«Aʼwaajüneechi chi Tashikai sünainjee ayatüin jia sünain aaʼinraa kasa anasü otta jiiʼiyatüin sünain tekirajanain jia» (JUAN 15:8, TNM).

JAYEECHI: 53, 60

1, 2. (1) ¿Kasa nüküjaka Jesuu namüin na nikirajüinkana wanee ai süpülapünaa nuʼutunuin aaʼin? (Piirakaa sümüin tü ayaakuaakat). (2) ¿Jamüsü choʼujaaka maʼin watüjaain saaʼu tia nümakat Jesuu? (3) ¿Kasa wekirajaajeetka anain?

WANEE ai süpülapünaa nuʼutunuin aaʼin Jesuu, yootushi maʼin nia namaa na aluwataaushiikana. Nüküjain namüin alin maʼin naya nüpüla. Jee müsia, nüküjain namüin müin nia maʼaka saaʼin tü suuʼuliakat uuwa. Wekirajaa anainrü tia sünain tü palajatkat ekirajaaya. Sükajee tia, nütütüleʼereein naaʼin na nikirajüinkana süpüla ayatüin naya sünain aküjaa süchiki Nuluwataaya Maleiwa (Juan 15:8, TNM).

2 Nnojotpejeʼe shiain neʼe nüküjain Jesuu namüin na nikirajüinkana tü naaʼinrajatkat, nüküjaleein namüin jamüin naaʼinrajatkat tia. Nüküjain namüin jamüin ayatüinjanaka naya sünain aküjaa pütchi. ¿Jamüsü choʼujaaka maʼin watüjaain saaʼu tia nümakat Jesuu? Shia süka sütütülaajeerüin waaʼin süpüla wachecheraain süchiirua aküjaa pütchi «sainküin mmakat süpüshua süpüla saapünüinjatüin sütüma wayuu süpüshua» (Mat. 24:13, 14). Sünain ekirajaayakat tüü, wekirajaajeerü anain pienchisü kasa ayatüinjanaka  anainjee waya sünain aküjaa pütchi saashin tü Wiwüliakat. Jee wekirajaajeerü anain pienchisü kasa naapaka wamüin Jeʼwaa süpüla wachecheraainjanain süchiirua aküjaa pütchi.

WAʼWAAJÜIN JEʼWAA

3. (1) ¿Kasa waküjaka maʼin anainjee pütchi saashin Juan 15:8? (2) ¿Kasa wayu tü uuwa naashajaakalü achiki Jesuu? ¿Jamüsü pansaaka maʼin tia nümakat?

3 Tü waküjakat maʼin anainjee pütchi shia süpüla waʼwaajüin Jeʼwaa otta kojutuin tü nünüliakat atumawaa (paashajeʼera Juan 15:1, 8, TNM). Wanaa sümaa naashajaain Jesuu süchiki tü suuʼuliakat uuwa, nüküjain müin Jeʼwaa maʼaka naaʼin chi apünajakai shia. Jee müshia niakai müshi aka saaʼin tü suuʼuliakat uuwa otta na nikirajüinkana maʼaka saaʼin tü sütünakalüirua (Juan 15:5, TNM). Sünain tia nümakat Jesuu, tü uuwakat shia tü naʼyataainkat na nikirajüinkana sünain aküjaa tü pütchi anasükat. Anuu nünüiki Jesuu namüin: «Aʼwaajüneechi chi Tashikai sünainjee ayatüin jia sünain aaʼinraa kasa anasü». Anale watuma süküjia tü pütchi süchikikat Nuluwataaya Maleiwa, waʼwaajüin nia sükajee tia. Müshi aka naaʼin chi apünajüi aʼwaajünakai saaʼu anain maʼin süchon tü uuwa nüpünajakat (Mat. 25:20-23).

Anale watuma süküjia tü pütchi süchikikat Nuluwataaya Maleiwa, waʼwaajüin nia sükajee tia

4. (1) ¿Kasa waaʼinrajatka süpüla kojutuin watuma nünülia Maleiwa? (2) ¿Jamüsü paaʼin sutuma eein süpüla kojutuin putuma nünülia Maleiwa?

