Alé annan ròt enformasyon

Alé annan sou-méni-a

Alé annan somèr-a

Témwen Jéova-ya

Kréyòl gwiyanè

Bon nouvèl ki ka vini di Bondjé !

 LÉSON 3

Ès sa vré ki sé bon nouvèl-ya ki annan Labib-a ka vini di Bondjé ?

Ès sa vré ki sé bon nouvèl-ya ki annan Labib-a ka vini di Bondjé ?

1. Labib-a ka vini di kimoun ?

Bon nouvèl-a ki sé imen-yan ké viv asou latè-a pou tout-tan ékri annan Labib-a (Psaume 37:29). Labib-a fèt ké 66 piti liv. Bondjé fè apéprè 40 wonm plen ké lafwa ékri sa liv-ya. Sé senk prémyé liv-ya, a Moyiz ki ékri yé i gen apéprè 3 500 lannen. Dèrnyé liv-a, a apot Jan ki ékri l’ sa ka fè plis ki 1 900 lannen. A lidé kimoun yé èsprimé ? Lidé Bondjé, pa yépa lidé paské Bondjé kominiké ké yé gras a so lèspri sen (2 Samuel 23:2). Atò, Labib-a ka vini di Jéova. — Li 2 Timothée 3:16 ; 2 Pierre 1:20, 21.

2. Kouman nou pouvé sèrten ki Labib-a ka vini di Bondjé ?

Nou savé ki Labib-a ka vini di Bondjé paské i ka anonsé èkzaktéman é ké présizyon sa ki ké fèt dimen. Pa gen piès imen ki gen kapasité di fè sa (Josué 23:14). A Bondjé Tou-Pwisan-an rounso ki pouvé prévwè èkzaktéman avénir limanité-a. — Li Isaïe 42:9 ; 46:10.

Roun liv ki ka vini di Bondjé divèt inik. Labib-a sa roun liv inik. Milyar Labib ja distribiyé annan santèn lang. Menm si Labib-a sa roun liv ki ansyen i ka tonbé dakò ké lasyans. Épi sé 40 moun-yan ki ékri Labib-a pa kontrédi yé kò roun ròt *. Anplis di sa, i ka fè nou wè klèrman lanmou Bondjé. Jòdla ankò, i gen pouvwar randé lavi sé moun-yan miyò. Pou tout sa rézon-yan, milyon moun sèrten ki Labib-a sa paròl Bondjé. — Li 1 Thessaloniciens 2:13.

 3. Di kisa Labib-a ka palé ?

Sa ki pi enpòrtan annan Labib-a, a sé bon nouvèl-ya ki ka montré ki Bondjé gen roun projè plen ké lanmou pou limanité-a. I ka èspliké kouman o koumansman istwè limanité-a nou pédi privilèj di viv annan roun paradi asou latè-a, é pou fini, kouman Bondjé ké roubay nou sa paradi-a. — Li Révélation 21:4, 5.

Annan sa liv-a i gen osi lwa, prensip ké konsèy. Ròt bagaj ankò, i ka rakonté istwè rélasyon Bondjé ké sé imen-yan é sa istwè-a ka montré so pèrsonalité. A pou sa ou pouvé konnèt Bondjé gras a Labib-a. I ka èspliké kouman ou pouvé divini so zanmi. — Li Psaume 19:7, 11 ; Jacques 2:23 ; 4:8.

4. Kouman ou pouvé konprann Labib-a ?

Sa brochir-a ké édé ou konprann Labib-a gras a manniyè Jézi té ka ansényé. I té ka sité roun vèrsé Labib apré rounòt épi i té ka èspliké « sans di sé Ékritir Sent-ya ». — Li Luc 24:27, 45.

I pa gen anyen ki pi pasyonan pasé sé bon nouvèl-ya ki ka vini di Bondjé. Pourtan i gen roun ran moun ki pa mélé ké sa, épi rounòt ran ki ka kontraryé lò yé ka tandé palé di sa nouvèl-ya. Mé pa dékourajé. A sèlman si ou ka anprann konnèt Bondjé ki ou pouvé èspéré viv pou tout-tan. — Li Jean 17:3.

 

^ § 3 Gadé brochir Un livre pour tous.