«Tayakai Jeʼwaa, taya chi Pümaleiwasekai, Chi ekirajakai pia süpüla anainjatüin pukuwaʼipa» (IS. 48:17, TNM).

JAYEECHI: 117, 114

1, 2. (1) ¿Kasa kojutüka wamüin? (2) ¿Jarat tü pütchi kamalainkat pümüin suluʼujee tü Wiwüliakat?

WAYAKANA aküjüliikana pütchi, kojutüshaatasü wamüin tü Wiwüliakat. Sümülialüin waaʼin tü Wiwüliakat, kaʼatapalasü waaʼin sutuma jee anasü süpüla waapaain sümaa tü sümakat (Roma 15:4). Tü Wiwüliakat shia tü nünüikikat Maleiwa, nnojotsü shia sünüikin wayuu (1 Tes. 2:13).

2 Wapüshuaʼa wayakana, eesü tü pütchi kamalainkat wamüin suluʼujee tü Wiwüliakat. Eeshii na kamalainkana amüin tü sümakat Mateo, Marcos, Lucas otta Juan süka neʼraajüin tü nukuwaʼipakat Jeʼwaa sutuma nekirajaain nüchiki Jesuu (Juan 14:9). Eeshii na kamalainkana amüin tü sümakat Alateetkat Mapeena süka saashajaain süchiki tü alateetkat maalü (Alat. Map. 1:1). Eeshii na anakana aaʼin sutuma tü sümakat Salmos, eeshii na kamalainkana amüin tü sümakat Proverbios. Süpülajatü wayuu süpüshuaʼa tü Wiwüliakat.

3, 4. (1) ¿Kasa weeʼiyatüinjatka sutuma wainmain pütchi naapaka Jeʼwaa wamüin? (2) Püküja jaralüin kamüinjatüin tü karaloukta nakumajakat na aküjüliikana pütchi.

3 Kojutüshaatasü wamüin tü karalouktairua aapünakat wamüin süka sünainjeejatüin shia tü Wiwüliakat. Naapajala wamüin Jeʼwaa tü karalouktakat, tü poyeetokot, tü rewiisütakat jee müsia tü wanee karalouktakalüirua  (paashajeʼera «Pütchi pütüjaainjatka aaʼu»). Sükaaliinjain waya tia süpüla aleewain maʼin waya nümaa Maleiwa jee süpüla katsüinjatüin wanoula (Tito 2:2).

4 Wainma tü karaloukta akumajünakat napüla na aküjüliikana pütchi. Eesü tü akumajünakat napüla na jimaʼaliikana jee na majayünnüükana otta müsia napüla na kachoinkana. Wainma tü pütchi suluʼukat jw.org napülajatka na nnojoliikana aküjüliin pütchi nüchiki Jeʼwaa, wainma videoya. Nikeraajüin Jeʼwaa tü nünüikikat sünain naapüinjatüin sümüin wayuu süpüshuaʼa tü pütchi nümaʼanajeejatkat (Is. 25:6).

5. ¿Kasa talateetka atuma naaʼin Jeʼwaa wamaa?

5 Keeʼireesü waaʼin wayakana wapüshuaʼa süpütaainjatüin kaʼi wapüla süpüla waashajeʼerüin tü Wiwüliakat jee müsia tü wanee karalouktakalüirua. Eesü motsoʼole neʼe saashajeʼeria watuma wanee karaloukta, eesü tü eekai kamaʼain anain waya. Talateetpejeʼe naaʼin Jeʼwaa wamaa müleka wakatarüle kaʼi süpüla waashajeʼerüin tü Wiwüliakat otta tia karalouktakalüirua sümaa wekirajaain sünain (Éf. 5:15, 16, TNM). Eejüinjatpejeʼe waaʼin suulia wanee kasa, joʼu wekirajaai kasain wayuu tia.

6. ¿Kasa wayuu tü nnojoleetkat waashajeʼerüin atuma tü pütchi naapakat wamüin Jeʼwaa?

