Te Baibara ae Tabu bon ana rongorongo te Atua ae koreaki nakoira ni kabane. Ti riai n reiakinna bwa ti aonga n ataa te tia Koreia. (Ioane 17:3; 2 Timoteo 3:16) I nanoni baana nako, ao e kaota ana kantaninga Iehova ae te Atua ibukia aomata ao mwengaia ae te aonnaba.—Karikani Bwaai 3:15; Te Kaotioti 21:3, 4.

E rotaki riki maiuia aomata n te Baibara nakoni booki nako. E kaungaira te Baibara bwa ti na kaotiotii aroaron Iehova aika te tangira, te nanoanga, ao te atataiaomata. E anga te kantaninga ae raoiroi, ao e buokiia aomata n nanomwaaka i aani karawawata aika rangi ni kakaiaki. Ao e teimatoa ni kaotaraeaki iai bwain nako te aonnaba aei ake a bobuaka ma nanon te Atua ae kororaoi.—Taian Areru 119:105; Ebera 4:12; 1 Ioane 2:15-17.

E moani koreaki te Baibara n te taetae n Ebera, n Aramwaike, ao ni Kuriiti. E a tia n rairaki ni kabwaninaki ke tii te iterana n taetae aika tao 2,600 mwaitiia. Bon tii aei te boki ae rangi n taabangaki rairana ao tibwatibwaana ma rimoa. Bon aei ae riai ni kantaningaaki. E kangai te taetae ni burabeti n te Baibara: “E na tataekinaki te rongorongo ae raoiroi aei ae taekan te Tautaeka n Uea, [ae te rongorongo ae kakawaki i nanon te Baibara] n te aonnaba ni kabutaa bwa te bwai ni kaotioti nakoia botannaomata ni kabane, ao ngkanne e a roko naba te toki.”—Mataio 24:14.

Kioina ngkai ti ataa kakawakin ana rongorongo te Baibara, ti a katauraoa te rairai aei ma tiara ae e na aki tii boraoi raoi ma moani koroboki nikawai, ma e na mataata naba ma ni bebete warekana. Taiani Bukinibaa aika “Booto n Reirei Aika Bwainaki n Rairan te Baibara,” “Tein te Rairai Aei,” ao “Aron Reken te Baibara Iroura,” a kabwarabwarai kaetieti tabeua aika iraki ni katauraoan te rairai aei ao teina.

Te koraki ake a tangira Iehova ae te Atua ma n taromauria, a tangira te rairai n Ana Taeka te Atua ae eti raoi ao e kai ota. (1 Timoteo 2:4) Ibukini kakororaoan anne, ti a tia ni katauraoa Te Baibara ae Tabu—te Rairai ae te Aonnaba ae Boou, n te taetae ni Kiribati, ni kaineti ma tiara ae rairan te Baibara nakon taetae aika bati. Bon ara kantaninga ao ara tataro ibukim ngkoe ae te tia wareware ae tangiraki, bwa ko na karekea buokam man te rairai n te Koroboki ae Tabu aei, ngkai ko kakorakorako n “ukoukora te Atua . . . bwa [ko] aonga ni kunea.”—Mwakuri 17:27.