¿JAMÜSÜ PÜTÜJAAINJATKA SAAʼU TIA?

Shiimainre wakumajaain wamüiwaʼa, nnojoleena mata jeʼrain juya waya sünain kataa oʼuu. Shiimainre nukumalain waya Maleiwa wainmeerü kasa watüjaaka aaʼu süchiki wakuwaʼipa otta jameerüin wakuwaʼipa mapeena.

¿KASAJEʼE PAAʼINRAKA?

Jamüshijaʼa Álex nnojotsü nütüjaain aaʼu kasain nunoujainjatüin anain. Shiapuʼu nunoujaka anain niain kakumajalain Maleiwa kasa süpüshuaʼa. Nüküjaka joo chi profesorkai nümüin shiimain maʼin naashin na cientiificokana tü evolucionkot. Shiasaʼa suulia «matüjüinsai pia», nümünüin amüin. «Shiimainrejeʼe shia naashin na cientiificokana, ¿kasakaʼa taʼalaajüinjanain anainjee naya?», maa müsü naaʼin.

Sülatüle pümüin tü alatakat nümüin Álex, ¿punoujeerü anain tü evolucionkot sükajee shiimain shia saashin karaloukta?

JÜLÜJA PAAʼIN TÜÜ

Eeshii wayuu anoujaka maʼin sünain tü evolucionkot otta eeshii na anoujakana sünain niain kakumajalain Maleiwa kasa süpüshuaʼa. Isapejeʼe nachiki naküjüin jamüin nanoujaka sünain tia.

  • Eeshii na «nukumajala Maleiwa kasa süpüshuaʼa» makana, süka nekirajünüin sünain suluʼu tü iküleesiakat.

  • Eeshii na anoujakana sünain tü evolucionkot süka nekirajünüin sünain suluʼu koleejiaa.

 AIPIRUASÜ KASA PÜSAKIRÜINJATKA ANAIN

Anuu sünüiki Hebreokana 3:4, TNM: «Süpüla eeinjatüin wanee piichi, eeshi chi kakumalakai shia. Jee chi kakumalakai tü kasakalüirua süpüshuaʼa nia Maleiwa». ¿Jamüsü saaʼin pümüin sünüiki tü Wiwüliakat?

«Nnojoishi eein chi Maleiwakai» wamüle, müshii wamakai, «akumajaasü neʼe sümüiwaʼa türa miichikat».

TÜ MÜNAKAT: Akumajaasü kasa süpüshuaʼa sutuma süsotooin wanee kasa Big Bang münüsü.

1. ¿Jarai asoteʼeraka tü kanüliakat Big Bang?

2. ¿Kasache anaka süpüla wanoujain anain? ¿Akumajaasüche kasa sümüiwaʼa? ¿Eetaapa chi kakumajalakai shia?

TÜ MÜNAKAT: Mürüt wayuu sümaiwa.

3. Wekiisüle paala tü mürütkalüirua maʼaka saaʼin tü alaʼalakat, ¿jamakaʼa watüjaka maʼin suulia?

4. ¿Jamüsü anashaataka maʼin sukumajia wanee kasa jaʼitasü joʼuuchoin maʼin shia?

TÜ MÜNAKAT: Shiimain tü evolucionkot.

5. ¿Ekirajaashiche paala chia wayuu makai anüiki?

6. ¿Wainmache wayuu anoujaka sünain tia sükajee süpülajatüin neʼe shia wayuu eekai sütüjain maʼin?

Anuu sünüiki Julia: «Jamüshijaʼa chale pia wünaʼapü warai müin, piirakaale sümüin wanee miichi akumajuushi süka taapüla. «Anakatche maʼin tü miichikat, akumajaakajasaʼa neʼe shia sümüiwaʼa sünainjee wunuʼulia eekai sujuttüin», nnojoishijeʼe müin pia. Müsü mojushiiyaakai saaʼin tia. ¿Jamaka wanoujainjanaka sünain eejaʼalaa sümüin kasa sümüiwaʼa?».

Anuu sünüiki Gwen: «Süsotoole wanee piichi eekai piratüin karaloukta, ¿ojuʼiteetche wanee diccionario yalejee?».

 ¿KASA TANOUJAKA ATUMA NÜNAIN MALEIWA?

Piyaawatajatü aaʼu tü kasa paaʼinrajatkat saashin tü Wiwüliakat (Roma 12:1, TNM). Nnojoishi anoujainjachin neʼe pia sutuma tü pütchi yaakat wünaapünaa:

  • TÜ ANAKAT SAAʼIN PÜMÜIN: «Eeshi eera chi kakumajalakai waya».

  • TÜ NANOUJAKALÜ ANAIN NA WANEEINNUA: «Anoujashii nünain Maleiwa na tamaajanakana».

  • TÜ ANOUJINNEEKALÜ ANAIN PIA: «‹Punouja nünain Maleiwa›, münüshi taya tepialuʼu».

Pansaainjatü putuma tü punoujakalü anain suulia punoujaʼalüin sünain tü namakat na waneeinnua.

Anuu sünüiki Teresa: «‹Shiimain eein chi Maleiwakai›, müsü taya wanaa sümaa tekirajünüin suluʼu koleejiaa süchiki tü kasa eekat wanain. Eesü tü kapülajatkat nutuma Maleiwa tü kasa wanainkat jaʼitasü joʼuuchoin shia. Eesü nnojorüle watüjaain aaʼu jamüin wakuwaʼipa waleʼeruʼu. ¡Anakatche maʼin tia!».

Anuu nünüiki Richard: «Teʼrüle wanee edificio, anua jee kemion, ‹¿jaraiche kakumajalakai shia?›, müshi taya. Watta saalii kasa sünainka wanee kemion. Atüjashi maʼin chi akumajakai shia süpüla anain shiʼitaaya tü kasa choʼujaakat sünain. Sukumajuushire tü kemionkot, eeshijaʼa mata chi kakumajalakai wayuu».

Anuu nünüiki Anthony: «Müsü alawaakai saaʼin tamüin tü evolucionkot süka tekirajaain maʼin sünain tü cienciakat. [...] Kanoulashaatainjachi wanee wayuu süpüla nunoujain sünain tü evolucionkot».

JÜLÜJA PAAʼIN MOTSOʼO

Nnojotsü wanaawain tü namakat na cientiificokana süchiki tü evolucionkot, mayaainjeʼe natüjain maʼin jee kakaliainnain naya sünain ekirajawaa süchiirua. ¿Jamakaʼa piainjachikaʼa anoujain sünain tia?