
Ehecha “Múndo”, diksionário oĩva ko Bíbliape.
Griégope heʼi: “pediparáke”.
Ehecha “Altár”, diksionário oĩva ko Bíbliape.
Griégope heʼi: “taʼangakuérape”.
Ehecha “Demónio”, diksionário oĩva ko Bíbliape.
Térã: “ñamboselosose”.
Ehecha “Konsiénsia”, diksionário oĩva ko Bíbliape.
Ehecha “Kongregasión”, diksionário oĩva ko Bíbliape.