Eejatü jimataa aaʼin chaa Israel suʼunnaa nuluwataain Salomón. Kasaatka mapa Salomón sümaa watta saalii jieyuu naataka oumain. Aʼwaajüshii maleiwayaasü naya jieyuukana. Amojujaasü mapa nukuwaʼipa Salomón, nuʼwaajaka maleiwayaasü. Jashichika maʼin Jeʼwaa nümüin Salomón. «Tasüteerü tü aluwataayakat najapuluʼujee na püpüshikana. Piameerü shiʼipapaʼa tatuma. Aluwataajeechi wanee wayuu naʼakajee na püchepchiakana saaʼu poloosü eʼirukuu otta wanee püchon aluwataajeechi saaʼu piamasü eʼirukuu».

Nüküjain Jeʼwaa mapa jamaluʼuluin tü nümakat achiki. Antiraashi wanee nüchepchia Salomón kanüliakai Jeroboán nümaa Ahíya chi nünüikimaajachikai Maleiwa. Naakatüin Ahíya wanee nüsheʼin nüchatajaaka shia 12 shiʼipapaʼa. Nümaka nümüin Jeroboán: «Nüsüteerü Jeʼwaa tü aluwataayakat najapüluʼujee na nüpüshikana Salomón otta piamainjatü shiʼipapaʼa tü aluwataayakat. Paapaa poloosü shiʼipa kuluutkat tüü, piainjachi aluwataakai saaʼu poloosü eʼirukuu saaʼu Israel». Nütüjaapa saaʼu Salomón nüneekünüin Jeroboán, nuʼutee aaʼinchi nia. Nuʼluwataaka Jeroboán Egiptomüin. Outapa Salomón nia aluwataaka saaʼu Israel wanee nüchon kanüliakai Rehoboam. Niasaʼa Jeroboán aleʼejüshi nüchikuaʼa Israelmüin süka nnojoluichipain Salomón.

 Müshii na laülaashiikana nümüin Rehoboam: «Waneepieena na israeliitakana pümaa müleka kamaneere maʼin pia namüin». Akanasaʼa na wayuu jimaʼaliikana müshii nümüin Rehoboam: «Mojulaa pia namüin na israeliitakana, piʼyateʼera maʼin naya». Oonooshi Rehoboam sümaa nanüiki na jimaʼaliikana. Müliashii maʼin na israeliitakana nutuma. Neʼrüliijaaka wayumüin nümüin Rehoboam, neʼitaaka Jeroboán süpüla nuluwataainjachin saaʼu poloosü eʼirukuu chaa Israel. Nuluwataaka Rehoboam saaʼu piamasü eʼirukuu. Sünülia tia, nuluwataaya Judá. Müsü sukuwaʼipa süpüla sükatannüin tü 12 eʼirukuu chajatkat Israel.

Chajachi Rehoboam aluwataain Jerusalén. Niyoutüin Jeroboán napüleerua na israeliitakana noʼunüinjanain Jerusalénmüin sünain aʼwaajaa Jeʼwaa. ¿Jamüsü niyoutaka tia? Shia süka mmoluin nia seema noonooin na wayuukana sümaa nünüiki Rehoboam. Nukumajiraka piamashii paaʼachon süka ooro. «Wattasü maʼin Jerusalén. Makata jia yaʼayaa süpüla juʼwaajüin tü paaʼacheinkalüirua», nümaka namüin na israeliitakana. Jaa müshii naya nümüin, motoko Jeʼwaa naaʼin nachikuaʼa.

«Nnojo wanaawajiraain jia sümaa wayuu eekai manoujain. Jiakana jüüjüükana sümüin tü nuluwataakat anain chi Maleiwakai, nnojotsü süpüla wanaawainjatüin jaaʼin sümaa wayuu eekai shiyouktüin nünüiki» (2 Corinto 6:14, 15).