Hem soddun content-ant vochat

Vorsavollichea Mittingecho Riportt

“Vogtar Jevonn”

Vorsavollichea Mittingecho Riportt

6 Otumbr 2012-ant, Watch Tower Bible and Tract Society of Pennsylvania-nt 128-avi vorsan-voros zaupi mitting zali. Hi mitting U.S.A. desantlea, Jersey xarant aslolea Jehovachea Sakxeanchea zomatichea holant zali.

Tea holant sumar 5000 lok ailole. Ani sumar 10,000 lokamnim video udexim hi kariavoll Brooklyn, Patterson, Wallkill, New York ani Canada-nt aslolea amchea xakha ofis-antlean aikoli. Hi mahiti aikon, soglim urbebhorit zalim. Toxench Matev 24:45-47-a vixim somzonnim mell’llolean tim khuxal zalim.

Jehovachea Sakxeanchea Sonchalon Monddollicho Bhav Anthony Morris hea mittingecho chermen aslo. Tannem fattlea vorsamnim zalolea mittingencho ugddas korun dilo ani urba haddli. Hea vorsachi mittingui urba ditoli mhunn lokank khobor asli, punn ‘hi mitting ugddas urta toxi zatoli kai?’ mhunn te chitunk poddle.

Tea uprant sonvsarbhor zata tea kamam vixim don video dakhoile.

Raj-ghoranchem Bandhkam:

Gorib desamnim dekhun borea toren Raj-ghoram koxe bandhtat tem hea video-nt dakhoilam. Fattlea 13 vorsamnim Raj-ghor bandhpachea zomeanim 25,402 Raj-ghoram bandhlim. Hacho orth eka disak pancham poros chodd Raj-ghoram bandhun zatalim. Him Raj-ghoram sonvsarbhor aslolea Jehovachea Sakxeanim ap-khuxen dilolea dennea udexim bandhleant. Toxench khoinsorui vaddoll ailem zalear Raj-ghoram bandhunk onnbhov aslole bhav, thoim trasant poddloleank adar diunk ani thoinchim Raj-ghoram vo tea lokanchim ghoram sarkim korunk voitat.

Khas Odhivexonam:

2012 hea vorsa Jehovachea Sakxeanim zaitea khas odhivexonanchi manddavoll keloli. Hea odhivexonak veg-vegllea desantlean Sakxi ailole. Punn hea odhivexona modem ani ontoraxttria odhivexona modem kitem ontor asa?

Jea desant odhivexonam zalim tea desachea xakha ofisan, thoim ieupi lokank modot korunk lagon thoddi toiari keli. Tankam ravonk hotelamnim room book kele, toxench ieunk-vochonk gaddi, ani odhivexonachea sumanak donparchea jevonnachi manddavoll keloli. Dor odhivexonak veg-vegllea desantle sumar 1,500 lok ailole ani hem soglem dusrea video-nt dakhoilolem.

Dusrea desa thaun ailolea Sakxeank ani jea desant odhivexon zata tea desachea Sakxeank eka-mekachi vollokh korun gheunk hi ek bori sondi mell’lli. Karonn tim odhivexonak sangata aslim, sangata veg-veglle zage pollounk gelim, sangata jevlim ani thoim ravpi lokank Devachea Rajea vixim porgott kelem. “Aiz porian zalolea soglea odhivexonak bhavam-bhoinni modem ekvott pollounk mell’lla ani ho ekvott tanchea modem aslolea mogak lagon asa” oxi mahiti video-nt diloli.

Dor vorsa Jehovachea Sakxeanchim khas odhivexonam thoddea vinchun kaddlolea xaramnim zatolim mhunn kolloile. Hem aikon, hea mittingent ailolo soglo lok khuxal zalo.