6 Waashajeʼerapa tü Wiwüliakat jee wanee karaloukta shiale, eejüinjatü waaʼin suulia wamüin: «Pütchikat tüü nnojotsü tamüinjatüin». ¿Kaseerü paainjaka nnojorüle sünainpünaain pukuwaʼipa wanee pütchi paashajeʼeraka suluʼujee tü Wiwüliakat? ¿Kaseerü paaʼinraka nnojorüle sünainpünaain pukuwaʼipa wanee pütchi paashajeʼeraka suluʼujee wanee karaloukta? ¿Paashajeʼereetche eera shia süka süpüshuaʼa paaʼin? ¿Nnojottaajeetpa shia jamajatüin pümüin? Nnojorüle paashajeʼerüin shia, amülouijeerü putuma wanee pütchi anashaateetka atuma pukuwaʼipa. ¿Kasa paaʼinrajatka suulia majüin pukuwaʼipa? Süpüshuaʼa tü pütchi aapünakat wamüin nümaʼanajeejatü shia Jeʼwaa. Müsü tü Wiwüliakat: «Tayakai Jeʼwaa, taya chi Pümaleiwasekai, Chi ekirajakai pia süpüla anainjatüin pukuwaʼipa» (Is. 48:17, TNM). Sünain ekirajaayakat tüü, aküjüneerü wamüin apünüinsü kasa waaʼinrajatka süpüla wekirajaain sünain tü Wiwüliakat. Wekirajaajeerü anainya tü waaʼinrajatkat süpüla anain wakuwaʼipa sutuma tü pütchi naapakat wamüin Jeʼwaa.

TÜ PAAʼINRAJATKAT PAASHAJEʼERAPA TÜ WIWÜLIAKAT

7. ¿Jamüsü nnojoluinjatka wasürülüin wekii waashajeʼerapa tü Wiwüliakat?

7 Nnojo püsürülüin pikii paashajeʼerapa wanee pütchi. Shiimainsaʼa sünain süshajünüin süpüshi tü Wiwüliakat nümüin wanee wayuu, eeshii kojuyashiire nayaʼaya. Müsü tü Wiwüliakat: «Süpüshuaʼa tü ashajuushikat, nümaʼanajeejatü shia Maleiwa otta jalouisü shia süpüla ekirajaa» (2 Tim. 3:16, TNM). Müsüjeseʼe nnojoluinjatüin wasürülüin wekii suulia süpüshuaʼa tü pütchi suluʼukat tü Wiwüliakat (paashajeʼera «Pütchi pütüjaainjatka aaʼu»). Naashin wanee wawala, wainma tü kasa nütüjakat sünainjee neʼe naashajeʼerüin wanee pütchi suluʼujee tü Wiwüliakat. Tia, sükaaliinjain nia süpüla nütüjaain saaʼu tü pütchi nnojotkat shiyaawatüin aaʼu wayuu süpüshuaʼa. Süpülapünaa waashajeʼerüin tü Wiwüliakat, wachunta nümüin Jeʼwaa nükaaliinjai waya süpüla nnojoluinjatüin wasürülüin wekii suulia tü pütchi waashajeʼerüinjatkat otta müsia tü kasa nikirajeekalü anain waya (Esd. 7:10; paashajeʼera Santiago 1:5).

¿Eeshiʼiya jia ekirajaain sünain tü karalouktairua eekat wamaʼana jaashajeʼerapa tü Wiwüliakat? (Paashajeʼera tü pütchikat 7).

8, 9. (1) ¿Jarat tü pütchi wasakireʼerüinjatkalü anain waaʼin waashajeʼerapa tü Wiwüliakat? (2) ¿Kasa watüjaka nüchiki Jeʼwaa sutuma tü pütchi nuchuntakat namüin na laülaashiikana?

8 Püsakireʼera paaʼin. Paashajeʼerapa tü Wiwüliakat, püsakireʼerawalinjatü paaʼin sünain tüü: «¿Kasa tatüjaka nüchiki Jeʼwaa sutuma pütchikat tüü? ¿Jamüsüche paala sukuwaʼipa süpüla teʼitaain suluʼu takuwaʼipa pütchikat tüü? ¿Jamüsüche paala sukuwaʼipa tatuma süpüla takaaliinjain na wayuukana süka pütchikat tüü?». Jülüjale paaʼin tia pütchikalüirua, wainmeerü kasa pütüjaka sünainjee tü Wiwüliakat. Anuu wanee sukuwaʼipa: süküjüin tü Wiwüliakat kojuyasü kasa süpüla nüneekünüin wanee wawala süpüla laülaashinjachin nia (paashajeʼera 1 Timoteo 3:2-7). Eeshii süpüla wamüin sutuma nnojoliin laülaashin waya: «Nnojotsü kasain shikirajüin anain taya tia pütchikat». Süpüla  pütüjüinjachin sünainjee tia pütchikat, acheküsü jülüjain paaʼin tü apünüinsükat asakiraa. Anuu shia.

