Hem soddun content-ant vochat

Hem soddun table of contents-ant vochat

 CHODD MAHITI

Khore Kristanv Khuris Kiteak Uzar Korinant?

Khore Kristanv Khuris Kiteak Uzar Korinant?

LAK’KHAMNIM lok khursacho khub mog korta ani taka man dita. The Encyclopedia Britannica (Inglez bhaxen) khursak, “Kristi dhormachi gorjechi khunna” oxem mhunntta. Toxem zalear, khore Kristanv bhokti korunk khuris kiteak uzar korinant?

 Ek gorjechem karonn mhunnttlear, Jezu Krist khursar moronk naslo. “Khuris” hea utrak Grik bhaxen stau-ros hem utor uzar kelam. Stau-ros hacho orth “ek ubo khambo vo boddi.” The Companion Bible (Inglez bhaxen) sangta, “Don lankddache kuddke koxe-i ritin eka-mekacher dovrop oso [Stau-ros] hacho kednanch orth naslo. . . . Grik bhaxechea [Novea Korarant] don lankddam ektthaim haddun kitem-i kel’lem oxi somzonni dita toslem kainch naslem.”

Bible-achea boroupeamnim zaitea zagear, Jezu kiteacher melolo taka anik ek utor uzar kelam. Grik bhaxen tem utor asa xy’lon. (Itihas 5:30; 10:39; 13:29; Galasiekarank 3:13) Xy’lon hacho orth, “lankudd” vo “boddi, danddo vo zhadd”.

Gollar marunk ek lankudd kiteak uzar kortale tachea vixim, Hermann Fulda ho boroupi amkam chodd mahiti dita. The Cross and the Crucifixion, hea German bhaxechea aplea pustokant to mhunntta, “Gollar marunk vhortale tea zageancher zhaddam sompeponnim mello naslim. Ani taka lagon te zomnint ek ubo khambo purtale. Tacher te, khast favo zal’leache hat voir korun bandtale vo khillaitale. Toxench, tanchea paim-ankui sokol bandun dovortale vo khille martale.”

Punn sogleam poros chodd puravo amkam Bible-ant melltta, ani tacher ami visvas dovrunk zata. Apostl Paulu mhunntta, ‘Apunnuch amche khatir xirap poddlolo zaun, Kristan amkam Somurtichea xirapantlim soddoun ghetlim; tor Povitr Pustokar oxem boroilolem asa: “Lakddar [‘zhaddar,’ King James Version (Inglez bhaxen)] umkollta to monis xirap poddlolo.”’ (Galasiekarank 3:13) Hanga Paulu, Dusri Somurt 21:22, 23-ant boroilolem asa tem amchea ugddasak haddtta. Hea vachpant Hebrev bhaxen, gollar marunk lankudd uzar kel’lem mhunn sanglam, khuris nhoi. Ani, ek gollar marlolo munis xirap haddtta zalear, gollar marlolea Kristachi imaz amchea ghorant dovorop sarkem zatolem?

Jezu moron 300 vorsam pasun, Kristanvamnim aple bhoktent khuris uzar kel’lo mhunn amkam khoinch  puravo mellona. Punn Jezu moron 400 vorsam uprant, kudd’ddea devank bhozpi Constantine raza, khotto Kristanv zalo, ani apleachi khunna mhunn khuris uzar korunk laglo. Tannem oxem kiteak kelem tem khobor na, punn tea khursacho ani Jezu Kristacho kainch sombond naslo. Khorem mhunnttlear ho khuris, kudd’ddea devanchi bhokti kortat tanchea thaun aila. The New Catholic Encyclopedia (Inglez bhaxen) manun gheta ki, “Kristanv dhorm ieunchea poilim aslole lok ani her dhormache lok khuris uzar kortale.” Adle lok, soimbachea xoktenchi, ani her khottea devanchi bhokti kortana khuris uzar kortale mhunn her purave asat.

Toxem zalear, khottea dhorma thaun ailolo ho khuris, soglo lok kiteak uzar korunk laglo? Chodd korun, khottea devanchi seva kortolea lokank, “Kristanv dhorm” apnnaunk sompem zaunchea khatir tannim oxem kelem. Punn khottea dhorma thaun ailolea khoinchea-i vostunchi bhokti korchi nhoi mhunn Bible-ant sanglam. (2 Korintkarank 6:14-18) Toxench, kosleach torechea murteanchi puza korop chukichem, hem-ui Bible-ant boroilolem asa. (Suttka 20:4, 5; 1 Korintkarank 10:14) Hea soglea karonnank lagon, khore Kristanv aplea bhoktent khuris uzar korinant. *

^ per. 1 Khursa vixim chodd zannam zaunk Jehovachea Sakxeamnim chhaplolea, Reasoning From the Scriptures (Inglez bhaxen), hea pustokachem pan 89-93 polloiat.