Hea mittingechea fuddlea bhagachi mahiti:

Vollokh Korun Gheunk Onnbhov:

Xakha somitint aslolea tin bhavamnim ani tanchea bailamnim aple onnbhov sangle. Tannim sogleanim kelolea purnn-vell sevechim vorsam mezlim zalear 342 zatat. Tankam dilolem veg-vegllem kam korunk Jehova Devan tankam koxem xikoilem ani modot keli tem tannim sanglem.

Germany desantlea xakha somitintlo Bhav Richard Kelsey, xakha somitichea vangddeank ani tanchea bailank aslolea korsak gelolo. Thoim to, “Jehova kitem sangta tem sodanch korunk zai” mhunn xiklo. Jehova Dev amcho mogall bapui zalolean to sodanch amchem borem chinta. “Ami sasnak hea prithumer jielolim taka zai ani amchi kallji gheunk to kitem-i korunk xokta” oxem Bhav Kelsey-n sanglem. Hea korsant, xakha somitichea soglea vangddeank Jehova Deva bhaxen mogall zaunk xikoilem.

1958 hea vorsa Linda Johansson hea bhoinnik Gilead korsak apounnem mell’llolem. Tednam ticho bautizm zaun oddez vorsam zalolim ani kazar zaun fokot ek voros zalolem. Ti mhunntta, “Hea korsak hanv khub onnbhov aslolea bhavam-bhoinnim modem aslolem. Hanv hanga asonkuch zaina aslem oxem mhaka dislem.”

Torui astana bhoinn Johansson-an bore bhaxen aplo kors sompoilo. Graduation zalea uprant tika ani tichea ghovak Malawi desant mixinori mhunn dhaddlim. Tea desant Jehovachea Sakxeank borech tras kortale. Torui astana, bhoinn eka sorkari odhikareak Bible-a vixim xikoitali, zo adim Jehovachea Sakxeancho virodh kortalo. Ani aiz tea sorkari odhikareachi bail, put ani dhuv bautizm gheun Jehovachim Sakxi zaun asat.

Khoinchea-i Zagear Porgottnechem Kam:

Kristanv zoddpeam pasot aslolea Bible korsak gelolea char graduate-anim ani New York xarant, Jehovachea Sakxeanchea sobhank bhett diupi eka voddilan aple onnbhov sangle. Porgottnnecho vavr kortana, tim koxim zaitea lokam lagim ulounk xoklim, tem tannim aplea onnbhovant sanglem.

Purnn vellechi seva korpi Jehovache Sakxi, chodd lok ravta toslea xarant, mez ani kartt uzar korun Bible-acher adarit prokaxonam dovortat. Thoinchean pasar zata tea lokank him prokaxonam gheunk mellttat, Bible-a vixim prosn vincharunk melltta ani Bible xikonk zai zalear sangonk melltta.

New York xarachea her bhagamnim aslolea Sakxeamnim toxench Chicago ani Los Angeles hea xarant aslolea Sakxeamnim heach ritin lokank mellpacho proitn kelo. Ani eka vorsa bhitor, mez ani kartta lagim ailolea lokam modlea, sumar 2,700 lokamnim tankam Bible xikpachi khuxi asa mhunn sanglem.

Bhurgeanim Gailolem Git:

Sing to Jehovah hea pustokantlean, 17 bhurgeamnim “Listen, Obey, and Be Blessed” hem git gailem tedna zaitea zannanchea dolleant dukam ailim (Git 120).

Tea uprant sov lhan bhaxonnancho porisonvad aslo. Tea porisonvadache bhag Sonchalon Monddollintle Bhav Jackson, Lösch, Pierce, Herd, Lett, ani Splane hannim dilem. Tantunt tannim Matev 24:45-47-ant dilolea Jezuchea utranchi bariksannen somzonni dili. Thoim Jezun mhunnttlam,

“Ghorant asloleank vogtar jevonn diunk dhoni visvaxi ani xannea chakrak aplea ghorabeacher odhikar dita: oslo chakor konn zait? Aplo dhoni ieta tea vellar aplem kam korta thoi taka mellot to chakor subhagi. Hanv tumkam khorench sangtam: to taka soglle aple dovloticher odhikar ditolo.”

