Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Yehowa Odasefoi

Ga

Yelikɛbuamɔ Kɛhã Gboklɛfoi

Yelikɛbuamɔ Kɛhã Gboklɛfoi

Daa gbi lɛ, mɛi ni awo amɛ tsuŋ yɛ Amerika tsuŋwoohei srɔtoi lɛ amli lɛ ŋmalaa woji babaoo kɛmajeɔ Yehowa Odasefoi anitsumɔhe nine lɛ kɛbiɔ ni abaye abua amɛ koni amɛle Nyɔŋmɔ.

Wɔkpɛlɛɔ amɛnibimɔi nɛɛ anɔ, ni wɔtoɔ gbɛjianɔ koni Yehowa Odasefoi ni yɔɔ akutseiaŋ hei ni tsuŋwoohei nɛɛ kɛ amɛhenɔi yɔɔ lɛ ayasara amɛ ni amɛkɛ amɛ akase Biblia lɛ; amɛteaŋ mɛi komɛi yɛ tsuŋwoohei amli, mɛi komɛi yɛ helatsamɔhei, hei ni ajajeɔ oblahii kɛ oblayei ni eje amɛŋɛlɛ nɔ lɛ, kɛ hei ni akɛ mɛi ni kɛ kokein kɛ ehenɔi lɛ tsuɔ nii yɛ gbɛ ni ejaaa nɔ lɛ toɔ lɛ.

Wɔnyɛmimɛi Yehowa Odasefoi lɛ eto asafoŋ kpeei ahe gbɛjianɔ, ni amɛfooo mli. Ákɛ nɔkwɛmɔnɔ lɛ, gbi ko be ni ajɛɔ Biblia lɛ mli ahãa wiemɔ yɛ tsuŋwoohe nɛɛ eko mli lɛ, gboklɛfoi 32 jɛ tsuŋwoohe lɛ fãi srɔtoi enyɔ amli amɛbabo toi.

Kɛ́ ona bɔ ni gboklɛfoi lɛ ená gbɛjianɔtoo nɛɛ he sɛɛ lɛ, omii baashɛ ohe waa. Akɛ nuu ko ni awo lɛ tsuŋ yɛ Indiana ewala gbii abɔ fɛɛ yɛ gbɔmɔgbee hewɔ lɛ bɔi nikasemɔ, efee tsakemɔi yɛ ejeŋba kɛ eshihilɛ mli ni abaptisi lɛ ni ebatsɔ Yehowa Odasefonyo.

Odasefonyo ko ni kɛ mɔ ko ni awo lɛ tsuŋ yɛ tsuŋwoohe wulu ko yɛ California lɛ kase nii lɛ kɛɛ akɛ: “Mina shihilɛ mli ni eyɔɔ be ni ekaseko Biblia lɛ kɛ tsakemɔi ni efee amrɔ nɛɛ. Tsakemɔi ni efee ni eshɛ baptisimɔ he lɛ sa kadimɔ waa.”

Gboklɛfoi nɛɛ ateŋ mɛi babaoo miihi shi yɛ Biblia shishitoo mlai anaa, tsɛ amɛle akɛ no kɛ amɛwala baawo oshara mli. Ákɛ nɔkwɛmɔnɔ lɛ, ehe bahiaa ni ajie amɛteaŋ mɛi ni kɛ awuiyelɔi akui efo tako mli lɛ koni akɛ amɛ ayawo tsuŋwoohe kroko bɔ ni afee ni akɛye amɛ awui.

Tsuŋwoohe nɔkwɛlɔi lɛ ahiɛ sɔɔ bɔ ni Biblia lɛ etsake mɛi nɛɛ ashihilɛ lɛ. Tsuŋwoohei nɛɛ ekomɛi kɛ yijiemɔ woji ehã Yehowa Odasefoi lɛ kɛtsɔɔ akɛ amɛyɔse nitsumɔi kpakpai ni Odasefoi nɛɛ tsuɔ yɛ tsuŋwoohei srɔtoi lɛ amli lɛ, ni amɛhiɛ hu esɔ waa.

 

Ekrokomɛi Hu Nɛ

SANEKPAKPA NI JƐ NYƆŊMƆ ŊƆƆ!

Mɛɛ Gbɛ nɔ Wɔnáa Biblia mli Shishitoo Mlai Ahe Sɛɛ?

Yesu tsɔɔ nɔ hewɔ ni gbɛtsɔɔmɔ he hiaa wɔ kɛ Biblia mli shishitoo mlai enyɔ ni he hiaa titri.