ALATÜSÜ piama juya süchikijee nashutuin saaʼu Babilonia na medokana otta na persakana. ¡Piirakaa namüin na israeliitakana! Oʼunushii Babiloniajee. ¿Jamüshii noʼunaka? ¿Jara ajütaka naya?

Nia Ciro chi aluwataaikai Persia. Nnojoliiwaʼaya jemein nia müsü nünüiki Jeowa nüchiki nükajee Isaías: ‹Paainjüinjatü tü keeʼireekat taaʼin. Apütüneerü jutatüin soʼu süsepü Babilonia süpüla pushutuin saaʼu›. Nekiipuʼuka na medokana otta na persakana Ciro süpüla nashutuin saaʼu Babilonia. Antüshii naya saʼwai otta jutatüsü soʼu süsepü Babilonia napüla.

Nüküjüin Jeowa nümüin Isaías niainjachin Ciro aluwataaka na israeliitakana sünain akumajaa Jerusalén otta tü aʼwaajüleekat. ¿Naainjüin Ciro tia? Aa, müshi nia namüin na israeliitakana: ‹Juʼuna Jerusalénmüin otta jukumaja tü aʼwaajüleekat Jeowa›. Tia shia tü naainjüinjatkat na israeliitakana.

Israeliita oʼunaka Babiloniajee

Nnojoishii oʼunuin napüshuaʼa na israeliitakana süka laülaain otta ayuulin naya. Wattasü maʼin Jerusalén, eesü maʼaka 800 kiloometüro chamüin. Nümaka Ciro namüin na nnojoliikana oʼunuin: ‹Jüsülaja ooro, pülaata otta waneeirua kasa namüin na oʼunajanakana sünain akumajaa Jerusalén otta tü aʼwaajüleekat›.

Na oʼunajanakana Jerusalénmüin wainma kasa asülajünaka namüin. Naapüin Ciro tü iita nülüʼüjakat Nabucodonosor suluʼujee tü aʼwaajüleekat Jeowa chajatka Jerusalén. Wainma kasa nalüʼüjaka na israeliitakana.

Antüshii na israeliitakana Jerusalénmüin süchikijee pienchi kashi. Alatüsü 70 juya süchikijee saʼajünüin Jerusalén otta nnojoluin wayuu suluʼu. Alateerü kasa mojusü namüin na israeliita aleʼejakana Jerusalénmüin. Wekirajaa sünain tia.

Isaías 44:28; 45:1-4; Esdras 1:1-11.



Asakiraa

  • ¿Kasa naainjaka na israeliitakana suluʼu tü ayaakuaakat?
  • ¿Naainjüin Ciro tü nüküjakat Jeowa nümüin Isaías?
  • ¿Jamüsü nünüiki Ciro namüin na nnojoliikana oʼunuin Jerusalénmüin?
  • ¿Kasa naapaka Ciro namüin na oʼunakana Jerusalénmüin?
  • ¿Jeʼra kashi süpüla nantüin na israeliitakana Jerusalénmüin?
  • ¿Jeʼra juya alatüsü süchikijee nnojoluin wayuu suluʼu Jerusalén?

Asakiraa sooʼomüin

  • Paashajeʼera Isaías 44:28 otta 45:1-4.

    ¿Jamüsü nünüiki Jeowa süchiki tü pütchi ekeraajakat nutuma Ciro? (Isa. 55:10, 11; Roma 4:17.)

    ¿Jamüsü shiiʼiyatia nutuma Jeowa nükajee Ciro eein süpüla nüküjüin tü alatajatkat mapeena? (Isa. 42:9; 45:21; 46:10, 11; 2 Ped. 1:20.)

  • Paashajeʼera Esdras 1:1-11.

    Maʼaka naaʼin na nnojoliikana oʼunuin Jerusalénmüin, ¿kasa waainjüinjatka süpüla wakaaliinjüin na aʼyataakana waneepia nümüin Jeowa? (Esd. 1:4, 6; Roma 12:13; Col. 4:12.)