Porisonvadant sokol dilolea prosnanche zobab mellttole.

Jezu Kristan “Visvaxi Ani Xannea Chakrak” Aplea Ghorabeacher Kednam Odhikar Dilo?

Matev 24-ant Jezu kitem sangonk sodtalo tachea vixim chintat. Him soglim versam “kallachea xevottak” mhunnttlear Kristachea ienneachea vellar purnn zaunchim aslim.—Vers 3.

  • “Tea disancho sontap.”—Vers 29.

  • “Hi pinddka.”—Vers 34.

  • “Tea disachi ani te ghoddiechi.”—Vers 36.

  • “Somi khoichea disa ietolo.”—Vers 42.

  • “Tumi chintinant te ghoddier Monxacho Put ietolo.”—Vers 44.

Toxem zalear, 1914-ant Krist sorgar Raja zalea uprant tannem “visvaxi ani xanno chakor” nemlo astolo.

“Visvaxi ani xanno chakor” Jezun kednam nemlo? Hea prosnak zap zannam zatolim zalear ami “visvaxi ani xanno chakor” konn? ho prosn kednam ubo zalo tem zannam zavop gorjechem. Jezuchea apostolank povitr xoktechem dennem mell’llolem dekhun, Jezu melea uprant oso prosn vincharunk tanche kodde kainch karonn naslem. (1 Korintkarank 14:12, 24, 25) Apostlank povitr xokte udexim vinchun kaddlole, torui astana, te ani tea vellar ravpi her Kristanv, Jezun sanglole te “visvaxi ani xanne chakor” nasle.

Ho prosn “kallachea xevottak” mhunnttlear Jezu sorgar Raza zalo tednam ubo zalo. Hachea voilean, kallachea xevottachea vellar Jezun “visvaxi ani xannea chakrak” aplea ghorabeacher nemlolo mhunn kollon ieta.

“Visvaxi Ani Xanno Chakor Konn?”

Jezun “chakor” mhunnttlem tedna to ekach munxa vixim nhoi punn zaitea munxam vixim uloitalo. Te sogle ekvottan kam kortole mhunn to sangtalo. Hea chakrak (1) “aplea ghorabeacher” odhikar cholounk ani (2) ghorabeant asloleank Deva vixim “vogtar jevonn diunk” nemla oxem Jezun mhunnttlem.

1919 thaun Jehovachea Sakxeanchea mukhel ofisant, ek lhan zomo, sonvsarbhor cholta tea porgottnnechea kamachi dekh-rekh korta. Toxench Deva vixim dusreank somzonnim diunk mahiti toiar korta ani veg-vegllea zageancher dhaddtta. Halinchea vorsamnim tea zomeak Jehovachea Sakxeanchem Sonchalon Monddoll mhunnttat.

Hem soglem amkam dakhoun dita ki, “visvaxi ani xannea chakrak” Jezuchea ghorabeacher 1919 hea vorsak nemlo. Ho chakor mhunnttlear, obhixikt Kristanvancho ek lhan zomo, zo Krist sorgar raza zalea uprant thaun sonvsaracher asa . Ho zomo, Jehovachea Sakxeanchea mukhel xakhe thaun sonvsarbhor Devachea lokam pasot “jevonn” toiar korta, mhunnchem, Devachi xikounn dita. Hea lhan zomeantle sogle munis sangata, ek sonchalon monddoll koxe vavurtat. Hem sonchalon monddoll, “visvaxi ani xanno chakor” zaun asa.

‘Ghorant Aslole’ Lok Konn?