9 «¿Kasa tatüjaka nüchiki Jeʼwaa sutuma pütchikat tüü?». Tü keeʼireekat naaʼin Jeʼwaa shia nekeraajüinjatüin na laülaashiikana süpüshuaʼa tia niʼitaakat napüla. Choʼujaashaatasü naaʼinrüinjatüin tia süka kojutashaatain nümüin Jeʼwaa na wawalayuuka. Saashin tü Wiwüliakat, naapüin Jeʼwaa chi nüchonkai süpüla ouktajachin nia waaʼu (Aluw. 20:28). Tü keeʼireekat naaʼin Jeʼwaa shia anainjatüin maʼin nakuwaʼipa na laülaashiikana süpüla nashatüinjatüin shia na wawalayuukana. Soʼu wanee kaʼi, asoukteena na laülaashiikana naaʼu na wawalayuukana süka nayain niʼitaain Jeʼwaa süpüla aaʼinmajaa naya. Tü keeʼireekat naaʼin Jeʼwaa shia anainjatüin naaʼin na wawalayuukana süka naaʼinmajünüin natuma na laülaashiikana (Is. 32:1, 2). Tü kojuyasükat kasa nuchuntakat Jeʼwaa namüin na laülaashiikana, shiiʼiyatüin sünain jülüjashaatain waya naaʼin Jeʼwaa.

10, 11. (1) ¿Kasa watüjeetka sünainjee tü pütchi napülajatkat na laülaashiikana? (2) ¿Kasa waaʼinrüinjatka süpüla wekirajüin na wayuukana sünain tia?

10 «¿Jamüsüche paala sukuwaʼipa süpüla teʼitaain suluʼu takuwaʼipa pütchikat tüü?». Müleka laülaashire pia, anasü paashajeʼerawaire tü pütchi naapakat Jeʼwaa pümüin, paainja tia süpüla punoukteʼerüin pukuwaʼipa shiʼipaʼaya. Laülaasheere pia, püchajaashaata sukuwaʼipa süpüla piʼitaain suluʼu pukuwaʼipa tia pütchikalüirua (1 Tim. 3:1). Akaataajaʼa wapüshuaʼa wayakana, wainma tü kasa watüjakat sünainjee tia pütchikat. Jamüshijaʼa Jeʼwaa, keeʼireesü naaʼin wayaawatüin saaʼu wakuwaʼipa otta laülaainjatüin waaʼin (1 Ped. 4:7; Filip. 4:5, TNM). Anale nakuwaʼipa na laülaashiikana, nashateerü shia na wawalayuukana, nashateerü sukuwaʼipa nanoula (Heb. 13:7, TNM; 1 Ped. 5:3).

11 «¿Jamüsüche paala sukuwaʼipa tatuma süpüla takaaliinjain na wayuukana süka pütchikat tüü?». Waküja namüin na wekirajakana sünain tü Wiwüliakat jee na wayuukana sünain waneejatüin nakuwaʼipa na laülaashiikana noulia na shikiipüʼükana tü iküleesia nnojotkat shiimain. Weeʼiyata namüin tia sükajee tü pütchi namüinjatkat na laülaashiikana. Tia pütchikat, shikirajüin waya sünain naʼyataashaatain na laülaashiikana napüleerua na wawalayuukana. Jülüjale waaʼin tü naaʼinrakat na laülaashiikana, kojuteena maʼin naya wamüin (1 Tes. 5:12). Talateerü maʼin naaʼin sünain tü naʼyataainkat müleka kojutüle naya wamüin (Heb. 13:17).

12, 13. (1) ¿Jarat tü pütchi jülüjainjatkat waaʼin wekirajaapa sünain tü Wiwüliakat? (2) ¿Kasa weʼreetka wekirajaale sooʼomüin süchiki tü nüshajakat Ezequiel?

12 Pikirajaa sooʼomüin. Pikirajaapa sünain tü Wiwüliakat, püchajaa susouktia pütchikalüirua tüü:

  • ¿Jaraiche ashajaka pütchikat tüü?

  • ¿Jalajatü ashajünüin? ¿Joujatü ashajünüin?

  • ¿Kasa alataka suʼunnaa süshajünüin karalouktakat tüü?

Wachajaale susouktia tia, watüjaajeerü aaʼu tü pütchi nnojotkat shiyaawatüin aaʼu wayuu süpüshuaʼa.

