1. ¿Jamüshii paaʼinwaka nutuma Jeʼwaa na israeliitakana?

Nüneeküin Jeʼwaa na nuuʼuliwoʼukana Abraham otta nüküjüin namüin tü kasa naaʼinrajatkat. Kojutüinjatü namüin nünüiki Maleiwa otta tü shiimainkat nüchiki (Salmo 147:19, 20). Anainjatü sukuwaʼipa wayuu süpüshuaʼa nanainjee. Püleeja Génesis 22:18.

Nüneeküin Maleiwa na israeliitakana süpüla naküjüliinjanain pütchi nüchiki. Tü aküjünakat nachiki, shiiʼiyatüin anain wakuwaʼipa woonoole sümaa nünüiki Maleiwa (Deuteronomio 4:6). Nanainjee nayakana, eʼnnaajünüinjachi Maleiwa. Püleeja Isaías 43:10, 12.

2. ¿Jamüshii paaʼinwainjanaka na anoujüshii shiimainkana?

Wanaa sümaa niyouktüin Jeʼwaa na israeliitakana, nüneeküin neeʼiraka na nümaajanakana Jesuu (Mateo 21:43; 23:37, 38). Na aküjakana pütchi nüchiki Jeʼwaa maaʼulu, naya na anoujüshii shiimainkana, nnojoishii nayain na israeliitakana. Püleeja Aluwataaushikana 15:14, 17, TNM.

Nuluwataain Jesuu na nikirajüinkana süpüla naküjüin pütchi otta nekirajüin wayuu sainküin Mmaka (Mateo 10:7, 11; 24:14; 28:19, 20). Maaʼulu, sülüʼütpa süpüla sajaʼttüin tü kasakalüirua, ayateerü aküjünüin maʼin tü pütchikat. Wainma maʼin wayuu nikirajaka Jeʼwaa sainküin Mmaka süpüla suluʼuinjanain naya tü iküleesia shiimainkat (Alateetkat Mapeena 7:9, 10). Sutuma paaʼinwain na anoujüshii shiimainkana, akaaliinjiraashii otta nakatchinrüin naaʼin na nawalayuukana. Wanaawasü tü ekirajünakalü anain naya. Püleeja Hebreokana 10:24, 25.

 3. ¿Joujana outkajaain nachikuaʼa na aküjüliikana pütchi nüchiki Jeʼwaa?

Outkajaashii süchikijee tü juyakat 1870. Eejana palitchon wawalayuu ekirajaaka sünain tü Wiwüliakat, nayaawata aaʼu tü pütchi nnojotkalü atüjaanüin aaʼu paala. Natüjaa aaʼu naluwataanüin na anoujüshiikana sünain aküjaa pütchi nutuma Jesuu. Naküjakaʼaka pütchi süchiki Nuluwataaya Maleiwa sainküin Mmaka. Tü anülieekat aküjülii pütchi nüchiki Jeʼwaa, eʼitaanüsü nanain soʼu tü juyakat 1931. Püleeja Aluwataaushikana 1:8; 2:1, 4, 11 otta 5:42.

4. ¿Jamüshii paaʼinwajiraaka na aküjüliikana pütchi nüchiki Jeʼwaa?

Paaʼinwajiraashii na anoujüshii namaiwajanakana süka eejanain na Laülaashii Jülüjakana Aaʼin naya otta nayaawata aaʼu niain Jesuu laülaaka naaʼu (Aluwataaushikana 16:4, 5). Müshiʼiya maaʼulu na aküjüliikana pütchi nüchiki Jeʼwaa, eeshii na Laülaashii Jülüjakana Aaʼin naya. Atüjüshii maʼin naya otta jülüjüsü naaʼin sukuwaʼipa naʼyataain na aküjüliikana pütchi sainküin mmaka. Akumajüshii karaloukta, nalatirüin pütchi suluʼu wanee naata anüikii otta najütirüin karaloukta namüin na wawalayuukana suluʼu 600 anüikii. Na Laülaashii Jülüjakana Aaʼin na Aküjüliikana Pütchi sainküin Mma, nakatchinrüin naaʼin na wawalayuukana suluʼu 100.000 outkajaalee. Eeshii na wawalayuu aaʼinmajakana nanoula. Püleeja 1 Pedro 5:2, 3.

Paaʼinwashii na aküjüliikana pütchi süpüla naküjüin tü pütchi sümakat tü Wiwüliakat otta süpüla ekirajaa wayuu. Aküjüshii naya pütchi sainküin miichi maʼaka naaʼin na nikirajüinkana Jesuu (Aluwataaushikana 20:20). Nekirajüin na achekakana tü shiimainkat. Pawalaawashii, aijiraashii otta naaʼinmajüin Jeʼwaa naya (2 Tesalónica 1:3). Talatüsü maʼin naaʼin sutuma talateein Jeʼwaa natuma otta nakaaliinjeein wayuu. Püleeja Salmo 33:12 otta Aluwataaushikana 20:35.