Shi kɛya he ni ato saneyitsei lɛ anaa yɛ lɛ

Eŋmala Nii Yɛ Woji Anɔ Ewo Wɔshin Mashiŋ Shishi

Eŋmala Nii Yɛ Woji Anɔ Ewo Wɔshin Mashiŋ Shishi

Be ni abaptisi yoo ko ni atsɛɔ lɛ Zarina yɛ Russia akɛ Yehowa Odasefonyo lɛ sɛɛ lɛ, eku esɛɛ kɛba emaŋ yɛ Central Asia, ni etswa efai shi akɛ ekɛ anɔkwale ni ekase lɛ baatsɔse ebiyei enyɔ lɛ. Akɛni ebɛ shika hewɔ lɛ, ekɛ efɔlɔi kɛ enyɛminuu ko kɛ eŋa yahi tsũ kome mli. Efɔlɔi lɛ kɛɛ lɛ akɛ ekatsɔɔ ebiyei lɛ Biblia mli anɔkwale ni ekase lɛ. Ni amɛkɛɛ ebii lɛ hu akɛ, amɛkɛ amɛmami akagba sane ko ni kɔɔ Biblia lɛ he.

Zarina susu gbɛ nɔ ni ebaatsɔ ni eye ebua ebii lɛ koni amɛbale Yehowa lɛ he waa. (Abɛi 1:8) No hewɔ lɛ, esɔle waa ehã Yehowa kɛbi gbɛtsɔɔmɔ kɛ hiɛshikamɔ. Zarina tsu enibimɔ lɛ he nii, no ji akɛ, ekɛ ebii lɛ yaa shisharamɔ ni be ni amɛsharaa shi lɛ, ekɛ amɛ gbaa bɔ ni adebɔɔ nibii komɛi yɔɔ naakpɛɛ lɛ ahe sane. Shisharamɔ nɛɛ hã oblayei enyɔ nɛɛ basumɔ akɛ amɛbaakase Bɔlɔ lɛ he nii.

No sɛɛ lɛ, Zarina na gbɛ ni ebaatsɔ nɔ ekɛ Mɛni Biblia Lɛ Tsɔɔ Diɛŋtsɛ? * wolo lɛ aye abua ebii lɛ koni amɛle Yehowa he nii babaoo. Ekɔpeɔ wolo nɛɛ mli kukuji lɛ ekomɛi kɛ amɛhe sanebimɔi lɛ eshwieɔ woji anɔ. Ekɛ saji fioo komɛi fataa nibii ni eŋmala lɛ ahe koni no aye abua ebii lɛ ni amɛnu nɔ ni amɛkaneɔ lɛ shishi jogbaŋŋ. No sɛɛ lɛ, ekɛ pɛnsil fataa woji ni eŋmala nii yɛ nɔ lɛ ahe ni ekɛyawoɔ wɔshin mashiŋ lɛ shishi yɛ hejuuhe lɛ. Kɛ́ ebiyei lɛ yɛ tsũ lɛ mli lɛ, amɛkaneɔ kukuji lɛ amli ni amɛŋmalaa hetoi lɛ amɛshwieɔ shi.

Nɛkɛ gbɛ nɔ Zarina tsɔ ni ekɛ ebii lɛ kase Biblia Lɛ Tsɔɔ wolo lɛ mli yitsei enyɔ lɛ kɛyashi be ni ená he ko ni ekɛ amɛ fã kɛyahi jɛmɛ. Ni amɛyahi jɛmɛ lɛ, enyɛɔ ekɛ ebii lɛ kaseɔ nii ni mɔ ko nyɛɛɛ atsĩ enaa. Yɛ October 2016 lɛ, abaptisi oblayei enyɔ lɛ fɛɛ, ni eŋɔɔ amɛnaa akɛ amɛmami kɛ hiɛshikamɔ kɛ ŋaa tsu nii ni enyɛ ekɛ Nyɔŋmɔ wiemɔ lɛ ye ebua amɛ.