Eeshii eekai namüin:

  • «Ayateeria müinya neʼe».

  • «Mojuleejeeria maʼin».

  • «Aneerü sukuwaʼipa wayuu mapa».

¿Jamüsüjaʼa saaʼin pümüin?

 TÜ SÜMAKAT TÜ WIWÜLIAKAT

«Nümülialeena naya [Maleiwa]. Müiria nnojolüin ouktaa, mojuu aaʼin, aʼyalajaa, je saalii ayuulii, süka sülatüitpain süpüshuaʼale makat aka tia.» (Alateetkat Mapeena 21:3, 4, Tü Nüchikimaajatkat Jesucristo.)

¿JAMÜSÜ ANEETKA WAKUWAʼIPA WATÜJAALE SAAʼU TIA?

Aneerü maʼin tü waʼyataainjatkalü anain otta talateena maʼin waya sümaa (Isaías 65:21-23).

Nnojoleena müliain jee ayuulin waya (Isaías 25:8; 33:24).

Talateena maʼin waya waneepia sümaa wapüshi jee namaa waʼaleewainyuu (Salmo 37:11, 29).

 ¿JAMÜSHII WANOUJÜINJANAKA SÜNAIN TÜ SÜMAKAT TÜ WIWÜLIAKAT?

Eesü piamasü kasa wanoujüinjatka atuma tia:

  • Nikeraajeerü Maleiwa tü nümakat süka Pülashin nia. Chi «Pülashikai maʼi», müsü tü Wiwüliakat nüchiki Maleiwa (Alateetkat Mapeena 15:3). Makalaka wanoujüinjanain sünain tü nümakat süka nikeraajeerüin tü nümakat sünain aneerüin maʼin sukuwaʼipa tü mmapaʼakat nutuma. Saashin tü Wiwüliakat nnojotsü eein wanee kasa eeka «kapüleein nümüin Maleiwa» (Mateo 19:26).

  • Nikeraajeerü Maleiwa tü nümakat süka shiainya keeʼireein naaʼin. Saashin tü Wiwüliakat, nüsoʼireʼerüinjatü Jeʼwaa naaʼin na wayuu ouktakana süka shiain keeʼireein naaʼin (Job 14:14, 15).

Süküjüinya tü Wiwüliakat nüchiki Jesuu sünain niiyajüin na wayuu ayuuikana. Naainjüin tia süka nücheküin süpüleerua anainjanain naya (Marcos 1:40, 41). Tia naaʼinrakat Jesuu sümüin wayuu, shiaʼaya neʼe naaʼinreeka Maleiwa namüin na wayuu müliakana (Juan 14:9).

Shiimain sünain keeʼireein naaʼin Jeʼwaa otta Jesuu anain maʼin tü wakuwaʼipakat watta kaʼi (Salmo 72:12-14; 145:16; 2 Pedro 3:9).

 PÜSAKIREʼERA PAAʼIN

¿Kasa naaʼinrajatka Maleiwa süpüla anain maʼin sukuwaʼipa tü mmapaʼakat nutuma?

Puusüteerü anain tü susouktiakat suluʼu MATEO 6:9, 10 otta DANIEL 2:44