Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Wɔmiitsake Gboklɛfoi Ashihilɛ Ekomekomei

Wɔmiitsake Gboklɛfoi Ashihilɛ Ekomekomei

Yɛ Spain lɛ, Yehowa Odasefoi yasaraa tsuŋwoohei 68, ni amɛkɛ gboklɛfoi aaafee 600 kaseɔ Biblia lɛ.

Yehowa Odasefoi ni yasaraa tsuŋwoohei lɛ ateŋ mɔ kome ji Miguel; dani Miguel batsɔ Yehowa Odasefonyo lɛ, eye afii 12 yɛ tsuŋwoohe akɛ gboklɛfonyo. Amrɔ nɛɛ, daa otsi lɛ eyasaraa tsuŋwoohe lɛ. Mɛni hewɔ? Bɔ ni afee ni enyɛ eye ebua mɛi krokomɛi hu koni amɛtsake amɛshihilɛ taakɛ ebalɛ yɛ egbɛfaŋ lɛ.

Afii kpaanyɔ mli nɛɛ, Miguel kɛ gboklɛfoi babaoo ekase Biblia lɛ. Ewie akɛ: “Miyɛ he miishɛɛ akɛ maye mabua gboklɛfoi ni yɔɔ he ni awo mi tsuŋ yɛ lɛ. Kɛ́ miyɔse bɔ ni amɛtsui shweɔ akɛ amɛbaashɛrɛ amɛtsutsu shihilɛi lɛ amɛfɔ̃ lɛ, mimii shɛɔ mihe waa.”

Miguel gbekɛbiiashi be ni eye afii 4 lɛ, draiva ko ni etɔ dãa kɛ lɔle tswa epapa ni egbo. Ehe bahia ni emami, ni etsɔ okulafo lɛ, atsu nii ŋmɛlɛtswai babaoo kɛkwɛ amɛweku lɛ tsiabo.

No hewɔ lɛ, Miguel kɛ enyɛmi nuu onukpa lɛ bɔi skul mli foo, ni amɛboteɔ mɛi ashĩai kɛ tsɔji amli amɛyajuɔ nibii. Be ni Miguel yeɔ afii 12 lɛ, ebatsɔ julɔ. Be ni eyeɔ afii 15 lɛ, ebaná shika pii yɛ kokein kɛ ehenɔi lɛ ni ehɔɔ lɛ hewɔ. Kɛ̃lɛ, akɛni kokein ni efũɔ kɛ amɛhenɔi bafee esu, ni amɛjara wala hu hewɔ lɛ, ebɔi juu fe tsutsu. Be ni eye afii 16 kɛyaa lɛ, awo lɛ tsuŋ shii abɔ, ni fiofio lɛ ebatsɔ julɔ kpanaku. Miguel kɛɛ akɛ: “Mibanu he akɛ kɛ́ migbooo yɛ tsuŋwoohe lɛ, no lɛ kokein kɛ ehenɔi lɛ baagbe mi. Mibatsɔ tamɔ adɔdɔŋ yɛ anaanu ŋtaŋ mli.”

Shi yɛ afi 1994 lɛ, Miguel nanemɛi lɛ ateŋ mɔ kome kɛɛ Yehowa Odasefonyo ko koni eŋma wolo eyahã Miguel yɛ tsuŋwoohe lɛ. Miguel baná ele yɛ nakai wolo lɛ mli akɛ, Nyɔŋmɔ eto eyiŋ akɛ ebaasaa ekɛ paradeiso aba shikpɔŋ nɛɛ nɔ ekoŋŋ. Odasefonyo lɛ wo Miguel hewalɛ yɛ wolo lɛ mli koni efee tsakemɔi yɛ eshihilɛ mli bɔ ni afee ni ená paradeiso lɛ mli gbɛfaŋnɔ. Miguel kɛɛ akɛ: “Ewiemɔi ta mitsuiŋ waa. Nakai gbi lɛ, nɔ fɛɛ nɔ batsake ehã mi, ni mikpɛ miyiŋ akɛ makase Biblia lɛ, shi mile akɛ mináŋ lɛ mlɛo kwraa.”

Miguel le akɛ enáŋ lɛ mlɛo ejaakɛ no beiaŋ lɛ kokein kɛ ehenɔi kɛ tawa shɛremɔ ebatsɔ esu kwraa. No mli lɛ, enáa eko be fɛɛ be ni esumɔɔ. Mɛi ni ekɛyɔɔ tsuŋwoohe lɛ hãa lɛ eko daa nɛɛ. Miguel sɔleɔ be fɛɛ be koni enyɛ ekpa tsofai nɛɛ kɛnitsumɔ, ni fiofio lɛ enyɛ ekpa kwraa.

Nyɔji etɛ sɛɛ lɛ, Miguel bɔi gboklɛfoi krokomɛi lɛ nibii ni ekase lɛ tsɔɔmɔ. Afi ni nyiɛ sɛɛ lɛ, ajie lɛ yɛ tsuŋwoohe lɛ, ni ehã abaptisi lɛ ni ebatsɔ Yehowa Odasefonyo. Ekpɛ mli akɛ ebaabote gbalashihilɛ mli, shi naagba ko bajie ehiɛ kpo. No ji, be ni eshwɛ nyɔɔŋ kome ni ebaakpee yoo lɛ, saneyelihe ko bua akɛ awo Miguel tsuŋ afii nyɔŋma yɛ nibii komɛi ni efee be ko ni eho lɛ ahewɔ. Kɛ̃lɛ, afii etɛ kɛ fã sɛɛ lɛ eye ehe yɛ bɔ ni eba eje jogbaŋŋ lɛ hewɔ. Ebakpee yoo lɛ agbɛnɛ. Miguel kɛ ehe woko juu kɛ fɔ̃ mli dɔŋŋ.

 

Ekrokromɛi Hu Nɛ

Mɛni Ji Nyɔŋmɔ Yiŋtoo Kɛha Shikpɔŋ Lɛ?

Biblia lɛ tsɔɔ nɔ hewɔ ni Nyɔŋmɔ bɔ shikpɔŋ lɛ, be ni nɔnaa baaba naagbee, kɛ nɔ ni baaba shikpɔŋ lɛ kɛ mɛi ni yɔɔ nɔ lɛ anɔ.