13 Anuu wanee sukuwaʼipa. Saashin tü Wiwüliakat, müleka kaainjarale wanee pueulo nuulia Jeʼwaa, najaʼlajeʼereerü shia, najaʼttireerü tü neküinkat jee müsia tü namüʼlüinkat. Nümaka Jeʼwaa mapa: «Yaayüije Noé, Daniel otta Job, nnojoishiije ouktüin naya wanaa jümaa süka wayuuin loto akuwaʼipachii naya» (Ezeq. 14:13, 14, TNM). Müleka wekirajaale sooʼomüin süchiki tia, weʼreerü sünain nüshajüin Ezequiel tia pütchikat 612 juya süpülapünaa nüntüin Kürisüto yaa mmapaʼamüin. Ayatüshi sotuin naaʼin Jeʼwaa Noé otta Job mayaapejeʼe ouktüin naya kojuya juya süpülapünaa tia. Katapejeʼe noʼu Daniel soʼu tia, eetaasü maʼaka 20 nuuyase soʼu nüküjüin Jeʼwaa lotuin nukuwaʼipa Daniel maʼaka naaʼin Noé otta Job. ¿Kasa shikirajaka anain waya tia? Tü shikirajakalü anain waya shia kojutüin nümüin Jeʼwaa napüshuaʼa na wayuu aʼyataakana nümüin maʼaka naaʼin na jimaʼaliikana jee na majayünnüükana (Sal. 148:12-14).

WEKIRAJAA MAʼIN SÜNAIN TÜ KARALOUKTAIRUA EEKAT WAMAʼANA

14. (1) ¿Kasa sükaaliinjaka anain na jimaʼaliikana jee na majayünnüükana tü pütchi naapakat Jeʼwaa namüin? (2) ¿Kasa sükaaliinjeenaka anain waya tia pütchikalüirua jee tia karalouktakalüirua? (Piirakaa sümüin tü ayaakuaa suluʼukat süpana 28).

14 Napülajatka na jimaʼaliikana jee na majayünnüükana. Wapüshuaʼa wayakana, eeshii süpüla  watüjain sünainjee süpüshuaʼa tü Wiwüliakat. Eeshii süpüla watüjainya sünainjee süpüshuaʼa tü karaloukta ayuʼnnakat sünainjee tü Wiwüliakat. Anuu wanee sukuwaʼipa: wainmairü tü karaloukta naapakat Jeʼwaa namüin na jimaʼaliikana jee na majayünnüükana. [1] Tia pütchikalüirua, sükaaliinjain naya süpüla eejiraain naya sümaa tü apüleeruaanakalü aka naaʼin koleejialuʼu jee müsia tü alatakat namüin nemiyoʼulaapa. ¿Kasa sükaaliinjeenaka anain waya tia pütchikalüirua jee tia karalouktakalüirua? Waashajeʼerüle tia karalouktakalüirua, watüjaajeerü aaʼu tü kasa eejiraakalü amaa na jimaʼaliikana jee na majayünnüükana otta wakaaliinjeena naya sümaa watütüleʼereerüin naaʼin.

15. ¿Jamüsü naashajeʼerüinjatka na wawalayuu miyoʼuyuukana tü pütchi napülajatkat na jimaʼaliikana jee na majayünnüükana?

15 «Nnojotsü choʼujaain taashajeʼerüinjatüin tü karaloukta napülajatkat na jimaʼaliikana jee na majayünnüükana» nnojoishii müinjanain na wawalayuu miyoʼuyuuinnakana. Yaleta aaʼinna naya naainjüle tia. Alatüsü wamüin wapüshuaʼa wayakana tü alatakat namüin na jimaʼaliikana jee na majayünnüükana. Jamüshiijaʼa naya, naküjüinjatü süchiki tü nanoujakalü anain, nachecherüinjatü naaʼin, eejiraainjana sümaa tü ooʼulakünakalü aka naaʼin natuma na nakonpanyeetsekana, nnojoliinjana aʼaleewajaain naya namaa wayuu mojulaashii otta nnojoishii ashaittüinjanain naya süka kasa nnojotka anain. Tü pütchi napülajatkat na jimaʼaliikana jee na majayünnüükana suluʼujeejatü shia tü Wiwüliakat. Jalouisü wamüin wapüshuaʼa tia pütchikat.

16. ¿Kasa sükaaliinjaka anain na jimaʼaliikana jee na majayünnüükana naashajeʼerüle tü karaloukta napülajatkat?

