¿Nuuʼuleʼereetche Maleiwa mapa tü ouktaakat? Jamüsüsaʼa shia. Nia pülaleekaʼaya Maleiwa suulia kasa eekai eein. (1 Corinto 15:24-26; Éxodo 6:3.) Müiria nnojoluin ouktaa süka nüsoʼireʼerüinjatüin saaʼin Maleiwa tü ouktüsükalüirua. Naainjeerü tia Paʼaraiisüpa tü mmakat. * ¿Jamüshii wanoujainjanaka sünain tia? Süka nüküjüin shia Jesuu, chi Nüchonkai Maleiwa. (Paashajeʼera Mateo 22:31, 32.)

Anuu nünüiki Jesuu namüin na saduceokana: «Jia manoujainsaliikana sünain susoʼiraainjatüin saaʼin wayuu, soto jaaʼin tü nümakat chi Maleiwakai namüin na jutuushinuukana ashajünakat paala sünain maa: ‹Tayakai, Nümaleiwasekai Abraham, Nümaleiwasekai Isaac, Nümaleiwasekai Jacob›, müshi. Tamüshii paala jia: Chi Maleiwakai, nnojoishi Sümaleiwasein wayuu ouktüsü. Sümaleiwase eekai katüin soʼu». Shia nüküjaka Jesuu tü nümakat Jeʼwaa nümüin Moisés soʼu juyaka 1514 süpülapünaa wakalia. Tia shia wanaa sümaa yootuin Maleiwakai nümaa Moisés sükajee suuʼulia wanee wunuʼu chuwatüsü (Éxodo 3:1-6). Naashin Jesuu, shiimain nüsoʼireʼerüinjatüin Maleiwakai naaʼin na ouktüshiikana, mülejeʼe nümüin: «Tayakai, Nümaleiwasekai Abraham, Nümaleiwasekai Isaac, Nümaleiwasekai Jacob».

Müsüjaʼa nünüiki Jeʼwaa nümüin Moisés süka nütüjaain saaʼu nüsoʼireʼerüinjatüin naaʼin Abraham, Isaac otta Jacob, mayaainjeʼe kakaliainnain naya anaajaain. «Tayakai, Nümaleiwasepuʼukai», müsüjee nünüiki Jeʼwaa müleka isalejeʼe nüchiki nüsoʼireʼerüinjatüin naaʼin naya makana.

Naashin Jesuu, «chi Maleiwakai, nnojoishi Sümaleiwasein wayuu ouktüsü. Sümaleiwase eekai katüin soʼu». Müleka nnojoluinjatüle nüsoʼireʼerüin Jeʼwaa naaʼin Abraham, Isaac otta Jacob, niashije neʼe Sümaleiwasekai wayuu ouktüsü. Nnojoishijeʼe niain pülashin suulia kasa süpüshuaʼa. Isasüjeʼe neʼe nüchiki nüsoʼireʼerüin saaʼin wayuu.

Nüküjüin Jesuu katüin noʼu nümüin Maleiwa Abraham, Isaac, Jacob otta napüshuaʼa na anaajaakana sümaa waneepiain naya nümaa (Lucas 20:38). Shiimain nüsoʼireʼerüinjatüin Jeʼwaa naaʼin na aʼyataapuʼukana nümüin, müshiijeseʼe müin katakai noʼu naya wayuukana nümüin (Roma 4:16, 17). Nnojoishii naya motuin naaʼin, nüsoʼireʼereerü naaʼin süntapa joo sükalia süpüla naainjüinjatüin tia.

Nia pülaleekaʼaya Jeʼwaa suulia kasa eekai eein

Süsoʼiraapa saaʼin wayuu nutuma Maleiwa, ¿aashin piʼreein nachikuaʼa na püpüshikana? Soto paaʼin niain pülaleekaʼaya Jeʼwaa suulia kasa eekai eein. Nnojoishi jaralinjachin aawalüin Maleiwa suulia tü naainjüinjatkat. ¿Pücheküin pikirajaain sooʼomüin süchiki süsoʼiraainjatüin saaʼin wayuu eekai ouktüin? ¿Pikirajawee anainrü tü nukuwaʼipakat Maleiwa? Paainjüle tia, arütkaajeechi pia nünainmüin chi Sümaleiwasekai wayuu eekai katüin soʼu.

PÜTCHI AASHAJEʼENNAJATKA:

Mateo 22-28 sünainmüin Marcos 1-8

^ par. 3 Pikirajaa sooʼomüin suluʼu tü karalouktakat ¿Kasa shikirajaka maʼin tü Wiwüliakat?, kapiitulo 7. Nakumajala na aküjüliikana pütchi nüchiki Jeʼwaa.