Hem soddun content-ant vochat

Hem soddun table of contents-ant vochat

 AMCHEM KRISTI JIVIT

Deva Pasot ani Xezaream Pasot Amcho Mog Ami Koso Vaddounk Zata?

Deva Pasot ani Xezaream Pasot Amcho Mog Ami Koso Vaddounk Zata?

Kristanv lok atam Moizesachea kaidea khala nant, punn Jehova amchea thaun kitem magta tem tantunt aslolea somurtichea vhoddlea don adneant mellon asa. Tem mhunnttlear, Devacho ani xezareancho mog korop. (Mt. 22:37-39) Ho mog apxinch iena punn utpon korcho poddtta. Koso? Ek mhotvachi vatt mhunnttlear, sodanch Bible vachun. Bible-ant ami Devachea veg-vegllea gunnam vixim vachtat tednam ami Jehovachi ‘ghoddsann chaktat’ vo tachem boreponn onnbhovtat. (St. 27:4) Oxem kel’lean, Jehova pasot amcho mog vaddtta ani ami tachea sarkim chintunk lagtat. Tea vorvim, tache kaide pallunk, zoxem, eka-mekak svarth naslolo mog dakhounk amkam urba melltta. (Ju. 13:34, 35; 1Ju. 5:3) Bible vachop chodd khuxalkaiechem zaunk, sokol tin suchounneo dileat:

  • Chintun polloiat. Vachtat tednam, tumi tea munxa sangata tea poristhitint asat mhunn chintat. Thoim ghoddtta tem soglem tumkam dixtti poddtta kai? Aikonk ieta kai? Vo sorvbhonvtonncho vas tumkam ieta kai? Tea vellar tankam koxem bhoglem astolem? Hem soglem tumi chintunk zata.

  • Veg-veglleo riti uzar korat. Tumchean vhoddlean vachunk zata vo rekodd kel’lem vachop aikotana Bible-ant pollounk zata. Eka-fattlean-ek odheai vach’chea bodlek, Bible-antlea eka munxa vixim vo eka vixoi-a vixim vachat. Udharonnak, Jezu vixim vachtat zalear, Jezuchea Jivitachem Nimannem Suman hacher dil’li mahiti uzar korat (jw.org/gom/prokaxonam, hacher polloi). Daily text-antlem disachem vers jea odheai-a thaun vinchlam, to odheai vachat. Bible-achim pustokam jea vorsa boroil’lim tea manddavollin Bible vachat.

  • Somzonni mellonk vachat. Zaite odheai vachun, vachop kabar korche suvater, dor disa ek odheai vachun tachi somzonni gheiat ani magir tacher niall korat. Tantunt dil’li mahiti kednam ani khoinchea poristhitint boroil’li tem polloiat. Tantuntlea bariksannechea mahiticher sodh korat. Nokso vaprat, ani vachtat tea versak lagu zatat toslim dusrim versam ugddun polloiat. Vachtana je vixoi somzonk nant tantuntlea ek vixoiacher tori sodh korat. Zata zalear, vachunk ghetat titloch vell niall korunk-ui gheiat.