4 Kojutushaatasü maʼin nünülia Maleiwa. ¿Jamüsü süpüla kojutuinjatüin shia sükajee waküjain pütchi? Jülüja paaʼin tü nümakat Isaías, müshi nia: «Jeʼwaa, chi wainmakai asurulaatse... Nia kojutuinjachikai jutuma» (Isa. 8:13). Wanee sukuwaʼipa süpüla kojutuinjatüin watuma tü nünüliakat Jeʼwaa shia sülanaʼleere sujutü wamüin suulia waneirua anüliee otta wekirajüle wayuu süpüla shiyaawatüinjatüin saaʼu kojutuin maʼin tü nünüliakat (Mat. 6:9, TNM, noota). Jamüshiijaʼa waküjale sümüin wayuu sünain anashaatain maʼin tü nukuwaʼipakat Jeʼwaa otta süchiki tü kasa naaʼinrajatkat süpüleerua wayuu, wakaaliinjeena naya süpüla natüjaainjatüin saaʼu alawaain süpüshuaʼa tü nümakat Satanaa nüchiki Jeʼwaa (Gén. 3:1-5). Wanee sukuwaʼipa süpüla kojutuin watuma tü nünüliakat Jeʼwaa shia sükajee waküjain sümüin wayuu niain waʼwaajüinjachin neʼe Jeʼwaa (Alat. Map. 4:11). Eeshi wanee wawala Rune nünülia, alatüirü 16 juya sünain pürekutsoolüin nia, müshi nia: «Talatüshi maʼin taya saaʼu nüneeküin taya chi Kakumalakai kasa süpüshuaʼa süpüla taküjalin pütchi nüchiki. Sütütüleʼerüin maʼin taaʼin tia süpüla ayatüin taküjain pütchi».

AISHI WAPÜLA JEʼWAA NÜMAA CHI NÜCHONKAI

5. (1) ¿Jamüshii waküjainjanaka pütchi saashin Juan 15:9, 10? (2) ¿Kasa naaʼinraka Jesuu süpüla natüjaain saaʼu na nikirajüinkana sünain choʼujaain maʼin nachecherüinjatüin naaʼin?

5 (Paashajeʼera Juan 15:9, 10, TNM). Tü wanee kasa waküjakalü anainjee pütchi shia süka aishaatain wapüla Jeʼwaa nümaa Jesuu (Mar. 12:30; Juan 14:15). Nüküjain Jesuu namüin na nikirajüinkana ayatüinjanain alin naya nüpüla. ¿Jamüsü nüküjaka tia namüin? Shia süka nütüjaain aaʼu choʼujaain namüin na nikirajüinkana nachecherüinjatüin naaʼin süpüla ayatüinjatüin naaʼinrüin waneepia tü nikirajakalü anain naya. Müsüjeseʼe kojuyatuain nuchuntuin Jesuu tü pütchikat ayataʼaya suluʼu Juan 15:4-10, TNM.

6. ¿Kasa waaʼinrüinjatka keeʼireere waaʼin alinjanain waya waneepia nüpüla Jesuu?

 6 ¿Kasa waaʼinrüinjatka keeʼireere waaʼin alinjanain waya waneepia nüpüla Jesuu otta talatüin nia wamaa? Oonooinjana waya sümaa tü nuluwataakalü anain waya. Tü nuluwataakalü anain waya Jesuu shia wanee kasa niʼitaaka ekii wapüleerua. Anuujeseʼe nünüiki: «Maʼaka taainjain tü nuluwataakalü anain taya chi Tashikai otta ayatüin alin taya nüpüla». Niʼitaain Jesuu wapüleerua tü waaʼinrajatkat (Juan 13:15).

7. ¿Jamüshi aika wapüla wanee wayuu woonoole sümaa nünüiki?

7 Naashin Jesuu, woonoole sümaa nünüiki wanee wayuu weeʼiyatüin alin nia wapüla. Müshijeseʼe nümüin namüin na aluwataaushiikana: «Chi eekai noonooin sümaa tü taluwataakat anain nia, niaʼaya aika apüla taya» (Juan 14:21). Tü nuluwataakalü anain waya Jesuu, nümaʼanajeejatü Jeʼwaa, müshiijeseʼe weeʼiyatüin alin wapüla Jeʼwaa wanaa sümaa waküjain pütchi maʼaka nümüin Jesuu (Mat. 17:5; Juan 8:28). Aire wapüla Jeʼwaa otta Jesuu, ayateena alin waya napülaya.

