¿KASA WATÜJAKA SÜNAINJEE TÜ KASA NUKUMALAKAT MALEIWA?

Eweeniraashii waya sümaa eein süpüla sümülialaain waaʼin naalin na waneinnua. Eesü süpüla wayaawatüin saaʼu jamüin naaʼin na waneinnua otta eeshii süpüla müin wayakai aaʼin alatüin amüin tü alatakat namüin. Naashin wanee tottoot ekirajaakai süchiki tü naaʼinrajatkat na wayuukana süpüla anainjatüin naaʼin, Rick Hanson nünülia, «amülialaasü waaʼin saalin wayuu süka aletüjülüin wakuwaʼipa».

JÜLÜJA PAAʼIN TÜÜ: Naata wakuwaʼipa suulia tü mürütkalüirua süka sümülialaain waaʼin saalin wayuu, jama nukumalain waya Maleiwa sünain müin aka saaʼin nukuwaʼipa (Génesis 1:26). Eesü süpüla washatüin nukuwaʼipa Maleiwa otta eein wanain tü akuwaʼipaa eekat nünain. Sümülialaale naaʼin wanee wayuu naalin wanee eekai müliain, nüshatüin nukuwaʼipa chi Kakumalakai waya, Jehová (Proverbios 14:31).

NÜTÜJAA AAʼU MALEIWA TÜ WAMÜLIALAKAT SAASHIN TÜ BIBLIAKAT

Süka sümülialaain naaʼin Maleiwa waaliijee, mojushiisü nümüin weʼrüin müliaa. Süküjain tü Bibliakat mojuin naaʼin Jehová saaliijee niʼrüin müliain na israelitakana wanaa sümaa achepchieein naya chaa Egipto jee suʼunnaa unatüin naya soʼu 40 juya chaa isashiipaʼa. Müsü tü Bibliakat nüchiki Jehová: «Suʼunnaa mojuin maʼin naaʼin nayakana, mojusia naaʼin Maleiwa saaliijee niʼrüin namüliala» (Isaías 63:9). Nnojotsü neʼe nütüjaain aaʼu Maleiwa tü namülialakat, mojusia naaʼin saaliijee niʼrüin namüliala. Müshi Jehová mapa: «Teʼrüin müliain maʼin na israelitakana» (Éxodo 3:7). Jee nümaka nachiki na müliakana atuma tü nupueulosekat: «Müshii nachüütakai saaʼin [toʼu] sükajee tü naaʼinrakat jümüin» (Zacarías 2:8). Sünainjee tia, wayaawata aaʼu müin saaʼinnakai aaʼin nümüin Jehová tü kasa mojusü aaʼinnakat wamüin.

Müleka mojule waaʼin saaliijee waainjala, soteesü waaʼin tü sümakat tü Bibliakat sünain «nülanaʼaleeinña chi Maleiwakai suulia tü waaʼinkat jee nütüjaa aaʼu kasa süpüshuaʼa» (1 Juan 3:19, 20). Niyaawataa aaʼu Jehová wakuwaʼipa, nütüjaa aaʼu jamüin waaʼin müliale waya atumawaa otta mojusü naaʼin saaliijee tü alatakat wamüin.

 Tü sümakat tü Bibliakat:

• «Puchuntüle kaaliiwaa nümüin, asouteechi nia pümüin. ‹Jalia maa taya› pümüle nümüin, ‹!Anii taya¡› meechi nia pümüin» (ISAÍAS 58:9).

• «Tatüjaa aaʼu tü taainjainjatkat jüpüleerua, nnojoleena jia müliain aaʼin. Taapeerü wanee anaa jümüin otta aneerü jukuwaʼipa tatuma watta kaʼi. Shiimainshaana juʼuraajeenain tamüin, tasouteechikalaka jiʼipajee» (JEREMÍAS 29:11, 12).

• «Piʼitaa taʼwüira suluʼu tü paaʼata akumajuushikat süpüla wiino. Ashajuushisü tia suluʼu pükaraloʼutse» (SALMO 56:8).

NIYAAWATAA AAʼU JEHOVÁ JAMÜIN WAAʼIN OTTA MOJUSÜ NAAʼIN SAALIIJEE TÜ ALATAKAT WAMÜIN

Eejiraajeena waya sümaa tü alatakat wamüin watüjaale saaʼu niʼrüin Maleiwa tü wamülialakat. Jülüja paaʼin tü alatakat sümüin wanee wayuu María sünülia.

«Piama juya müliain maʼin chi tachonkai süka kanserüin nia wanaa sümaa 18 nuuyase jee outushi nia mapa sutuma. ¿Jamüsüche sülataka tia wamüin? ¿Jamüshi nnojoika niiyajüin Jehová chi tachonkai? Jashichisü taya nümüin Jehová süka nuuʼulaain sülatüin tia wamüin.

»Maalinsat taya nüpüla Jehová, taaʼinruʼu. Aipirua juya süchikijee nünaajaain chi tachonkai, taküjain sümüin wanee tawala sünain anoujaa jamüin maʼin taaʼin. Kamaʼa maʼin saapajüin tanüiki sümaa nnojoluin susounnajaain shiʼipajee tü tamakat. Süchikijee tia, süsoʼirüin taaʼin sünain wanee pütchi antaka suluʼumüin taaʼin, shia tü sümakat 1 Juan 3:19, 20, eere sümüin: ‹Nülanaʼaleeinña chi Maleiwakai suulia tü waaʼinkat jee nütüjaa aaʼu kasa süpüshuaʼa›. Süküjain tamüin niyaawatüin saaʼu Jehová tü wamülialakat.

»Mayaapejeʼe süküjain tamüin tia, ayatüsü jashichin taya nümüin Jehová. Soʼu wanee kaʼi, taleejüin tü sümakat Salmo 94:19 eere sümüin: ‹Wanaa sümaa shapaain maʼin taaʼin, pümülialüin taya›. Shia taapeeka tia. Taküjain nümüin Jehová tü suluʼukat taaʼin otta tatüjaa aaʼu naapeerüin tanüiki, taküjain nümüin süpüshuaʼa tü müliakalü atuma taya jee anatsü taaʼin sutuma».

Talatüsü waaʼin sutuma niyaawatüin saaʼu Jehová jamüin waaʼin otta nütüjaa aaʼu wamüliala. Eepejeʼe wamüle: «¿Jamüsüche joutka maʼin müliaa? ¿Müliashiiche waya sutuma süsalain waya waainjala nutuma Maleiwa? ¿Najaʼttireetche Maleiwa tü müliaakat?». Watüjaajeerü aaʼu tia sünain tü wane pütchikalüirua.