Wainma Biblia nekirajaaka aka na aküjaliikana pütchi nüchiki Jehová, shiapejeʼe kojutuleein namüin tü Biblia kanüliakat Namüinjatü na Wayuu Kepieenakana Suluʼu tü Mma Jeketükat. Eesü shia suluʼu wainma anüikii, eesü tü nünüliakat Maleiwa suluʼu otta pansaasü tü sümakat.

•   Eesü nünülia Maleiwa suluʼu. Suluʼu waneirua Biblia nnojotsü aküjünüin nünülia Maleiwa. Jamüsüjaʼa suluʼu wanee Biblia akumajünaka, ashajünüsü nanülia maʼaka 70 wayuu aʼyataakana sünain ashajaa shia, nnojotpejeʼe eeyaain neʼitaain uwatuayaakalüjeʼe tü nünüliakat Maleiwa, Jehová.

   Suluʼu Namüinjatü na Wayuu Kepieenakana Suluʼu tü Mma Jeketükat, ashajünüsü tü nünüliakat Maleiwa eeinjatüle shia, maʼaka sutuma tü ashajuushi sümaiwajatkat otta nnojotsü eʼitaanüin nanülia na akumajakana shia.

•   Pansaasü shia. Wainma Biblia nnojotka pansaain atuma süküjia wanee wetsiikulo. Maʼaka saaʼin tü sümakat Mateo 7:13, tü makat mayaa: «Jikeroto suluʼu tü puettoʼu mouisükat, tü puettoʼu jee wopu sünainmüinjatkat eere saʼajünüin wayuu, jerutsü jee miyoʼu». Akatsaʼa suluʼu tü ashajuushi sümaiwajatkat, «saʼajia wayuu» nnojotsü müin, «tü kaluʼukalü outaa» müsü. Eeka naaʼinruʼu na ashajakana tü Bibliakat, müliayaashii na wayuukana naaʼinruʼu saʼaka siki. Nnojotpejeʼe shikirajüin tia tü Bibliakat, müsüjeseʼe «tü kaluʼukalü outaa» sümüin tü Biblia kanüliakat Namüinjatü na Wayuu Kepieenakana Suluʼu tü Mma Jeketükat maʼaka süküjain tü ashajuushi sümaiwajatkat.

•   Mapüleesat ayaawataa. Anale süshajia wanee Biblia, pansaasü tü sümakat jee mapüleesat ayaawataa. Jülüjaa waaʼin tüü, eesü waneirua Biblia aküjaka Mateo 5:3 mayaa: «Anataʼaleeshiijaʼa na mojukana anoula». Nnojotsü nayaawatüin aaʼu shia na wayuukana maaʼulu yaa. «Anakuwaʼipalii na wayuu ayaawatakana saaʼu choʼujaain chi Maleiwakai namüin» müsüjeseʼe sümüin tia wetsiikulokot sutuma tü Bibliakat Namüinjatü na Wayuu Kepieenakana Suluʼu tü Mma Jeketükat mayaa.

 Eepejeʼe sooʼomüin kasa anaka maʼin atuma tü Bibliakat Namüinjatü na Wayuu Kepieenakana Suluʼu tü Mma Jeketükat, shia shiitajünüin sümüin wayuu sümaa nnojoluin süchekajünüin nneerü saaʼu. Sutuma tia, wainma maʼin na wayuu eekana süpüla naashajeʼerüin tü Bibliakat suluʼu nanüiki, jaʼitairü nnojoluin eein nneerü namaʼana süpüla nayaʼlajüin wanee.