WAAPIRÜIN NA WAYUUKANA

8, 9. (1) ¿Jarat tü wanee kasa waküjakalü anainjee pütchi? (2) ¿Jamüsü sütütüleʼeraka waaʼin süpüla ayatüin waya sünain aküjaa pütchi tü sümakat Ezequiel 3:18, 19 otta 18:23?

8 Tü apünüinkat kasa waküjaka anainjee pütchi shia süka keeʼireein waaʼin waapirüin wayuu süchiki sülüʼülüin maʼin nükalia Jeʼwaa. Saashin tü Wiwüliakat, aküjai Noé pütchi süchiki kasa lotusü (paashajeʼera 2 Pedro 2:5, TNM). Süpülapünaa süntüin tü Juya miyoʼukat naapirüin Noé na wayuukana süchiki sajaʼttinnajatüin tü kasakalüirua. ¿Jamüsü watüjaka saaʼu tia? Watüja aaʼu tia sutuma tü nümakat Jesuu: «Jamüshiijaʼa na wayuukana süpülapünaa tü Juya miyoʼukat, kapülasü neʼe naaʼin ekawaa, asawaa otta na tooloyuukana shia neʼe jülüjaka naaʼin kaʼwayuusee otta tü jieyuukalüirua aapünüsü süpüla kaʼwayuusee. Nnojoishii naya oonooin sümaa tü aapinnakalü anain naya. Nikeroloka Noé suluʼu tü anuwakat, shiʼitaka tü juyakat sünain kaʼüliain maʼin shia otta wüinsitkalaka na wayuukana. Akaweeria takalioʼu tayakai, chi Shipayakai Wayuu» (Mat. 24:38, 39, TNM). Mayaapejeʼe nnojoluin noonooin na wayuukana sümaa tü naapirakalü anain naya Noé, ayatüshi nia aküjain pütchi süchiki tü kasa alatajatkat.

9 Maaʼulu yaa, aküjashii waya pütchi süchiki Nuluwataaya Maleiwa süpüla natüjaainjatüin aaʼu na wayuukana tü naaʼinrajatkat Maleiwa süpüleerua wayuu. Sutuma wanaawain waaʼin nümaa Jeʼwaa, keeʼireesü waaʼin saapüinjatüin wayuu tia pütchikat otta nnojoluinjatüin amülouilin shia (Ezeq. 18:23). Wanaa sümaa waküjain pütchi sainküin piichi otta eere jouluin  wayuu, watta maʼin naalii na wayuu waküjakana amüin süntajatüin Nuluwataaya Maleiwa süpüla sajaʼttirüin süpüshuaʼa tü kasa mojusü eekat yaa Mmapaʼa (Ezeq. 3:18, 19; Dan. 2:44; Alat. Map. 14:6, 7).

AISHII WAPÜLA NA WAYUUKANA

10. (1) ¿Kasa maa waküjaka anainjee pütchi saashin Mateo 22:39? (2) Püküja süchiki tü naaʼinraka Pablo otta Silas süpüla nakaaliinjain chi kaatsetpüʼükai.

10 Tü pienchikat kasa waküjaka anainjee pütchi shia süka alin wapüla wayuu (Mat. 22:39). Watüjaa aaʼu eein süpüla suʼwanajaain sukuwaʼipa wayuu sutuma wanee kasa eekai sülatüin sümüin. Jülüjataa waaʼin tü alatakat nümüin Pablo otta Silas chaa Filipos. Apüreesajinnüshii naya natuma na ayoutakana tü pütchi naküjakat. Shiasaʼa süseʼeruʼu aika, akutkujaasü tü mmakat sümaa sujutajaain tü soʼukalüirua tü püreesapüleekat sutuma. Isajayaashii na püreesashiikana naaʼinruʼu chi kaatsetpüʼükai, «niyuutakalaka nüchajaruutse süpüla nuʼuniraainjachin naaʼin». Nuʼwaataka Pablo nümüin sünain maa: «¡Nnojo puʼuniraain paaʼin!». Nümakalaka chi kaatsetpüʼükai namüin sümaa shapaain maʼin naaʼin: «¿Kasa anaka süpüla taaʼinrüin süpüla toʼttaainjachin?». Asoutushii naya nümüin: «Pünouja nünain chi Senyotkai Jesús puʼtteʼennaiwa» (Aluw. 16:25-34).