16 Aleeweena maʼin na jimaʼaliikana jee na majayünnüükana nümaa Jeʼwaa naashajeʼerüle tü karaloukta napülajatkat (paashajeʼera Eclesiastés 12:1, 13). Aneetpajaʼa waashajeʼerüle tia karalouktakalia. Jamüsüjaʼa tü ¡Despertad! ojuʼitakat aaʼuriiroʼu 2009, aashajaasü süchiki tüü: «¿Cómo disfrutar la lectura de la Biblia?». Tia napülajatü na jimaʼaliikana jee na majayünnüükana. Kojuyasü kasa aküjünaka sünain tia rewiisütakat süpüla waashajeʼerüin tü Wiwüliakat otta eejatü wanee pütchi süttüsü, kalüjülesü süpüla ochotoonoo süka palousa süpüla shikirajaanüin anain mapa. ¿Jalouisüche tia pütchikat namüin na miyoʼuyuukana? ¡Pümajayaai sümüin, jalouisü maʼin namüin! Eejatüinka wanee wayuu kachonsü, kapüleepuʼusü maʼin sümüin aashajeʼeraa tü Wiwüliakat, saaʼinraka mapa tü aküjünakat suluʼu tia rewiisütakat. Maaʼulu yaa, talatashaatasü maʼin saaʼin sünain aashajeʼeraa tü Wiwüliakat jee shiyaawata aaʼu nnojoluin naatayaa sümüin tü pütchi suluʼukat tü Wiwüliakat. Sütüjaaitpa aaʼu kasain maʼin saashajaain achiki tü Wiwüliakat. «Kamalainshaataitpa maʼin tamüin aashajeʼeraa tü Wiwüliakat», müsün.

17, 18. ¿Jamüsü anaka waashajeʼerüle tü pütchi süpülajatkat wayuu süpüshuaʼa? Piʼitaa wanee shiyaawase.

 17 Sümüinjatka wayuu süpüshuaʼa. Soʼu tü juyakat 2008, oʼttüshii waya sünain akumajaa tü karalouktakat Aapiria Wayuu napülajatka neʼe na wawalayuukana. Eepejeʼe waneeirua karalouktairua napülajatka na wayuu nnojoliikana anoujain. ¿Jamüsü anaka waashajeʼerüle tia karalouktakalüirua? Weʼitaa wanee shiyaawase, jamüshiijaʼa wounejaale wanee wayuu sünain tü outkajawaakat, talateena maʼin waya nuutkajaale wamaa. Shiasaʼa suʼunnaa tü outkajawaakat, eesüjaʼa jülüjale waaʼin jamüin naaʼin chia wayuukai sünain aapajaa tü pütchikat otta jülüjasü waaʼin eein süpüla sunouktaain nukuwaʼipa sutuma tü pütchi naapajakat. Müle shia, kojutüleejeeria maʼin wamüin tia pütchi aküjünakat.

18 Müsia neʼe sukuwaʼipa waashajeʼerapa wanee pütchi napülajatka na wayuu nnojoliikana anoujain. Sünain tü rewiisütakat Aapiria Wayuu süpülajatka wayuu süpüshuaʼa otta suluʼu jw.org, wanta anainrü pütchi mapüleeka süpüla ayaawatüna aaʼu sutuma wayuu süpüshuaʼa. Waashajeʼerüle tia pütchikat, wayaawataleejeeria aaʼu tü shikirajakalü anain tü Wiwüliakat. Shiasaʼa sutuma tia, kojutüleejeeria maʼin shia wamüin. Akaʼaya waya, atüjeena maʼin waya süpüleerua tü sukuwaʼipainjatkat wanüiki waküjapa pütchi. Sükaaliinjüinya waya tü rewiisütakat ¡Despertad! Süka jamüin, süküjüin tü wanoujainjatkalü aaʼujee sünain niain kakumalain chi Maleiwakai süpüshuaʼa kasa. Jee müsia sükaaliinjain waya süpüla wasouktüin namüin na asakitkana waya süchiki tü wanoujakalü anain (paashajeʼera 1 Pedro 3:15).

19. ¿Kasa waaʼinrajatka süpüla weeʼiyatüin nümüin Jeʼwaa sünain kojutüin wamüin süpüshuaʼa tü pütchi nümaʼanajeejatkat?

19 Watta maʼin saalii tü pütchi naapakat Jeʼwaa wamüin süpüla anainjatüin wakuwaʼipa (Mat. 5:3). Ayataʼaya waashajeʼerüin otta woonooin sümaa süpüshuaʼa tü nikirajakalü anain Jeʼwaa. Waaʼinrüle tia, aneerü maʼin wakuwaʼipa otta weeʼiyateerü nümüin Jeʼwaa sünain kojutüin maʼin wamüin süpüshuaʼa tü pütchi nümaʼanajeejatkat (Is. 48:17).

^ [1] (pütchi 14): Paashajeʼera tü karalouktakat Lo que los jóvenes preguntan. Respuestas prácticas volúmen 1 otta 2 otta püchajaa suluʼu jw.org eere «Los jóvenes preguntan» sümüin.