Hem soddun content-ant vochat

Bible-achi Xikounn Koxi Gheunk Zata?

Bible-achi Xikounn Koxi Gheunk Zata?

Jehovache Sakxi Bible-achea adaran tumchea monant aslolea zaitea prosnanche zobab diunk xoktat. Zoxe,

  • Dev Konn?

  • Devak mhoji kallji asa kai?

  • Hanv mhojem kazari jivit sukhi koxem korunk xoktam?

  • Hanvem mhojem jivit khuxalkaiechem koxem korunk zata?

Bible-achi xikounn koxi gheunk zata hea vixim vincharlolea prosnanche zobab sokol dilole asat.

Tumi Bible-achi xikounn koxe ditat?

Ami, “Dev” vo “kazar” oxea khoinchea-i eka vixoi-acher Bible-antle veg-veglle vers kitem sangtat tem polloitat. Tea vixoi-acher dor ek vers kitem sangta tem polloun Bible khoreponnim kitem xikoita tem ami nialltat. Hea toren amkam Bible-achi sarki somzonni melltta.

Bible-achi xikounn gheunk ami Bible Khorench Kitem Xikoita? hea pustokacho adar ghetat. Hea pustokant amkam, Deva vixim, Jezu vixim, fuddara vixim ani toxench her mhotvachea vixoi-ancher, Bible kitem xikoita tem suttavem korun dakhoilam.

Bible-achi xikounn gheunk kitle poixe farik korche poddttole? Ho Bible kors funkott asa. Toxench, thoim uzar kortat tim pustokam viktim gheunchim poddona.

Bible-achi xikounn gheunk kitlo vell boschem poddttolem? Amchea sangata Bible xikonk zaito lok, dor sumanak sumar ek vor ditat. Punn tumi-i ek vor bosonk zai oxem na. Tumkam zai toso ho vell tumchean tharaunk zata.

Mhaka Bible-achi xikounn gheunk zai mhunn hanvem sanglear kitem zatolem? Tumkam Bible xikonk zai mhunn sanglea uprant, Jehovache Sakxi, tumkam zai tea vellar ani zagear ieun mellttole. Bible-achi xikounn gheunk, amchi manddavoll koxi asa ti thoddea mintam bhitor, tim tumkam dakhoitolim. Tumkam ti bori disli zalear, tumchean fuddem xikonk zata.

Bible xiklea uprant mhaka Jehovacho Sakxi zaunk poddttolo kai? Na. Lokank Bible xikounk Jehovachea Sakxeank borem dista punn tumcho dhorm bodlunk te tumcher kednanch dobav ghalchena. Ami fokot tumkam Bible-antlean xikoitat. Fuddem kitem korchem tem tumchea hatant asam karonn dor eka munxak aplo nirnnoi gheuncho hok’k asa.—1 Pedru 3:15.