Aküjashii waya pütchi süka alin wapüla Jeʼwaa, Jesuu otta na wayuukana. (Paashajeʼera tü pütchikat 5 otta 10).

11, 12. (1) ¿Kasa watüjaka sünainjee tü alatakat nümüin chi kaatsetpüʼükai waküjapa pütchi? (2) ¿Jamüshii ayateeka waya sünain aküjaa pütchi?

11 ¿Kasa watüjaka sünainjee tü alatakat nümüin chi kaatsetpüʼükai waküjapa pütchi? Jülüja waaʼin nuchuntuin kaaliinwaa chi kaatsetpüʼükai süchikijee sukutkujaain tü mmakat. Maʼaka naaʼin chi kaatsetpüʼükai eesüjaʼa süpüla neeʼiratüin nakuwaʼipa na wayuu nnojoliikana kasajanain amüin tü sümakat tü Wiwüliakat. Otta eeshiijaʼa nachuntüle kaaliinwaa mapa süka sülatüin namüin wanee kasa. Eeshii na mojukana maʼin aaʼin sutuma nojutunüin suluʼujee naʼyataain, sutuma nooʼulaajiraain sümaa naʼwayuuse, süntünüle nanain wanee ayuulii eeka mepin jee outule wanee napüshi. Sülatapa tia namüin eeshii na asakirakana sünain kasapülajatüin katüin noʼu. Otta eesüjaʼa nasakirüle sünain tü nüsakirakalü anain chi kaatsetpüʼükai soʼu nümüin: «¿Kasa anaka süpüla taaʼinrüin süpüla toʼttaainjachin?». Jamüshiijaʼa wanaale naya wamaa sünain aküjaa pütchi, eesü naapajeerüle tü pütchi anasü waküjakat namüin.

12 Müleka ayatüle waya sünain aküjaa pütchi, wamülialeerü naaʼin na wayuukana sükajee tü kasa waapakat namüin (Isa. 61:1). Eesü wanee wawala Charlotte sünülia, 38 juya shia sünain pürekutsoolüin, anuu sünüiki: «Nnojotsü natüjaain aaʼu na wayuukana tü nakuwaʼipainjatkat. Choʼujaasü namüin naapajüinjatüin tü pütchi waküjakat». Eesü wanee wawala Ejvor sünülia, 34 juya shia sünain pürekutsoolüü. Müsü shia: «Maaʼulu yaa watta maʼin naalii na wayuu mojukana maʼin aaʼin. Shiasaʼa sutuma takaaliinjeein naya, aküjasü taya pütchi». Ayatüinjana waya aküjain pütchi saaʼu alin wapüla wayuu.

TÜ NAAPAKAT JEʼWAA WAMÜIN SÜPÜLA WACHECHERÜIN WAAʼIN

13, 14. (1) ¿Kasa naapaka Jeʼwaa wamüin saashin Juan 15:11? (2) ¿Kasa waaʼinrajatka süpüla talatüin waaʼin maʼaka naaʼin Jesuu? (3) ¿Kasa ayateetka waaʼinrüin talatüle waaʼin?

13 Wanee ai süpülapünaa nuʼutunuin aaʼin Jesuu, nüküjain namüin na aluwataaushiikana süchiki waneirua kasa naapaka Jeʼwaa namüin süpüla nachecheraainjanain süchiirua aküjaa pütchi. ¿Kasa wayu tia? ¿Jamüshii anaka waya sutuma?

