1, 2. Quen foron algúns dos amigos de Xehová?

QUEN queres que sexa o teu amigo? Seguro que alguén con quen te leves ben, que sexa amable e que teña calidades que che gustan.

² Xehová escolleu algúns humanos como amigos. Un deles foi Abraham (Santiago 2:23). David tamén foi amigo de Deus. Para Xehová era alguén moi agradable. De feito, dixo del que era un “home conforme o meu corazón” (Feitos 13:22). E do profeta Daniel dixo que era “un predilecto”, alguén a quen estimaba moito (Daniel 9:23).

3. Por que Abraham, David e Daniel foron amigos de Xehová?

³ Por que Abraham, David e Daniel foron amigos de Xehová? Xehová díxolle a Abraham: “Por me teres ti obedecido” (Xénese 22:18). Xehová é amigo dos que son humildes e o obedecen. Mesmo pode ser amigo dunha nación enteira. El explicoulle á nación de Israel: “Escoitade a miña voz: Eu serei o voso Deus, e vós seréde-lo meu pobo” (Xeremías 7:23). Así que, se ti tamén queres ser amigo de Xehová, tes que obedecelo.

4, 5. Que fai Xehová para axudar os seus amigos?

⁴ A Biblia di que Xehová “repasa a terra enteira cos seus ollos para fortalecer ós que lle son leais de corazón” (2 Crónicas 16:9). Ademais, en Salmo 32:8  promételles ós seus amigos: “Eu instruireite e ensinareiche o camiño que has de seguir; aconsellareite, pousarei os meus ollos sobre ti”.

⁵ Xehová quere axudarnos e protexernos (le Salmo 55:23 [55:22, NM]). Como somos amigos seus, servímolo de todo corazón e sómoslle leais mesmo nos momentos difíciles. Temos a mesma confianza en Xehová que tivo o salmista, que escribiu: “Con El á dereita non caerei” (Salmo 16:8; 63:9 [63:8, NM]). Pero o Demo é o noso inimigo e quere impedir que sexamos amigos de Deus. Como intenta conseguilo?

6. Que dixo Satanás dos humanos?

⁶ No capítulo 11 aprendemos que Satán desafiou a Xehová e que o acusou de ser un mentireiro. Tamén o acusou de ser inxusto porque non deixaba que Adam e Eva decidisen por si mesmos o que estaba ben e o que estaba mal. Ademais, no libro de Xob aprendemos que Satán acusa a tódolos que queren ser amigos de Deus. Di que as persoas só serven a Deus por interese, non porque o amen. Mesmo chegou a dicir que pode conseguir que calquera se poña en contra de Deus. Imos ver o que aprendemos de Xob e como o axudou Xehová.

7, 8. a) Que pensaba Xehová de Xob? b) Que dixo Satán sobre Xob?

⁷ Quen foi Xob? Foi un home que viviu hai uns tres mil seiscentos anos. Xehová dixo del que daquela non había un home tan bo en toda a Terra. Xob respectaba moito a Xehová, e odiaba o que estaba mal (Xob 1:8). Xob era un bo amigo de Xehová.

 ⁸ Satán afirmou que Xob servía a Deus por egoísmo. Díxolle a Xehová. “¿Non será que o tes ti ben cinguido cun valado, el, o seu lar, e canto posúe, e que bendiciches canto fai, e que o seu gando se espalla por toda a campía? ¡Pero ponlle a man enriba e tócalle no que posúe, e has ver se non te maldí na cara!” (Xob 1:10, 11).

9. Que lle permitiu facer Xehová a Satán?

⁹ Satán acusou a Xob de servir a Xehová só por comenencia, polo que podía sacar del. Tamén dixo que podía conseguir que Xob deixase de servir a Xehová. Xehová non estaba de acordo con Satán, pero deulle permiso para que puxese a proba a Xob. Deste xeito, quedaría clara a verdadeira razón pola que Xob servía a Xehová.

10. a) Como atacou Satán a Xob? b) Como reaccionou Xob?

¹⁰ Primeiro, Satán fixo que lle roubasen parte do gando a Xob e que lle matasen o resto. Despois fixo que lle matasen a maioría dos seus servos. Por último, Satanás fixo que os dez fillos de Xob morresen nun furacán. Xob perdeuno todo. Pero aínda así, foi leal a Xehová. A Biblia explica: “Con todo, non pecou Xob botando renegos contra Deus” (Xob 1:12-19, 22).

11. a) Que máis lle fixo Satán a Xob? b) Como reaccionou Xob?

¹¹ Satán non se deu por vencido. Todo o contrario, volveu desafiar a Deus e díxolle: “Mais ponlle a man enriba e máncao nos ósos e na carne, e xa habías ver se non te maldí na cara!”. Entón Satán fixo que Xob tivese una enfermidade horrible (Xob 2:5, 7). Pero  Xob seguiu sendo leal a Xehová. Dixo: “¡Deica expirar non cederei na miña integridade!” (Xob 27:5).

12. Como demostrou Xob que Satán é un mentireiro?

¹² Xob non sabía nada das acusacións que fixera Satanás nin por que estaba a sufrir tanto. De feito, pensaba que era Xehová o causante dos seus problemas (Xob 6:4; 16:11-14). Pero aínda así, Xob foi leal. Quedou claro que non era egoísta. Todo o que Satanás dixera era mentira. Xob era amigo de Deus e servíao porque o amaba.

13. Cal foi o resultado da lealdade de Xob?

¹³ Inda que Xob non sabía o que estaba a pasar no ceo, mantívose fiel e demostrou que Satanás é un ser malvado. Despois, Xehová recompensou a Xob por ser un amigo leal (Xob 42:12-17).

