NÜSHAJIRÜIN Maleiwa suluʼu hebreo, arameo jee griego tü Karaloʼuta Nüchikimaajatkat. Choʼujaasü süshajünüin suluʼu wainma anüikii tü Karaloʼuta Nüchikimaajatkat Maleiwa süpüla saapüinjatüin «wayuu maʼleekalia» tü Nünüikikat (Mateo 24:14). «Tü Pütchi Ashajuushikat suluʼu griego» münüsü tü piamakat shikii akaratshimüin karaloʼuta sünainjeekat Mateo sünainmüinreʼeya Apocalipsis, jama süshajünüin suluʼu griego natuma wayuu anoujashii, nüshajirüin tia Maleiwa soʼu nakalia na anoujashii namaiwajanakana.

Ojuʼitüsü suluʼu inglés soʼu 1950 tü palajatkat Biblia kanüliaka Namüinjatü na Wayuu Kepieenakana Suluʼu tü Mma Jeketükat. Tü Pütchi Ashajuushikat suluʼu griego. Ashatünüsü maʼin tia pütchikat sünainjee tü pütchi griego eʼraajünakat maʼin nüshajalaka Westcott nümaa Hort, pansaasü tia sümaa kojuyasü pütchi griego ashajünaka sümaiwa. Achajaana akuwaʼipat süpüla pansaainjatüin tü pütchi ashajünakat suluʼu tü Biblia kanüliakat Namüinjatü na Wayuu Kepieenakana Suluʼu tü Mma Jeketükat, pansaasü shia sümaa tü pütchi ashajünakat suluʼu griego. Bibliakat tüü ashajünakat wayuunaikiruʼu, ashatünüsü sünainjee tü Biblia suluʼukat inglés ojuʼitaka soʼu 2013 jee pansaasü shia sümaa tü pütchi ashajünakat suluʼu griego.

Eʼraajünüshi Maleiwa suluʼu Jehováin nünülia, 237 sukua süshajünüin tü nünüliakat suluʼu tü Biblia kanüliakat Namüinjatü na Wayuu Kepieenakana Suluʼu tü Mma Jeketükat. Tü Pütchi Ashajuushikat suluʼu griego. Saaʼujee choʼujaain kojutuin atumawaa Maleiwa jee choʼujaain shiʼraajüinjachin wayuu nia otta suchuntuin nünülia süpüla suʼttaainjatüin, eʼitaanüsü suluʼu Bibliakat tüü nünülia Jehová eejatüle shia ashajünüin sümaiwa paala (Mateo 6:9; Roma 10:13).

Namüinjatü na Wayuu Kepieenakana Suluʼu tü Mma Jeketükat, münüsü Bibliakat tüü süka saapaaushin sünainjee tü nümakat Maleiwa süchiki eejeerüin wanee mma jeketü aneetka atuma sukuwaʼipa wayuu süpüshuaʼa (2 Pedro 3:13). Aishi Maleiwa napüla na wayuu aʼyataakana sünain ashajaa tia pütchikat, jama niain kashajiralain tü Bibliakat, müsüjeseʼe kojutuin namüin pansaainjatüin süshajia tü jülüjakat naaʼin Maleiwa jee tü nuluwataakalü anain. Shia wachekaka achiki kojutuinjatüin maʼin Bibliakat tüü namüin na wayuu aashajeʼerakana shia, jama nayaawateein maʼin saaʼu «tü pütchi shiimainkat» (1 Timoteo 2:4).