Ghorant asloleank “vogtar jevonn” diunk apunn ek chakor nemtolo mhunn Jezun sanglolem. Ho “visvaxi ani xanno chakor” Jezuchea soglea xisank vella-vellar Devachi xikounn dita. Dekhun Jezu Kristache sogle xis, zaum te obhixikt Kristanv vo ‘her menddram,’ te tachea ‘ghorant aslole’ lok zaun asat.—Juanv 10:16.

Bhaxonn ditolea bhavan Jezuchea hea bhasaunnechi somzonni dilea uprant thoim aslole sogle lok khub vell ttallieo marit ravle. Jezu tankam-i ‘aplo ghorabo’ mhunn manta hem somzolea uprant thoim aslolim zaitim zannam khub khuxal zalim.

Jezu Chakrak “Soglle Aple Dovloticher” Kednam Odhikar Ditolo?

“Dhoni ieta tea vellar” to chakrak “soglle aple dovloticher odhikar ditolo” mhunn Jezun sanglolem. Ho dhoni vo Jezu kednam ieta?

“Ieta” hem utor Grik bhaxechea erʹkho·mai hea utrantlean ghetlam. Matev 24 odheai-achea 42 ani 44 versant erʹkho·mai hem utor “ietolo” oxem bhaxantor kelam. Hea versamnim Jezu apunn vhodd sontapachea disamnim zoddtti gheunk ietolo, tea vixim uloitalo.—Matev 24:30; 25:31, 32.

Toxem zalear, Jezu “chakrak” aplea “dovloticher odhikar ditolo” hem fuddem ghoddttolem mhunn kollon ieta. Ho odhikar, Jezu vhodd sontapachea disamnim ditolo.

Jezuchi ‘Dovlot’ Mhunnttlear Kitem?

“Sorgar ani sonvsarar Devan Mhaka sogllo odhikar dila” mhunn Jezun sanglolem. (Matev 28:18) Taka lagon Jezuchi ‘dovlot’ fokot prithumer asa titlinch nhoi, punn sorgar asa tem-ui attapun asa. Tantunt Jezu Kristachi ek hozar vorsanchi razvottki pasun mellon asa.—Filipkarank 2:9-11.

Xevottak Jezu “visvaxi ani xannea chakrak” mhunnttlear hea zomeantlea dor ek munxak, meloleantlo jivo kortolo ani sorgar jivit favo kortolo. To tankam sorgar ani sonvsarant aslolea aplea dovloticher raz cholounk odhikar ditolo. Soglea visvaxi obhixikt Kristanvank Jezun hench dennem bhasailam.—Lukas 22:28-30; Prokasovnni 20:6.

Porisonvadachea nimannea bhaxonnant Bhav Splane-an ek khas kollounni keli. Matev 28:20 hem vers vachlea uprant tannem mhunnttlem, “Amcho visvas ghott korunk anink ek karonn asa ani hem karonn amkam 2013 vorsak lagon vinchlolea Bible versant melltta. Tem vers Joshua 1:9. Thoim mhunnttlam, ‘Bollixtt ani thir ghott rav... Jehova tuzo Dev tuje sovem asa.’”

“Fuddlea vorsa vixim kitem?” oso prosn vincharun Bhav Morris mukhar mhunntta, “Fuddlea vorsa, Jehovachea Sakxeanchi vorsavollichi mitting, 5 Otumbr 2013 hea disa tharailea. Hi mitting United States-ant ani Inglez bhas uloita tea dusrea desantlea thoddea holamnim aikonk ani pollounk manddavoll kortole.”

Hi kariavoll fokot Inglez bhaxen zatoli. Ti dusrea bhaxent bhaxantor korchenant.

Itlea urbebhorit kariavolli uprant, sogleanim kallzant thaun “The Light Gets Brighter” (Git 116) hem git gailem. Thoim mhunnttlam,

“Our Lord has appointed a trustworthy slave,

Through whom He gives food in due season.

The light of the truth has grown brighter with time,

Appealing to heart and to reason.”