Nukumajüin waya Maleiwa sümaa eein süpüla süshatüin walioʼu weewaale. Jamüshijaʼa niʼyonoojiraale wanee wayuu, seeshütuule jala nünain jee nütküüle. «Ashatüsü shiʼipaʼaya tü nülioʼukat jaʼitasü eʼikaain maʼin shia jee nnojorüle eʼikaain maʼin» (Johns Hopkins Medicine). Ashaʼwalaasü tü ishakat jee ashatüsü walioʼu sümüiwaʼa.

JÜLÜJA PAAʼIN TÜÜ: Nukumajüle waya Maleiwa sümaa eein süpüla süshatüin walioʼu weewaale, ¿iseetche nüchiki nüsünneʼerüin tü kasa mojukalü atuma waaʼin? Nütüjaa aaʼu chi salmistakai sünain eein süpüla nüsünneʼerüin Maleiwa tü kasa mojukalü atuma saaʼin wayuu (Salmo 147:3). Jamüsüjaʼa sülatüle pümüin wanee kasa mojusü sümaiwa palaa jee ayatayütkalia sotuin paaʼin, ¿jamüsü pütüjaaka saaʼu eein süpüla nüsünneʼerüin Maleiwa tü kasa mojukalü atuma paaʼin jee anain paaʼin waneepia?

¿KASA SÜKÜJAKA TÜ BIBLIAKAT SÜCHIKI WAALIN NÜPÜLA MALEIWA?

Müsü nünüiki Maleiwa wamüin: «Nnojo mmoluin pia, anii taya pümaa. Nnojo shapaain paaʼin, taya chi Pümaleiwasekai. Shiimain katsüinjeerüin paaʼin tatuma. Shiimainshaata maʼin takaalinjeechin pia. Ayateechi takaalinjain pia süka tü tajapü tekiakat» (Isaías 41:10). Anasü waaʼin wamaajiraa jee katchinsü waaʼin süpüla eejiraain waya sümaa tü kasa alatakat wamüin sükajee watüjaain saaʼu alin waya nüpüla Maleiwa. Müshi Pablo: «Jimateerü jaaʼin nutuma Maleiwa jee naaʼinmajeerü tü suluʼukat jaaʼin jee tü suluʼukat jikii». Otta müshi nia: «Katchinsü taaʼin süpüla taaʼinrüin kasa süpüshuaʼa, jama niain Maleiwa katchin atuma taaʼin» (Filipos 4:4-7, 9; Filipos 4:13).

Akatchinraasü wanoula sutuma tü sümakat tü Bibliakat süchiki tü kasa anasü naaʼinrajatkat Maleiwa süpüleerua wayuu. Süküjain Apocalipsis 21:4, 5 (aküjüneerü tü sümakat suluʼu süpana 15) kasainjatüin naaʼinrüin Maleiwa otta jamüsü eeka süpüla weʼitaain waaʼin sünain meerüin shia nutuma.

• «Meerü nülaʼajaakai saaʼin Maleiwa naʼwüira naya wayuukana». Najaʼttireerü Jehová süpüshuaʼa tü kasa müliakat jee shapaaka atuma waaʼin, mayaapejeʼe müin malaakai saaʼin neʼe tia namüin na waneinnua.

• «Chi joyotokoi saaʼu tü einasee süpülajatkalü aluwatawaa», chi pülashikai maʼin, chi Laülaakai saaʼu süpüshuaʼa tü kasakalüirua, najaʼttiraleejeeria tü müliaakat jee nnojoleena müliain waya piantua. Nükaalinjeena waya choʼujaapa wamüin akaalinjünaa.

• «Shiimain shia otta ayateeria shia ekeraajüin» müshi Jehová Chi Maleiwa shiimainshikai. Sükajee lotuin nukuwaʼipa jee matüjüin nia aküjaa alawaa, watüjaa aaʼu nikeraajeerüin süpüshuaʼa tü kasa nüküjakalü achiki.

