Alé annan ròt enformasyon

Alé annan sou-méni-a

Alé annan somèr-a

Témwen Jéova-ya

Kréyòl gwiyanè

Bon nouvèl ki ka vini di Bondjé !

 LÉSON 9

Kouman ou fanmi pouvé viv éré ?

Kouman ou fanmi pouvé viv éré ?

1. Poukisa mariaj-a endispansab pou trapé bonèr-a annan fanmi-a ?

Sé bon nouvèl-ya ka vini di Jéova. I sa roun Bondjé éré é i lé ki sé fanmi-ya viv éré (1 Timothée 1:11). A li ki établi mariaj-a. Mariaj douvan lalwa endispansab pou fanmi-a trapé bonèr paské i ka poté roun santiman sékirité, pou koup-a é pou sé timoun-yan. Sé krétyen-yan divèt rèspèkté lalwa péyi-ya asou anréjistréman sé mariaj-ya. — Li Luc 2:1, 4, 5.

Kouman Bondjé ka wè mariaj-a ? Pou Bondjé mariaj-a konpozé di roun mouché ké di roun madanm ki pou rété ansanm pou tout-tan. Jéova lé ki mouché ké madanm rété fidèl roun a ròt (Hébreux 13:4). I rayi divòrs (Malaki 2:16). Mé i ka pèrmèt roun krétyen divòrsé épi roumaryé si so mari ouben so madanm komèt adiltèr. — Li Matthieu 19:3-6, 9.

2. Kouman mari ké madanm divèt aji roun ké ròt ?

Jéova kréyé mouché ké madanm, pou yé chak gen roun ròl diféran, mé sa ròl-ya ka maché ansanm (Genèse 2:18). Mari-a, a li ki chèf annan fanmi-a. I divèt bay so fanmi tousa yé bizwen pou viv, é ansényé yé konésans asou Bondjé. I divèt kontan so madanm é mété bizwen so madanm anvan sopa. Tou lé dé divèt kontan ké rèspèkté yé konpanyen. Tout sé mari-ya ké sé madanm-yan pa parfè, a pou sa yé divèt anprann pardonnen si yé lé trapé bonèr annan yé koup. — Li Éphésiens 4:31, 32 ; 5:22-25, 33 ; 1 Pierre 3:7.

3. Si ou pa éré annan ou mariaj, ès ou divèt lésé ou mari ouben ou madanm ?

Si ou mariaj ka pran dlo, fo zòt tou lé dé fè éfòr pou aji ké lanmou roun ké ròt (1 Corinthiens 13:4, 5). Paròl Bondjé-a  pa ka konséyé séparasyon pou réglé problèm ki ka rivé souvan annan sé koup-ya. — Li 1 Corinthiens 7:10-13.

4. Timoun-yan, kisa Bondjé lé pou zòt ?

Jéova lé ki zòt viv éré. I ka bay zòt pi bon konsèy i gen pou zòt profité di zòt jénès. I lé ki zòt profité di sajès ké èspéryans zòt papa ké zòt manman (Colossiens 3:20). I lé osi ki zòt rousanti lajwa i gen lò zòt ka fè bagaj pou zòt Kréyatèr, é pou so Pitit. — Li Ecclésiaste 11:9–12:1 ; Matthieu 19:13-15 ; 21:15, 16.

5. Papa ké manman, kisa zòt pouvé fè pou zòt timoun trapé bonèr pou tout-tan ?

Zòt divèt travay rèd pou bay zòt timoun manjé, kaz, ké lenj (1 Timothée 5:8). Mé pou yé trapé bonèr-a, zòt divèt anprann yé kontan Bondjé é anprann yé lésé li ansényé yé (Éphésiens 6:4). Manniyè zòt ka montré zòt lanmou pou Bondjé pouvé gen roun gran enfliyans asou yé. Si zòt ansèyman ka apiyé asou Labib-a, i ké byen formé yé lèspri pou yé pran bon désizyon. — Li Deutéronome 6:4-7 ; Proverbes 22:6.

Sé timoun-yan ka grandi byen lò yé gen ankourajman ké félisitasyon. Yé bizwen yé paran roupran yé ké disipliné yé. Sa kalité fòrmasyon-an ka protéjé yé di konpòrtman ki té ké anpéché yé trapé bonèr-a (Proverbes 22:15). Mé, disiplin-an pa jen divèt ni rèd ni mové. — Li Colossiens 3:21.

Sé Témwen Jéova-ya ka pibliyé plizièr liv pou sé paran-yan ké sé timoun-yan. Sa liv-ya apiyé asou Labib-a. — Li Psaume 19:7, 11.