¿PÜTÜJAA aaʼu kasa naainjaka Noé sümaa nüpüshi nojuʼitapa suluʼujee tü anuakat? Asülajüshi mürüt nümüin Maleiwa süka katüin noʼu sümaa nüpüshi süchikijee tü juya miyoʼushaatakat. Piirakaa namüin suluʼu tü ayaakuaakat.

Tü anua miyoʼushaatakat otta wanee kasüpolüin

¿Talatüshiche Jeowa sümaa tü asülajünakat nümüin? Aa, talatüshi. Sutuma tia nümaka nümüin Noé nnojoluinjanain najaʼlajeʼerüin nachikuaʼa na wayuukana süka wanee juya miyoʼushaata.

Mapa jososü süpüshuaʼa tü mmakat otta kepiaka Noé nüchikuaʼa suluʼu sümaa nüpüshi. Müshi Maleiwa namüin: ‹Wainmainjatü maʼin jüchonnii. Wainmainjana jia süpüla eeinjatüin wayuu saaʼu tü Mmakat›.

Naapapa na wayuukana süchiki wanee juya miyoʼushaata eeshii süpüla mmoluin naya seema shiʼitüin süchikuaʼa. Makalaka nujuʼitirüin Maleiwa wanee kasa süpüla sotuinjatüin waaʼin nnojoluinjatüin shipirajaain süchikuaʼa tü Mmakat süka wüin. ¿Pütüjaa aaʼu kasa tü nujuʼitirakat Maleiwa? Shia wanee kasüpolüin.

Noé sümaa nüpüshi

Weʼrüin tü kasüpolüinkat sirumatuʼu süchikijee juya sümaa wainmain sünoʼu. ¿Piʼrüirü tü kasüpolüinkat? ¿Piʼrüin tü suluʼukat tü ayaakuaakat?

Müshi Maleiwa: ‹Nnojoleena tajaʼlajeʼerüin na wayuukana otta na mürütkana süka wanee juya miyoʼushaata. Tojuʼitirüin tü kasüpolüinkat sirumatuʼu. Sujuʼitapa teʼreerü otta soteerü taaʼin tü tanüikikat›.

¿Kasa sotuinjatka paaʼin piʼrapa wanee kasüpolüin? Shia tü nünüikikat Maleiwa nnojoluinjanain najaʼlajeʼerüin na wayuukana süka wanee juya miyoʼushaata.

Génesis 8:18-22; 9:9-17.



Asakiraa

  • ¿Kasa naainjaka Noé nujuʼitapa suluʼujee tü anuakat? (Piirakaa sümüin tü ayaakuaakat).
  • ¿Jamüsü nünüiki Maleiwa nümüin Noé otta namüin nüpüshi?
  • ¿Kasa tü nnojoluinjatkat naainjüin Maleiwa süchikuaʼa?
  • ¿Kasa sotuinjatka paaʼin piʼrapa wanee kasüpolüin?

Asakiraa sooʼomüin

  • Paashajeʼera Génesis 8:18-22.

    Kasa waainjüinjatka süpüla talatüinjatüin naaʼin Jeowa? (Gén. 8:21; Heb. 13:15, 16.)

    ¿Jamüsü nünüiki Jeowa süchiki sukuwaʼipa naaʼin na wayuukana? ¿Kasa tü kanainjatkat waaʼin? (Gén. 8:21; Mat. 15:18, 19.)

  • Paashajeʼera Génesis 9:9-17.

    ¿Jamüsü nünüiki Jeowa namüin na wayuukana otta namüin na mürütkana? (Gén. 9:10, 11.)

    ¿Jeʼrainjatü kaʼi pansaain tü nümakat Jeowa süchiki tü kasüpolüinkat? (Gén. 9:16.)