Ana kaeka te Baibara

 A bati aomata aika tuangaki bwa ti aki kona n ataia raoi bwa antai ae korea te Baibara. Ma e teretere n taai nako n te Baibara bwa antai ae korea kanoana. A moanaki kanoana tabeua n taiani kibuntaeka n aron “ana taeka Neemia,” “te miitara are e noria Itaia,” ao “e kangai ana taeka Iehova ae roko iroun Ioera.”—Neemia 1:1; Itaia 1:1; Ioera 1:1.

 Angia taani korea te Baibara a kaotia ae a koroboki n aran Iehova, ae te Atua ae koaua ae tii temanna, ao a kairaki irouna. E raka i aon 300 te tai ae a taekina iai aei burabeti ake a korea te Koroboki ae Tabu n te Taetae n Ebera: “E kangai ana taeka Iehova.” (Amota 1:3; Mika 2:3; Naum 1:12) Taani koroboki ake tabeman riki a karekea ana rongorongo te Atua rinanoia anera.—Tekaria 1:7, 9.

 E koreaki te Baibara irouia mwaane aika 40 tabun, n te maan ae raka i aon 1,600 te ririki. Tabeman e raka i aon teuana bokin te Baibara ae a koreia. Te Baibara bon te raiburari ae rangi n uarereke bwa tii 66 booki iai. Iai i nanona 39 booki ae te Koroboki ae Tabu n te Taetae n Ebera, ae e araranaki bwa te O Tetemanti, ao 27 booki ae te Koroboki ni Kristian ae Tabu n te Taetae ni Kuriiti, ae e araranaki bwa Te Nu Tetemanti.