Hem soddun content-ant vochat

Hem soddun table of contents-ant vochat

 3

Monxakull Buddtentlean Salvar Zata

Monxakull Buddtentlean Salvar Zata

Dev noxttea sonvsaracho nas korta punn Noahk ani tachea kuttumbak samballta

ZOXEM MONXAKULL vaddlem, patok ani noxtteponn sonvsarant chodd vegin fankarlem. Enok nanvacho ek eksuro provadi, Dev ek dis obhokti lokacho nas kortolo mhonn xiddkavnni bhakit kortalo. Torui-punn, vaittponn unnem zavunk na punn odhik vaddlem. Thodde devdut sorgar tankam dil’le zage soddun Jehovah Devacher virodh gele. Te sonvsaracher ieun, monxachem rup ghetlem ani ass bhagovunk ostoreank apleo bailo korun ghetleo. Tannim soimba add ekvott zoddun bollixtt sonsot utponn keli - tankam Nefilim mhunnttat, zankam lagun sonvsaracher chodd promanan zulum anik rogot varoup vaddlem. Apnnem sonvsarant monxank rochlim ani tim khottim zalim mhonn Jehovah dukhi zalo ani tachea kallzak khont zali.

Enok melea uprant, tea khottea sonvsarant ekuch monis soglleam poros vegllo aslo. Tachem nanv Noah aslem. To ani tachem kuttumb Devache nodren kitem sarkem asa tem korunk vavurtalim. Devan sonvsarantlea vaitt lokacho nas korunk tharailem, tedna Noahk ani zonvarank samballunk ieujilem. Dekhun, Devan taka vorixtt choukonni tarum bandunk sanglem. Tantunt, Noah ani tachem kuttumb, toxench tanchea sangata zaitea torechim zonvaram ieunche aslelea sonvsarantlea buddtentlean salvar zaunchim aslim. Noahan Devachem utor pall’lem. Noahan tarum bandunk 40 vo 50 vorsam sarlim teach borobor to “jivitacho porgottnnar” aslolo. (II Pedru 2:5) Tannem lokak ieunchea asa tea buddte vixim xiddkavnni dili, pun tannim tachi beporva keli. Noah ani tachem kuttumb zonvaram borobor tarvant bhitor sorpacho vell pavlo. Te bhitor sorlea uprant Devan tarvachem dar bond kelem. Pavs suru zalo.

40 dis ani 40 rat pavsache vhall, ak’khi prithum buddo sor rokhle. Sogllea noxttea monxancho nas zalo. Zaitea mhoinea uprant, zoxem udok denvlem, tarum ek dongracher ieun tharlem. Noah ani tachem kuttumb ani zonvaram tarvantlim surakxit denvlim mhonnosor, ak’khem ek voros sorlem. Noahan Jehovahk dhinvasnnecho ek iodn bhettoilo. Tedna Devan Noahk ani tachea kuttumbak, portun sonvsaracher soglle jive rochnnek buddti dhaddun kednanch kobar korcho na mhonn khatri dili. Hi bhuzvonechi bhasavnni khatrechi mhonnon ugddasak Jehovahn ddondduballachi ek khunna dili.

Buddte uprant, Devan monxakullak thoddeo noveo adnia dileo. Tannem tankam zonvarachem mas khaunk porvangi dili. Torui astana, tannem tankam rogot khaunk porvangi diunk na. Tannem Noahchi sonsot prithumecher vistarunkui adnia dil’li, punn tantlea thoddeanim ti pallunk na. Lok Nimrod nanvachea fuddarea khala ektthovle, ani Babel xarant ek vhoddli tor bandunk suru keli, uprant taka Babilonia mhonnttlem. Ak’khea sonvsaracher vistarpachi Devachi adnia thoddunk tancho udhex aslo. Punn Devan tea fittureanchi ievzonn xarti pavunk diunk na, Tannem tanchi ek bhas asli, te bhaxecho gondholl korun tankam jinsavar bhasamnim uloum-xem kelem. Eka mekachi bhas sozmonk xokona zal’lea udexim, tannim tem bandh-kam ordhem soddun te ximpoddle.

Utpoti avesvor 6 te 11; Judas 14, 15 hacher adarlelem asa.