Hem soddun content-ant vochat

Hem soddun table of contents-ant vochat

 10

Solomon Budvontkaien Raz Choloita

Solomon Budvontkaien Raz Choloita

Jehovah Solomonak zannvaiechem kalliz dita. Solomonache razvottkent Israel lok sor korunk zaina tosli xhanti ani udorgot bhogtat

AK’KHEM raxttr ani tacho raza, zori Jehovahk Sorvespor koso man’nun ani tacheo adnia pallun Tacho pattlav kelear tanchea jivitacher kitem porinam zait? Hacho zabab Solomon razachea 40 vorsamchea razvottkechea karbarant dison aila.

Davidan apunn morchea adim, aplea putak Solomonak hakdhar nemlo. Dev sopnant ieun Solomonank ek dennem magunk sangta. Solomonan lokachi boreponnan ani xannemponnan monxubi korunk zannvai ani ginean maglem. Jehovah khoxi zalo ani Solomonank tannem zannnvaiechem ani somjikaiechem kalliz dilem. Anikui, Jehovah apleo adnia samballit ravlo zalear taka girestkai, mohima ani lamb auk ditolo mhonn bhas dita.

Aple zannvaien kel’lea niti pasot Solomon nanvadik zalo. Eka khottleant, don ostoreo ek lhan cheddea bhurgeak lagon huzot kortalim, zonn eklim apunnunch tachi avoi mhonnon hok’k dakoitalim. Solomonan tea ballkak katrun don kudke korun dogaim ostoreank diunk hukum dilo. Ek ostori raji zali, punn khore avoin rokddich vinoti keli ki ballkak poile ostorekuch diunchem mhonn. Solomonank atam sarkem gomlem ki moipaxi ostori khori avoi mhonn ani ballkak tikach dilem. Rokddench soglle Israelant hi nitichi khobor pavli, ani lokak Solomonak Devachi zannvai asa mhonn dison ailem.

Jehovahchem mondir bandop mhunnttlear Solomonak ek vhoddlem zoit zavun aslem. Hem bandlolem mondir Jerusalemant bhov sobit zavun aslem. Jehovachi bhokti korunk Israel lokanchem hem ek mukhel thikann zavun aslem. Mondirachea somorponnachea vellar Solomonan oxem magnnem kelem: “Polle, sorg ani unchlo sorg porian tuka attapunk xokona; tor hanvem bandlolea ghorant tum koso attaptoloi!”—I Raza 8:27.

Solomonachi kirti heram raxttrank pavta, poixilea Arabiachea Xeba desant poriant kollon ieta. Solomonachi mhoima, girestkai ani tachi zannvai pollounk Xeba desachi ranni taka bhett diunk ieta. Solomonachi zannvai ani Israel desachi udorgot pollovun ti ranni sontosli anik sodrer Solomona sarko xanno raza bosoilo dekhun tinnem Jehovahk Devak vak’khannlo. Khoreaninch, Jehovahchea besavam udexim Solomonachi razvott adlea Israelanchea itihasant sogllea poros chodd udorgotichi ani xhantichi asli.

Dukhachi khobor mhunnttlear, Solomon Devachea zannvaie pormonnem vagunk chuklo. Devacheo adnia beporva korun xekddeanim ostoream lagim to logn zalo, tantleo zaiteo porkeam devank bhoztaleo. Holluch tachea bailannim tachem kalliz Jehovah thaun pois kelem anik murteank bhokti korunk lailem. Jehovahn Solomonank tache razvottkecho hisso kaddun ghetolo mhonn kolloilem. Devan Solomonank sanglem, ki tujea bapaik Davidak bhas dil’li dekhun tujea kuttumba lagim fokot ek hisso urtolo. Zorui, Solomonan Jehovahchi bhokti soddli torui Jehovah Davidaxim kel’lea Razvottkechea korarak visvaxi ravlo.

I Raza avesvor 1 te 11; II Itihas avesvor 1 te 9; Dusri Somurt 17:17 hacher adarlelem asa.