PIIRAKAA nümüin chi joʼuu aʼyalajakai sümaa nüchecheraain sünain sajapü tü majayütkat, chi joʼuukai nia Moisés. ¿Pütüjaa aaʼu jarat tü majayütkat? Shia nüchon Faraón.

Sünta anainchi Moisés nüchon Faraón

Ounjunnüshi Moisés sutuma tü niikat soʼu apünüin kashi süpüla nnojoluinjachin nuʼutunuin aaʼin natuma na egipciokana. Akatsaʼa shia sütüjaa aaʼu eein süpüla nuusütünüin.

Makalaka sukumajüin wanee anuachon. Shiʼitaaka Moisés suluʼu, shiʼikajaaka shia saʼakamüin tü alama sotpünaakat tü süchikat Nilo. Suluwataaka Míriam, tü nuwalakat süpüla shiʼrajüin naaʼu.

Mapa süntaka nüchon Faraón süpüla soʼoojüin. Shiʼraka tü anuachonkot sümaka sümüin wanee aʼyataasü sümüin: ‹Püsaaja tamüin tüsa anuachonkot›. Sujutalapa shia, shiʼraka wanee joʼuu aʼyalajüshi maʼin, mojuka saaʼin naalii. Nnojotsü sücheküin nuʼutunuin aaʼin chi joʼuukai.

Süntaka Míriam. Piirakaa sümüin suluʼu tü ayaakuaakat. Sümaka sümüin tü nüchonkat Faraón: ‹Eesü süpüla tasaajüin wanee israeliita süpüla shipijüin pümüin chi joʼuukai›.

‹Püsaaja tamüin›, sümaka sümüin.

Suʼunaka Míriam süpüla süküjüin shia sümüin tü shiikat. Süntapa tü niikat Moisés sümaka tü nüchonkat Faraón sümüin: ‹Pipija tamüin chi joʼuukai, tawalaajeerü pia›.

Saaʼinmajaka nia tü niikat. Miyoʼupa Moisés shiʼikajaaka nia sümüin nüchon Faraón süpüla süchonyaain nia. Miyoʼuka Moisés suluʼu nipia Faraón.

Éxodo 2:1-10.



Asakiraa

  • ¿Jarai chi joʼuu suluʼukai tü ayaakuaakat? ¿Jarat tü nüchecheraakat anain ajapü?
  • ¿Kasa saainjaka tü niikat Moisés süpüla nnojoluin nuʼutunuin aaʼin?
  • ¿Jarat tü jintut suluʼukat tü ayaakuaakat? ¿Kasa saainjaka nüpüleerua Moisés?
  • ¿Jamüsü sünüiki Míriam wanaa sümaa suusütüin nüchon Faraón chi joʼuukai?
  • ¿Jamüsü sünüiki nüchon Faraón sümüin tü niikat Moisés?

Asakiraa sooʼomüin

  • Paashajeʼera Éxodo 2:1-10.

    ¿Kasa shikirajaka anain Moisés tü niikat joʼuuiwaʼaya nia? ¿Kasa shikirajaka anain na kachonshiikana tia? (Éxo. 2:9, 10; Deu. 6:6-9; Pro. 22:6; Éfe. 6:4; 2 Tim. 3:15.)