Shi kɛya he ni ato saneyitsei lɛ anaa yɛ lɛ

Amɛbaye Amɛbua

Amɛbaye Amɛbua

Gbi ko yɛ Alberta, ni yɔɔ Canada lɛ, no mli lɛ fɛ̃i miiye waa ni nugbɔ hu miinɛ, ni Bob miidraivi elɔle lɛ aaafee kilomitai 100 yɛ ŋmɛlɛtswaa kome mli kɛkɛ ni trukaa lɛ, elɔle sɛɛ tai lɛ ni yɔɔ ebɛku gbɛ jwa. No mli lɛ, Bob leee nɔ tuuntu ni eba, no hewɔ lɛ ekpɛ eyiŋ akɛ ebadraivi lɔle lɛ kɛya shĩa, no mli lɛ eshwɛ lɛ kilomitai enumɔ ni ebaashɛ.

Bob tsɔɔ nɔ ni tee nɔ sɛɛ mli yɛ lɛta ko ni eŋma kɛtee Yehowa Odasefoi A-Maŋtsɛyeli Asa ni yɔɔ he ni eyɔɔ lɛ mli. Ewie akɛ: “Odasefoi oblahii etɛ kɛ oblayei enyɔ ko ni ta amɛlɔle mli lɛ draivi kɛbɛŋkɛ milɔle lɛ, amɛba amɛglasi lɛ shi ni amɛkɛɛ mi akɛ mitai lɛ ejwa. Wɔkɛ wɔlɔlei lɛ yamamɔ gbɛjegbɛ lɛ toi, ni amɛkɛɛ mi akɛ amɛbaatsake mitai lɛ amɛhã mi. Mileee kɛji miyɛ tai kroko loo jak yɛ tsɔne lɛ mli po. Be ni mita mishwiili lɛ mli yɛ gbɛjegbɛ lɛ toi lɛ, amɛbote milɔle lɛ shishi ni amɛna tai kroko kɛ jak, kɛkɛ ni amɛtsake tai lɛ. Kɔɔyɔɔ lɛ mli efee ŋanii diɛŋtsɛ, ni snoo miinɛ. Amɛtadei ni amɛwo lɛ he tse waa, shi amɛtsake mitai lɛ, ni minyɛ mifa milɔle ekoŋŋ. Kulɛ, mi diɛŋtsɛ minyɛŋ matsake tai lɛ kɔkɔɔkɔ.

“Miida Odasefoi oblahii etɛ kɛ oblayei enyɔ nɛɛ ashi waa akɛ amɛye amɛbua mi. Amɛnyiɛ akutso lɛ mli koni amɛshiɛ yɛ mɛi shĩai amli. Oblahii etɛ kɛ oblayei enyɔ nɛɛ hiɔ shi yɛ nɔ ni amɛshiɛɔ lɛ naa. Eji amɛyeee amɛbuaaa mi kulɛ, mihe baafĩ mi waa diɛŋtsɛ, mihiɛ esɔ nɔ ni amɛfee lɛ waa. Namɔ po le akɛ, oblahii etɛ kɛ oblayei enyɔ nɛɛ ni tamɔ bɔfoi lɛ baahi gbɛjegbɛ wulu lɛ nɔ nakai gbi lɛ?”