14 Tü talataakalü aaʼin. ¿Nnojoleetche talatüin waaʼin sünain aaʼinraa tü nuluwataakalü anain waya Jesuu, tü aküjaakat pütchi? Nnojorüleejaʼa. Süchikijee naashajaain Jesuu  süchiki tü suuʼuliakat uuwa, nüküjain talateerüin waaʼin maʼaka naaʼin niakai waküjale pütchi süchiki Nuluwataaya Maleiwa (paashajeʼera Juan 15:11). Soto waaʼin müin nia naashin maʼaka saaʼin tü suuʼuliakat uuwa otta na nikirajüinkana maʼaka saaʼin tü sütünakalüirua. Wüiteerü sütüna tü suuʼuliakat uuwa müleka ayatüle shia sünain otta saapaajeerü sütsüin sünainjee tü suuʼuliakat. Akaataajaʼa neʼe wakuwaʼipaya, talateerü waaʼin maʼaka naaʼin Jesuu wanaawale waaʼin nümaa otta woushikajaale süchiirua nukuwaʼipa. Jee talateerü waaʼin maʼaka naaʼin Jesuu sutuma aaʼinraa tü nuluwataakalü anain Maleiwa (Juan 4:34; 17:13; 1 Ped. 2:21). Eesü wanee wawala Hanne sünülia, alatüirü suulia 40 juya sünain pürekutsoolüin shia. Müsü sünüiki: «Aleʼejawaisü taya sümaa talatüin taaʼin süchikijee aküjaa pütchi, shiasaʼa sutuma tia, atütülaasü taaʼin süpüla ayatüin taʼyataain nümüin Jeʼwaa». Talatüle maʼin waaʼin, ayateena waya waneepia sünain aküjaa pütchi jaʼitairü nnojoluin wainmain na wayuu aapajakana wanüiki (Mat. 5:10-12).

15. (1) ¿Kasa aapünaka wamüin saashin Juan 14:27? (2) ¿Kasa ayateetka waaʼinrüin sutuma tü anaa naapakat wamüin Jesuu?

15 Wanee anaa (paashajeʼera Juan 14:27). Wanee ai süpülapünaa outuin Jesuu, müshi nia namüin na aluwataaushiikana: «Aapüneerü jooluʼu wane anaa jümüin. Je chi aapüinjachikai shia jümüin, taya tayakai». ¿Kasa ayateetka waaʼinrüin sutuma tü anaa naapakat wamüin Jesuu? Wanaa sümaa wachecheraain süchiirua aküjaa pütchi, watüjaa aaʼu talatüin wamaa Jeʼwaa otta Jesuu. Shiasaʼa sutuma tia, anasü waaʼin waneepia (Sal. 149:4; Roma 5:3, 4; Col. 3:15). Eeshi wanee wawala Ulf nünülia, 45 juya sünain pürekutsoolin nia, anuu nünüiki: «Mapüsashi taya süchikijee aküjaa pütchi, talatapejeʼe taaʼin sutuma taaʼinrüin tia otta anasü taaʼin sutuma». Talatüsü maʼin waaʼin sutuma tü anaa aapünakat wamüin.

16. (1) ¿Kasa aapünaka wamüin saashin Juan 15:15? (2) ¿Kasa naaʼinrüinjatka na aluwataaushiikana süpüla ayatüinjanain aleewain naya nümaa Jesuu?

16 Aleewaa nümaa Jesuu. Süchikijee nüküjain Jesuu namüin na nikirajüinkana keeʼireein naaʼin talatüinjatüin naaʼin, nüküjain namüin choʼujaain aijiraainjanain maʼin naya (Juan 15:11-13). Nümaka süchikijee. «‹Tatünajut› tamüshi jia». Anashaatasü maʼin tü aleewaakat nümaa Jesuu. ¿Kasaka naaʼinrüinjatüin na aluwataaushiikana süpüla ayatüinjanain aleewain naya nümaa Jesuu? Achecheraainjana süchiirua aküjaa pütchi (paashajeʼera Juan 15:14-16). Maʼaka piama juya süpülapünaa tia müshi Jesuu namüin: «‹Alüʼütsü nükalia chi Maleiwakai süpüla aluwatawaa›, meena jia» (Mat. 10:7). Soʼu tü ai naashajaakalü oʼu Jesuu namaa na nikirajüinkana, nütütüleʼerüin  naaʼin süpüla nachecheraainjanain süchiirua aküjaa pütchi (Mat. 24:13; Mar. 3:14). Nütüjaa aaʼu Jesuu kapüleein aaʼinraa tia, mayaapejeʼe müin shia, eesü süpüla nountüin na nikirajüinkana naaʼinrüin tia otta ayatüin naya aleewain nümaa. Eepejeʼe wanee kasa naapaka Jeʼwaa namüin akaaliinjaka naya.

