Etekiera 29:1-21

  • Te taetae ni burabeti n ekaanako Barao (1-16)

  • Egypt to be given to Babylon as a reward (17-21)

29  N te katebwina n ririki, n te katebwina n namwakaina ae 12 iai bongin te namwakaina, ao e roko ana taeka Iehova irou, ae kangai:  “Natin te aomata, kamwataua taraani Barao are uean Aikubita, ao taetae ni burabeti n ekianako ao n ekaanako Aikubita ni kabutaa.+  Taekin taeka aikai: ‘E kangai ana taeka te Uea ae Moan te Rietata ae Iehova: “Akea bwa I a ekikonako ngkoe ae Barao ae uean Aikubita,+Ae manin taari ae totoakaei, ae wene i buakon raangan ana Naire,*+Ae e kangai, ‘Bon au bwai au Karaanga ae te Naire. I karaoia i bon ibukiu.’+   Ma N na karin taiani matau ni mwangaim ao ni kanim iika aika n am Naire n inam. N na kaaerakeko mai nanon am Naire, n ikotaki ma ikan te Naire ni kabane ake a nim ma inam.   N na kitaniko n te rereua, ngkoe ma ikan am Naire ni kabane. Ko na bwaka n te tawaana, ao ko na aki manga ikotaki ke n anaaki.+ Ao N na anga ngkoe bwa kanaia manin te aonnaba aika kaakang ao mannikiban annang.+   A na bane kaain Aikubita n ataia bwa bon Iehova ngai,Bwa a aikoa riki bwa okoia tibun Iteraera ma ai te mwakoro n uteute* ngaiia.+   Ngke a taua baim ao ko a manatua naba,Ao ko kaikoaka anganibaia. Ngke a raraiko kaanga te oko ao ko a uruaki naba,Ao ko karika rurun rangaia*+  “‘Mangaia ae e kangai ana taeka te Uea ae Moan te Rietata ae Iehova: “Noria ae I a karokoa i aom te kabaang,+ ao N na koreianako mairoum aomata ma maan.  E na riki te aba ae Aikubita bwa te tabo ae aki kaainaki ma n uruaki,+ ao a na ataia bwa bon Iehova ngai, bwa ko* a tia ni kangai, ‘Bon au bwai te Karaanga ae te Naire, boni ngai ae I karaoia.’+ 10  Mangaia ae I a ekikonako ao n ekaanako am Naire, ao N na karaoa Aikubita bwa te aba ae uruaki ma ni mwautakataka, ae te aba ae aki kona ni maekanaki ma ni kamaroaeaki,+ ni moa mai Miketora+ nako Tewene+ n rokoroko n tian Itiobia. 11  Akea waen te aomata temanna ke waen te nanai ni man ae e na mwananga n rinanona,+ ao e na aki maekanaki i nanon 40 te ririki. 12  N na karika Aikubita bwa te aba ae te kabanea ni kamaroaa i buakon aaba, ao kaawana bwa taiani kabanea ni kamaroaa i buakoni kaawa, i nanon 40 te ririki,+ ao N na kamaenakoia I-Aikubita nako buakoia natannaomata ao ni kamaeinikunia nakon aaba.”+ 13  “‘Bwa e kangai ana taeka te Uea ae Moan te Rietata ae Iehova: “N na manga ikotiia ni kaokiia I-Aikubita imwin 40 te ririki, mai buakoia botannaomata ake a uamaenako i buakoia,+ 14  N na kairiia taenikai aika I-Aikubita ni kaokiia nakon te aba ae Bateroti,+ nakon te aba are a riki mai iai, ike a na riki iai bwa te tautaeka n uea ae mangori. 15  E na mangori riki Aikubita nakon tautaeka n uea ake tabeua ao e na aki manga taui aroia natannaomata ake tabeua,+ ao N na kabatiaa kamangoraia bwa a aonga n aki kona ni kataenikaiia natannaomata ake tabeua.+ 16  E na aki manga riki bwa nibwan aia onimaki tibun Iteraera,+ ma e na tii kakauringia aia bure ngke a rairaki nakoia I-Aikubita ibukini buokaia. Ao a na ataia bwa bon Iehova ngai ae te Uea ae Moan te Rietata.”’” 17  Ao n te ka-27 n ririki, n te moan namwakaina ae teuana iai bongin te namwakaina, ao e roko ana taeka Iehova irou, ae kangai: 18  “Natin te aomata, e kammwakuriia n te aro ae korakora ana taanga ni buaka Nebukaneta*+ are Ueani Baburon, n ekaanako Turo.+ A a mara atu ni kabane ma ni mwai anganibai. Ma e aki reke irouna ma ana taanga ni buaka boon te mwakuri korakora are e karaoia i aon Turo. 19  “Mangaia ae e kangai ana taeka te Uea ae Moan te Rietata ae Iehova, ‘Akea bwa I a anga te aba ae Aikubita nakon Ueani Baburon ae Nebukaneta,*+ ao e na uotiinako kaubwaina ma n anai bwaai ni kuri aika bati ao ni kuribwaia, ao e na riki bwa boon ana taanga ni buaka.’ 20  “‘Ibukini ngkanne kabooani mwin ana mwakuri korakora teuaei n ekaanako neiei,* N na anganna te aba ae Aikubita, ibukina bwa a a tia ni karaoa te bwai teuana ibukiu,’+ bon ana taeka te Uea ae Moan te Rietata ae Iehova. 21  “N te bong anne ao N na kabwebwerakea te koro ibukia tibun Iteraera,*+ ao N na anganiko am tai n taetae i buakoia, ao a na ataia bwa bon Iehova ngai.”

Taiani Kabwarabwara Mai Nano

Te “Naire” aei ao aika i nano, e kaineti ma te karaanga ma neina aika karaoaki irouia aomata bwa a na raanga ibukin tebokan aroka.
Ebera, “te maunei.”
Ebera, “bebeeia.”
Ebera, “e a tia.”
Ebera, “Nebukareta,” aroni koreana teuana.
Ebera, “Nebukareta,” aroni koreana teuana.
Ae taekan ekakinakoan Turo.
Ke, “N na angania tibun Iteraera te korakora.”