Shi kɛya he ni ato saneyitsei lɛ anaa yɛ lɛ

Ahã Osɔfo Ko Sanebimɔi Ahetoo

Ahã Osɔfo Ko Sanebimɔi Ahetoo

Gbi ko lɛ, yoo ko ni atsɛɔ lɛ Eliso ni eji Yehowa Odasefonyo lɛ tee yoo ko shĩa ekɛ lɛ miikase Biblia lɛ, kɛkɛ ni mɛi enyɔ komɛi ni yoo lɛ kpaaa amɛ gbɛ ba eŋɔɔ. Be ni yoo lɛ gbele shinaa lɛ, naa osɔfo ko kɛ eŋa. No mli lɛ, Eliso enu akɛ gbalashihilɛ mli hefatalɔi nɛɛ abinuu kome pɛ ni amɛyɔɔ lɛ egbo etsɛko tsɔ.

Be ni Eliso jɛ etsuiŋ ehã amɛ kpoo lɛ, amɛjwa yaafo. Osɔfo lɛ kɛ mlifu wie akɛ: “Minaaa nɔ hewɔ ni Nyɔŋmɔ ŋmɛ gbɛ ni nɔ ko fɔŋ tamɔ nɛkɛ ba minɔ! Mɛni hewɔ esa akɛ ehã mibinuu kome pɛ lɛ agbo? Misɔmɔ Nyɔŋmɔ afii 28 sɔŋŋ, mifee nibii kpakpai babaoo hu, ni nɛkɛ ji bɔ ni ewo mi nyɔmɔ! Mɛni hewɔ Nyɔŋmɔ gbe mibinuu lɛ?”

Eliso gbala mli etsɔɔ amɛ akɛ, jeee Nyɔŋmɔ ji mɔ ni gbe amɛbi lɛ. Agbɛnɛ hu, ekɛ amɛ susu saji tamɔ kpɔmɔ nɔ lɛ, gbohiiashitee lɛ, kɛ nɔ hewɔ ni Nyɔŋmɔ ŋmɛɔ gbɛ ni nibii gbohii baa lɛ ahe. Osɔfo lɛ kɛ eŋa lɛ fɛɛ kɛɛ Eliso akɛ ehã amɛ sanebimɔi ni amɛsɔle aahu yɛ he lɛ ahetoo.

Enɔ otsi lɛ, osɔfo lɛ kɛ eŋa lɛ bafata yoo lɛ he, ni Eliso kɛ amɛ kase Biblia lɛ. No mli lɛ, Eliso kɛ yoo lɛ miikase Mɛni Biblia lɛ Tsɔɔ Diɛŋtsɛ? wolo lɛ, saneyitso ni ji, “Hiɛnɔkamɔ Diɛŋtsɛ Ni Yɔɔ Kɛhã Osuɔlɔi Ni Egboi Lɛ.” Osɔfo lɛ kɛ eŋa lɛ ná nikasemɔ lɛ he miishɛɛ, ni amɛkɛ amɛhe wo mli.

Sɛɛ mli lɛ, amɛyi enyɔ lɛ fɛɛ tee kpee krɛdɛɛ ni Yehowa Odasefoi fee yɛ Tbilisi, yɛ Georgia lɛ eko. Suɔmɔ kɛ ekomefeemɔ ni amɛna yɛ wɔnyɛmimɛi lɛ ateŋ lɛ ná amɛnɔ hewalɛ waa​—amɛbɔ mɔdɛŋ waa yɛ be ni eho lɛ mli akɛ amɛbaaye amɛbua amɛsɔlemɔ bii lɛ koni amɛná sui nɛɛ, shi amɛyayeee omanye.