14, 15. De que acusou Satán a tódolos humanos?

¹⁴ Podes aprender leccións moi importantes do que lle pasou a Xob. A Biblia explica en Xob 2:4 que Satán dixo: “¡A pel pola pel! Por salva-la vida dá o home todo canto ten”. Así que Satán non só acusou a Xob, tamén nos acusa a todos nós, homes e mulleres, de sermos egoístas e servir a Deus polo que poidamos sacar del. Centos de anos despois da morte de Xob, Satanás seguía desafiando a Xehová e acusando os seus servos. Por exemplo, en Proverbios 27:11 Xehová di: “Meu fillo, faime feliz sendo sabio, e terei resposta que dar a quen me aldraxe [ou insulte]”.

¹⁵ Se escolles obedecer a Xehová e ser o seu amigo leal, demostrarás que Satán é un mentireiro. Esa é a  mellor decisión que podes tomar, inda que teñas que facer grandes cambios na túa vida. É algo moi serio. Satanás afirma que ti non serás leal a Deus cando teñas problemas. El fai todo o posible para que desobedezamos a Deus. Que métodos utiliza?

16. a) Que métodos utiliza Satán para intentar que a xente deixe de servir a Xehová? b) Que métodos podería utilizar o Demo contigo?

¹⁶ Satanás utiliza distintos métodos para que deixemos de ser amigos de Deus. A Biblia explica que “o demo, bruando coma un león, anda ó arredor á procura de quen engulir” (1 Pedro 5:8). Non deberías sorprenderte se os teus amigos, a túa familia ou outras persoas intentan que deixes de estudar a Biblia e de facer o que está ben. Poida que mesmo sintas que te están atacando (Xoán 15:19, 20). * Ás veces, Satán tamén intenta enganarnos para que desobedezamos a Xehová. A Biblia di que “se disfraza de anxo da luz” (2 Corintios 11:14). Outro método que utiliza Satán para que deixemos de servir a Xehová é facernos crer que non somos bos dabondo para agradarlle a Deus (Proverbios 24:10).

17. Por que obedecemos a Xehová?

¹⁷ Cando obedecemos a Xehová, demostramos que Satán é un mentireiro. Que che axudará a seres  obediente? A Biblia explica: “Amara-lo Señor, o teu Deus, con todo o teu corazón, con tódalas túas aspiracións e con toda a túa forza” (Deuteronomio 6:5). Obedecemos a Xehová porque o amamos, e canto maior sexa ese amor máis quereremos facer o que el nos di. O apóstolo Xoán escribiu: “Porque o amor a Deus consiste en cumprir cos seus mandamentos. Os mandamentos de Deus non son pesados” (1 Xoán 5:3).

18, 19. a) Cales son algunhas das cousas que Xehová di que están mal? b) Por que sabemos que Xehová nunca nos pide nada que non poidamos facer?

¹⁸ Xehová di que hai cousas que están mal. Podes consultar algunhas delas no recadro: “ Odiemos o que Xehová odia”. Ó principio poida que penses que algunhas destas cousas non son tan malas, pero cando leas os textos bíblicos e penses neles, entenderás que  o máis sabio é obedecer as leis de Xehová. Ás veces non será fácil. Pero se o fas, desfrutarás da paz e da felicidade que teñen os amigos leais de Deus (Isaías 48:17, 18). Por que sabemos que é posible facer estes cambios?

¹⁹ Xehová nunca nos pide nada que non poidamos facer (Deuteronomio 30:11-14). El é un amigo de verdade e coñécenos mellor ca nós mesmos. Sabe cales son os nosos puntos fortes e os débiles (Salmo 103:14). O apóstolo Paulo dixo: “Fiel é Deus, que non consentirá que teñades tentacións superiores ás vosas forzas: coa tentación havos dar tamén os medios para poder saír dela” (1 Corintios 10:13). Podemos estar seguros de que Xehová sempre nos vai dar “esa forza tan extraordinaria” para facer o que está ben e afrontar os problemas (2 Corintios 4:7). Despois de  ver como Xehová o axudara, Paulo puido dicir: “Teño forzas para todo gracias a quen me fai forte” (Filipenses 4:13).

20. Que calidades deberías imitar, e por que?

²⁰ Se queremos ser amigos de Xehová non só debemos deixar de facer as cousas que el di que están mal. Precisamos facer algo máis (Romanos 12:9). Temos que amar as cousas que el ama. Os amigos de Xehová tamén imitan as súas calidades e amosan “amor, felicidade, paz, paciencia, amabilidade, bondade, fe, apracibilidade, autocontrol” (Gálatas 5:22, 23, NM). Para saberes como son os amigos de Xehová le Salmo 15:1-5.

21. Que che axudará a amosar as calidades que lle gustan a Deus?

²¹ Que che axudará a amosar estas fermosas calidades? Se les a Biblia con regularidade aprenderás que cousas lle gustan a Xehová (Isaías 30:20, 21). Segundo o vaias facendo, o teu amor por el irá aumentando, e iso motivarate a obedecelo.

22. Cal será o resultado se obedeces a Xehová?

²² Facer estes cambios é como cambiarse de roupa. A Biblia di que tes que espirte “do home vello” e vestirte “do home novo” (Colosenses 3:9, 10). Inda que non é fácil, cando facemos estes cambios e obedecemos os mandatos de Xehová, el promete que atoparemos “gozos e proveito con cumprilos” (Salmo 19:12, SBG [19:11, NM]). Escolle obedecer a Xehová porque o amas, non só pola recompensa futura. Se o fas, demostrarás que Satán é un mentireiro e chegarás a ser un verdadeiro amigo de Deus.