É kọ à ié nen ea ní kọ́ enè kà nu kegũ̀a nè ni?— * Kpá Káí kọ́ nu ea kil ló enè kà kele íb nu kegũ̀a ea kọlà “kà kà bel ea di káí ea gṹá.” À dú nu ea di káí boo béè kọ à aa bá Bàrì. Vaá à dú gè kolíe nu kegũ̀a boo béè kọ gbò nen náè nyimá nu ea kil ló. Bã̀àna gbò nyomá tóm beè gbĩ́ gè nyimá nu ea kil ló níí. Ẹ́ kọ à ń léémá ni ge nyimá ló nu e na kà nu kegũ̀aí dú sẹ̀?—

Kà bège dẽè tṍó ea ẹ̀ kil nvẽ́eá, Bàrì beè dèm túá kà págbálà nè pábía. Ba bée beè kọ̀là Ádàm nè Íìv. Bàrì beè nèva kà lé be eaẹ̀ dú gè kolíe gònò Ídèn. Beè Ádàm nè Íìv á gbàntṍ ló Bàrì, baala nè ba gbò nvín gáè beè naa kọ zivè kà boo kunukẽ̀í á dú páladaìs beli gònò Ídèn. Vaá baala gáẹ̀ beè tṍó mm̀ páladaìs dò dèdè. Sṍò é kọ ò bulà kẽ̀èa boo nu e Ádàm nè Íìv beè naa?—

Ádàm nè Íìv beè lọ̀l togó kebá Bàrì, vó ní ea náa vaá é gé mm̀ Páladaìs nìeí é. Sõò Bàrì beè kọ àẹ́ náà nèè kọ zivè kà boo kunùkẽ̀í a kpedẽe, vaá kọ̀láá nen n tõó dùm mm̀ ẹ́ẹ́ ẹẹ́ nyié dọ̀ dèdè. Ẹlẹ é náa níí mm̀ mósĩ́ deè e? Mm̀ begè dẽè tṍó gbò nen náa beè nyimá. A beè dú nu kegũ̀a.

Tṍó e Jíízọ̀s beè dú boo kunùkẽ̀í, ẹlẹ beè noòmà gbò nen tõ̀ò nu ea kil ló na kà nu kegũ̀a í. Ẹlẹ beè kọ à dú nu ea kil ló Bon Méné Bàrì. Jíízọ̀s beè kọ́ nè gbò nen kọ bàá tã̀àgã ló Bàrì kọ na kà Bon Ménéí á dù. Àẹ́ náa kọ boo kunùkẽ̀í á dú Páladaìs ea ń kpédẽe.

É kọ nyíé ni ẹ́ẹ́ ló ge nyimá ló na kà nu kegũ̀a ĩ́?— Kẽèà boo kọ áá gbò e bà gbàntṍ ló Jìhóvà ni baẹ́ tṍó mm̀ Páladaìs e. Kpá Káí kọ́ gbele tõ̀ò nòòtẽ́ ea kil ló gbò gbálà nè gbò bia e bà beè gbàntṍ ló Jìhóvà nèi. É kọ àẹ́ léémá ni gè nó nu ea kil vá ló?— Naa nii é na nyímá ló sì gà ọ̀và nè sĩ́deè eé láá belí va.