¿Shiimainchejeʼe nüsoʼireʼerüin saaʼin Jesuu tü ouktüsükalüirua?

Pienchitchi kaʼi Lázaro sünain ouktaa wanaa sümaa süsoʼireʼennüin naaʼin nutuma Jesuu

Süküjüin tü Wiwüliakat nüsoʼireʼerüin aaʼin Jesuu waneeinnua wayuu. Nnojotpejeʼe aküjalaain neʼe tia. Süküjüin tü Wiwüliakat jalajatüin alatüin shia jee joujatüin shia. Jamüsüjaʼa soʼu juyaka 31, oʼunüshi Jesuu suluʼumüin tü pueulokot Naín sümaa watta saalii wayuu. Nüntapa chamüin, eejana nüpüla wainma wayuu, chainjana ojoitüin naamaka. Niasaʼa Jesuu, nüsoʼireʼerüin naaʼin naamaka naya wayuukana. Shiimainya tia süka süküjüin shia tü Wiwüliakat otta suʼupalajatü shia wainma wayuu. ( Paashajeʼera Lucas 7:11-15.)

Mapa süchikijee tia, eeshi wanee wayuu asoʼireʼennaka aaʼin nutuma Jesuu, Lázaro nünülia, pienchitchi kaʼi nia sünain ouktaa. Shiimain tia süka eejatüin wainma wayuu eʼraka tü alatakat. ( Paashajeʼera Juan 11:39-45.)

¿Jamüsü nüsoʼireʼeraka naaʼin na ouktüshiikana?

Naainjüin Jesuu tia süka sümülialaain naaʼin naalii na ouktüshiikana. Naainjüinya tia süpüla niiʼiyatüin sünain niain chi Maleiwakai akaaliinjaka nia süpüla nüsoʼireʼerüin saaʼin wayuu. ( Paashajeʼera Juan 5:​21, 28, 29.)

Akaʼaya tiaya, shiiʼiyatüin wamüin sünain shikeraajeerüin süpüshuaʼa tü kasa nüküjakat wamüin. Wainmeerü maʼin wayuu nüsoʼireʼeraka aaʼin Jesuu. Jaʼitainna na nnojoliikana eʼraajüin Maleiwa, asoʼiraajeerü naaʼin süpüla neʼraajüinjachin jee alinjachin nia napüla. ( Paashajeʼera Aluwataaushikana 24:15.)