Sülatapa poloo kaʼi süchikijee nuʼunuin Jesuu iipünaamüin, naapüin Maleiwa chi naaʼinkai namüin na nikirajüinkana. Tia soʼujatü tü Miʼiraa kanüliakat Pentecostés soʼu juyaka 33 soʼu wakalia. Watta saalii wayuu antaka Jerusalénmüin süpüla tia miʼiraakat, suluʼujeejana naya mma wattajee. Noutkajaaka 120 nikirajüin Jesuu suluʼu wanee piichi iipünaasü, neʼraka wanee kasa anashaatasü maʼin. Eejaʼalaa sümaka wanee sikoʼu naraloʼujee waneʼewai nakua na nikirajüinkana Jesuu; noʼttaka sünain aashajawaa suluʼu waneirua anüikii naatajannuu. Jee süntaka wanee joutai katsüinsü maʼin suluʼupünaa tü piichikat.

Na wayuu antakana suluʼujee mma wattajee, naapüin suʼlotuin tü joutaikat suluʼu tü piichikat. Nawataaka süpüla natüjaain saaʼu kasain alatüin suluʼu tia piichikat. Ainkuusü naaʼin neʼrapa na nikirajüinkana Jesuu sünain aashajawaa suluʼu anüikii naatajatü. «Wayuu Galileajeʼewalii naya. ¿Jamaka waapaka sünain naashajaain süka tü pütchi waashajaakalü aka waneʼewai wakua?», müshii naya.

Nüshaʼwalaaka Pedro namaa waneinnua aluwataaushii pasanain sünain tü wayuukalüirua. Nümaka: «Jiakana, juʼuta aaʼinchi Jesuu. Nüsoʼireerapejeʼe Jeʼwaa naaʼin nüchikuaʼa. Maaʼulu yaa, chashi Jesuu nikialuʼujee Maleiwa.  Naapüinjeseʼe wamüin Jesuu chi naaʼinkai Maleiwa maʼaka nüküjüin shia paala wamüin. Müsüjeseʼe jiʼrüitpain tü kasa pülasü jaapakalü achiki».

Ponoshootosü saaʼin tü wayuukalüirua tü alatakat. Antüsü suluʼumüin naaʼin tü pütchi nüküjakat Pedro namüin. «¿Kasa anaka süpüla waaʼinrüinjatüin jooluʼu?», sümaka tü wayuukalüirua. «Jiyaawajaa jümata suulia jaainjala otta juwoutisaaja saaʼu nünülia Jesuu. Nüjüteechika jümüin chi Naaʼinkai Maleiwa», nümaka Pedro namüin. Soʼu tia, woutiisashii 3.000 wayuu. Soʼujeʼereʼeya kaʼikat tia, awainmalaashii na nikirajüinkana Jesuu chaa Jerusalén. Akaaliinjünüshii na aluwataaushiikana nutuma chi naaʼinkai Maleiwa süpüla sukumajaain wainma outkajaalee. Mayaa, neʼiküin na anoujashiikana sünain süpüshuaʼa tü kasa nuluwataakalü anain naya Jesuu.

«Müleka waküjale sümüin wayuu nüchiki Jesucristo sünain Wasenyotsein nia, sümaa wanoujain nünain süka süpüshua waaʼin sünain süsoʼiraain naaʼin nütüma Maleiwa süchikijee ouktaa, shiimüin sünain woʼtteʼennüin» (Roma 10:9).