«Meerü nülaʼajaakai saaʼin Maleiwa naʼwüira naya wayuukana, nnojoleerü outaa, nnojoleerü mojuu aaʼin, nnojoleerü aʼyalajaa jee nnojoleerü saalin wanee kasa. Alatüitpa tü kasa müliapuʼukalü atuma waaʼin». «Jeketüitpa tatuma sukuwaʼipa kasa süpüshuaʼa», müshi tamüin chi joyotokoi saaʼu tü einasee süpülajatkalü aluwatawaa. «Anashi püshajüle tia pütchikat, jama shiimain shia otta ayateeria shia ekeraajüin» müshi niaya» (Apocalipsis 21:4, 5).

Weʼraajüin nukuwaʼipa chi Washi iipünaajachikai sünainjee tü kasa nukumalakat jee sükajee tü sümakat tü Bibliakat. Sünainjee weʼrüin tü kasa nukumalakat Maleiwa aleeweeshii maʼin waya nümaa otta müsü tü Bibliakat wamüin: «jürütkaa nünainmüin Maleiwa, nürütkaajeechika jünainmüin» (Santiago 4:8). Otta müsü sünüiki Aluwataaushikana 17:27: «Nnojoishi wattain [Maleiwa] woulia».

Püchajaale maʼin sukuwaʼipa süpüla piʼraajüin maʼin nukuwaʼipa Maleiwa, pütüjaajeerü aaʼu kapülain naaʼin pukuwaʼipa (1 Pedro 5:7). ¿Kasa anasü weʼreetka weʼitaale maʼin waaʼin nünain Maleiwa?

Jülüja waaʼin tü alatakat nümüin Toru, wanee wayuu chejeʼewai Japón. Mayaapejeʼe shikirajüin nia tü niikat sünain tü Bibliakat jintüliiwaʼaya nia, saʼakashi nia wanee wayuuirua kamaʼürannuu, yakuza münüshii. Müshi Toru: «Jülüjasü taaʼin nüʼürülain taya Maleiwa, shiasaʼa teʼrüle outuin wayuu jee nayale outuin na aikana tapüla ‹shiajaʼa sünainjee süsalain taya taainjala nutuma Maleiwa›, maʼwaishi taya». Sükajee saʼakain Toru wayuu oʼututka saaʼin wayuu, kashüülasü maʼin nukuwaʼipa naashin sükajee müliain maʼin wayuu nutuma jee maapüinsai nia jamületshi sümüin. Naashin niakai, keeʼireesü maʼin naaʼin outuinjachin  sümaa jintülin nia jee niʼnnaajünüinjachin maʼin sutuma wayuu sünainjee nuʼutuin naaʼin wanee jashichireekai nuulia.

Shiasaʼa mapa, nikirajaapa Toru otta tü nuʼwayuusekat sünain tü Bibliakat, nunouteʼerüin nukuwaʼipa jee anaitpa niyolojo. Anuu tü sümakat Hannah, tü nuʼwayuusekat: «Ponusü maʼin taaʼin tü naaʼinrakat chi taʼwayuusekai süpüla niiʼiratüin nukuwaʼipa». Müshi Toru: «Maaʼulu yaa, tatüjaaitpa aaʼu eein chi Maleiwakai jee kapülain naaʼin wakuwaʼipa waneʼewai wakua. Nnojotsü keeʼireein naaʼin Maleiwa outuin wayuu otta motusü naaʼin naainjala chi wayuu ayaawajaakai suulia naainjala. Eesü süpüla waküjain nümüin Maleiwa tü kasa nnojotkat süpüla waküjain sümüin wayuu, süka niain neʼe niakai ayaawatüin saaʼu. Najaʼttireerü Maleiwa tü kasa müliakalü atuma waya, jaʼitakajaʼa neʼe maaʼutpünaa, wainma kasa nükaaliinjaka akajee waya. Kapülasü naaʼin wakuwaʼipa jee nükaalinjain waya wanaa sümaa mojuin waaʼin» (Salmos 136:23).

Maʼaka naaʼin Toru, kaʼatapalasü waaʼin jee aneerü maʼin wakuwaʼipa watüjaale saaʼu eein süpüla najaʼttirüin Maleiwa tü kasa müliakat maʼin atuma waaʼin. Mayaapejeʼe wainmain kasa mojusü eeka saaʼu tü Mmakat jee müliaka maʼin atuma waaʼin eesü süpüla anain wakuwaʼipa sükajee alin waya nüpüla Maleiwa.