17, 18. (1) ¿Kasa aapünaka wamüin saashin Juan 15:7? (2) ¿Jamüsü naaʼin na nikirajüinkana Jesuu sutuma tia? (3) ¿Kasa nükaaliinjaka aka waya Jeʼwaa maaʼulu?

17 Naapüin Jeʼwaa wanüiki woʼuraajapa. Anuu nünüiki Jesuu: «Naaʼinreerü chi Tashikai jümüin süpüshua tü juchuntakat nümüin saaʼu tapüshin jia» (Juan 15:7, 16). Atütülaakajasaʼa naaʼin na aluwataaushiikana sutuma tia nümakat Jesuu. * Nnojotsü nayaawatüin aaʼu na aluwataaushiikana nülüʼülüin Jesuu süpüla outaa soʼu tia. Nnojoliinjanapajaʼa naya makaaliijuuin, eeinjachi Jeʼwaa sünain asoutaa namüin nachuntapa kaaliinwaa süpüla aküjaa pütchi. Maʼaka jeʼra kaʼi süchikijee nuʼutunuin aaʼin Jesuu, achuntushii na nikirajüinkana nümüin Jeʼwaa süpüla meimmoluinjanain naya nutuma, naapaka Jeʼwaa namüin tü nachuntakat (Aluw. 4:29, 31).

Watüjaa aaʼu nükaaliinjeenain waya Jeʼwaa wachuntapa kaaliinwaa nümüin. (Paashajeʼera tü pütchikat 18).

18 Wachecheraale maaʼulu süchiirua aküjaa pütchi, ayateena waya aleewain nümaa Jesuu. Jee akaaliinjüneena waya nutuma Jeʼwaa wachuntapa kaaliinwaa nümüin eere wanee kasa kapüleeka atuma wamüin aküjaa pütchi (Filip. 4:13, TNM). Talatashaatashii maʼin waya saaʼu nusoutuin Jeʼwaa shiʼipajee tü wachuntakat nümüin otta saaʼu aleewain waya nümaa Jesuu. Sükaaliinjain waya tia süpüla ayatüinjanain wachecheraain süchiirua aküjaa pütchi (Sant. 1:17).

19. (1) ¿Jamüshii wachecheraaka süchiirua aküjaa pütchi? (2) ¿Kasa naapaka Jeʼwaa wamüin süpüla ayatüin waya sünain tü waʼyataainkat nümüin?

19 Wekirajaaitpa anain sünain ekirajaayakat tüü wachecheraain süchiirua aküjaa pütchi süpüla waʼwaajüin Jeʼwaa otta kojutuin tü nünüliakat atumawaa. Ayatüshii waya aküjain pütchi süka aishaatain wapüla Jeʼwaa nümaa Jesuu, süka keeʼireein waaʼin waapirüin wayuu jee süka alin wapüla wayuu. Tü wane kasa wekirajaaitpakalü anain shia süchiki tü naapakat Jeʼwaa wamüin: Tü talataakalü aaʼin, wanee anaa, aleewaa nümaa Jesuu otta naapüin Jeʼwaa wanüiki woʼuraajapa. Sutuma tia naapakat Jeʼwaa wamüin atütülaasü waaʼin süpüla ayatüin waaʼinrüin tü waʼyataainkat nümüin. Talatüshi maʼin Jeʼwaa sutuma niʼrüin wachecheraain süchiirua aaʼinraa kasa anasü.

^ püt. 17 Soʼu naashajaain Jesuu namaa na aluwataaushiikana, kojuyatua nüküjain namüin naaʼinreerüin Jeʼwaa napüleerua tü nachuntakat nümüin (Juan 14:13; 15:7, 16; 16:23).