Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

1 Corintios 1:1-31

1  Che, Pablo, añehenóiva aservi hag̃ua Jesucristo apóstolramo* Ñandejára oipotágui, ha ñane ermáno Sóstenes,  romondo ko kárta, peẽ peiméva kongregasión* Coríntope. Peẽme Ñandejára pendeporavo vaʼekue pejoaju hag̃ua Cristo* Jesús ndive. Peẽ pejeporavo penemarangatu hag̃ua, ha upéicha avei entéro umi ohenóiva opa hendárupi ñande Ruvicha Jesucristo réra. Haʼe hína opavave Ruvicha:  Aipotaite ñande Ru Ñandejára ha ñande Ruvicha Jesucristo, taimbaʼeporã* penendive ha tomeʼẽ peẽme pyʼaguapy.  Che akóinte aagradese Ñandejárape penderehe, haʼe imbaʼeporã haguére penendive Cristo Jesús rupive.  Pejoaju rupi hendive, peẽ perresivi opa mbaʼe, upévare pendekatupyry pemombeʼu hag̃ua hekoitépe Ñandejára marandu ha peikuaa porã Ñandejára Ñeʼẽ.  Ha pe marandu oñeʼẽva Crístore imbaretéma pende apytépe,  upéicha rupi perekopaitéma peikotevẽva, pehaʼarõ aja tojehechauka ñande Ruvicha Jesucristo.  Haʼe avei penemombaretéta ipahaite peve, ani hag̃ua avave oreko heʼi vaʼerã penderehe ñande Ruvicha Jesucristo árape.  Ñandejára ijeroviaha, ha haʼe pendeporavo pemoirũ hag̃ua Itaʼýra Jesucrístope, haʼéva ñande Ruvicha. 10  Koʼág̃a pomokyreʼỹ che ermanokuéra, ñande Ruvicha Jesucristo rérape, peñemoĩ hag̃ua peteĩ ñeʼẽme, ha ani oĩ joavy pende apytépe, ikatu hag̃uáicha peiko oñondivepa peteĩ ñeʼẽme ha pepensa hag̃ua peteĩchapa. 11  Che ermanokuéra, Cloe rogayguakuéra apytépe oĩ omombeʼúva chéve oĩha joavy pende apytépe. 12  La haʼeséva peẽme káda uno peẽ pejeha hína: “Che asegi Páblope”. “Che katu asegi Apólospe.” “Che asegi Céfaspe.” “Che asegi Crístope.” 13  Péicha Cristo kongregasión ojedividi. Páblope noñemosaingói yvyráre penderehehápe, ¿ajépa? ¿Térã piko peẽ pejevautisa* raʼe Pablo rérape? 14  Aagradese Ñandejárape ndavautisái haguére ni peteĩme pende apytépe, Crispo ha Gáyope añoite avautisa. 15  Ani hag̃ua avave heʼi peẽ pejevautisa hague che rérape. 16  Avautisa avei Estéfanas rogayguakuérape. Ha nachemanduʼái avautisápa raʼe ótrope. 17  Cristo nachemondói avautisa hag̃ua, síno aikuaauka hag̃ua umi marandu porã*. Che ndaikói añemoñeʼẽkuaa peẽme, ani hag̃ua opyta rei pe yvyra pohýi* Cristo oñemosaingo hague. 18  Pe marandu oñeʼẽva pe yvyra pohýire ningo vyrorei umi oñehundítavape g̃uarã, péro ñande jajesalvávape g̃uarã katu, upéva ohechauka Ñandejára podér. 19  Ñandejára Ñeʼẽme ojehai voi: “Ahundíta umi iñarandúva arandu, ha amboykéta umi mbaʼe opensáva umi iñakãporãva”. 20  ¿Ko múndope* piko moõ oĩ pe iñarandúva? ¿Ha pe mboʼehára leipegua*? ¿Moõ piko oĩ pe oñembovaléva? ¿Ndohechaukái piko Ñandejára vyroreiha pe arandu ko mundopegua? 21  Ko múndo iñarandúramo jepe, ndoikuaái Ñandejárape. Añetehápe oĩ heta opensáva vyroreiha umi marandu japredikáva, péro Ñandejára iñarandu rupi ojevale umívare osalva hag̃ua umi ogueroviávape. 22  Umi hudío ningo ojerure milágronte, umi griégo katu oheka arandu. 23  Péro ñande japredika Crístope oñemosaingo hague yvyráre, upéva omoñepysanga umi hudíope, ha umi tetã ambuegua katu oimoʼã vyroreiha. 24  Upéicharõ jepe, Ñandejára arandu ha ipodér ojehechauka Cristo rupive umi ojeporavóvape, tahaʼe hudío térã griégope. 25  Peteĩ vyrorei oiporúva Ñandejára, upéva iñaranduve hína kuimbaʼekuéragui, ha peteĩ mbaʼe ikangýva oiporúva Ñandejára, upéva imbareteve hína kuimbaʼekuéragui. 26  Che ermanokuéra, peẽ pehechakuaa pende kásope Ñandejára ndoiporavói hague heta iñarandúva yvyporakuérape g̃uarã, ndoiporavói avei heta ipoderósova ni heta oúva rreikuéra famíliagui. 27  Ñandejára oiporavo ko múndogui umi mbaʼe vyroreíva kuimbaʼekuérape g̃uarã, omotĩ hag̃ua umi iñarandúvape. Ha Ñandejára oiporavo avei ko múndogui umi mbaʼe ikangýva kuimbaʼekuérape g̃uarã, omotĩ hag̃ua umi imbaretévape. 28  Ñandejára oiporavo ko múndogui umi mbaʼe ndahaʼéiva mbaʼeve ha ojeapoʼíva. Haʼe oiporavo umi mbaʼe ndahaʼéiva mbaʼeve hentekuérape g̃uarã, ohundi hag̃ua umi mbaʼe iñimportánteva hentekuérape g̃uarã. 29  Ojapo upéicha ani hag̃ua ni peteĩ yvypóra oñembotuicha Ñandejára renondépe. 30  Ñandejára rupive peẽ pejoaju Cristo Jesús ndive. Haʼe ohechauka Ñandejára arandu ha ihustísia. Jesús rupive kuimbaʼekuéra ikatu imarangatu ha ojei pekádo poguýgui, haʼe omeʼẽgui hekove opaga* hag̃ua hesekuéra. 31  Péicha oiko Ñandejára Ñeʼẽ heʼíva: “Pe oñembotuicháva, toñembotuicha Jehová* rehe”.

Nóta

Ehecha “Apóstol”, diksionário oĩva ko Bíbliape.
Ehecha “Kongregasión”, diksionário oĩva ko Bíbliape.
Ehecha “Cristo”, diksionário oĩva ko Bíbliape.
Térã: “tohechauka peẽme mbaʼeporã ijojahaʼỹva”. Ehecha “Mbaʼeporã Ijojahaʼỹva”, diksionário oĩva ko Bíbliape.
Ehecha “Vautísmo”, diksionário oĩva ko Bíbliape.
Ehecha “Marandu Porã”, diksionário oĩva ko Bíbliape.
Ehecha “Yvyra Pohýi”, Informasión Oĩvéva 6-pe.
Ehecha “Múndo”, diksionário oĩva ko Bíbliape.
Ehecha “Mboʼehára Leipegua”, diksionário oĩva ko Bíbliape.
Térã: “orreskata”. Ehecha “Rreskáte”, diksionário oĩva ko Bíbliape.
Ehecha Informasión Oĩvéva 1.