Sheʼerujawalin tü muusakat waneepia tü soikat, eesü kamaʼale maʼin shia soʼu wanee kaʼi sünain aaʼinraa tia. Wuleechonsü maʼin waneepia tü soikat sutuma anashaatain maʼin sukumajia tü shiyeekat.

 Jülüjaa paaʼin tüü: Kaʼlesü maʼin shiyee wanee muusa, eesü 290 kasachein sünain otta ichekat maʼin maʼaka saaʼin süpatoʼu wanee wayuu. Epirajawaisü tia süka suwaa tü muusakat, shiasaʼa sheʼerujapa tü soikat süchüʼlajüin shia otta chüʼlüleesia tü sütakat.

 Soʼu wanee kaʼi eetaasü maʼaka saaʼin 48 mililitros suwaa tü muusakat süchüʼlajaka aka soi otta tü sütakat. Sünain tü suwaakat eesü wanee kasa wulekat atuma soi otta tü sütakat. Süka chüʼlüin shia sutuma tü suwaakat nnojoluitpa shia walatshin, anasü tia sümüin tü muusakat süka matüjain shia keraa.

 Shukuleraale maʼin soi tü muusakat eesü wanee kasachen sünain tü shiyeekat aaʼütaka shia sheʼerujapa otta anoutaa shia sutuma. Sükajee tü kasa eekat sünain tü shiyeekat, anasü saaʼin wanaa sümaa sheʼerujaain tü soikat jee shipettüin tü sütakat. Akumajünüsü wanee peine makat aka saaʼin shiyee tü muusakat natuma waneinnua wayuu. Tia peinekat mapüleesat oʼlojowaa otta mapüleesat epeinajaa süka tü walaashi eekai shukuleraain. Nashatüin na cientiificokana sukuwaʼipa shiyee tü muusakat süpüla nakumajüin kasa jalouijeetkat süpüla aʼwulejaa eere eein walaashi eekai shukuleraain.

 ¿Jamüsü saaʼin pümüin? ¿Aleinjatche sukuwaʼipa shiyee tü muusakat nukumajataapa shia Maleiwa?