Alé annan ròt enformasyon

Alé annan sou-méni-a

Alé annan somèr-a

Témwen Jéova-ya

Kréyòl gwiyanè

Bon nouvèl ki ka vini di Bondjé !

 LÉSON 1

Ki bon nouvèl i gen ?

Ki bon nouvèl i gen ?

1. Ki nouvèl Bondjé gen pou nou ?

Bondjé lé ki sé imen-yan viv éré asou latè-a. I fè latè-a ké tout sa i gen asou l’ pas i kontan nou. Pita, i ké aji pou ofri moun di tout péyi roun avénir miyò. I ké soulajé nou di tout bagaj ki ka mennen soufrans. — Li Jérémie 29:11.

Piès gouvèrnman pa janmen rivé tiré vyolans, maladi ké lanmò. Mé i gen bon nouvèl : Titalò, Bondjé ké tiré tout sé gouvèrnman imen-yan pou mété sopa gouvèrnman. Moun ki ké viv anba dominasyon gouvèrnman Bondjé ké viv annan lapè ké roun bon lasanté. — Li Isaïe 25:8 ; 33:24 ; Daniel 2:44.

2. Poukisa sa nouvèl-ya vréman enpòrtan jòdla ?

Soufrans-ya ké fini sèlman lò Bondjé ké tiré sé méchan-yan di latè-a (Tsephania 2:3). Kitan sa ké rivé ? Paròl Bondjé, Labib-a, té ja anonsé sitiasyon ki ka mété sé imen-yan an danjé jòdla. Tousa ki ka pasé jòdla ka montré ki moman pou Bondjé aji tou pròch rivé. — Li 2 Timothée 3:1-5.

3. Kisa nou divèt fè ?

Nou divèt anprann konnèt Bondjé gras a Labib-a. Labib-a, a kou roun lèt ki roun papa plen ké lanmou ékri pou nou. I ka di nou sa nou divèt fè pou nou viv byen jòdla, é pita pou nou viv asou latè-a pou tout-tan. Pétèt sèrten moun pa ké kontan ki ou rousouvwè èd pou konprann Labib-a. Mé posibilité di gen roun avénir miyò tro bèl pou ou lésé sa okazyon-an chapé. — Li Proverbes 29:25 ; Révélation 14:6, 7.