Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Vidioi yɛ Wiemɔi Ohai Amli

Vidioi yɛ Wiemɔi Ohai Amli

Ale Yehowa Odasefoi waa kɛ wiemɔi ashishitsɔɔmɔ. Be ni shɛɔ November 2014 lɛ, wɔtsɔɔ Biblia lɛ shishi kɛtee wiemɔi 125 mli, kɛ woji ni adamɔ Biblia lɛ nɔ akala lɛ hu kɛtee wiemɔi 742 amli. Vidioi hu fata wɔwiemɔ shishitsɔɔmɔ nitsumɔ lɛ he. Be ni shɛɔ January 2015 lɛ, wɔtsɔɔ vidio ni ji Mɛni Yaa Nɔ yɛ Maŋtsɛyeli Asa lɛ Nɔ? lɛ shishi kɛtee wiemɔi 398 amli, kɛ Mɛni Hewɔ Esa akɛ Okase Biblia Lɛ? hu kɛtee wiemɔi 569 amli. Mɛni hewɔ wɔfeɔ enɛ, ni mɛɛ gbɛ nɔ wɔtsɔɔ wɔfeɔ?

Yɛ March 2014 lɛ, Yehowa Odasefoi lɛ A-Gbɛtsɔɔmɔ Kuu lɛ kɛ gbɛtsɔɔmɔ hã nitsumɔhe niji ni yɔɔ je lɛŋ fɛɛ akɛ, amɛfee vidioi lɛ yɛ wiemɔi srɔtoi amli koni akɛwo Biblia mli nikasemɔ feemɔ he hewalɛ.

Vidioi ashishitsɔɔmɔ biɔ nitsumɔi srɔtoi. Klɛŋklɛŋ lɛ, esa akɛ wiemɔ shishitsɔɔlɔi lɛ atsɔɔ emli wiemɔi lɛ ashishi. No sɛɛ lɛ, ahalaa mɛi ni wieɔ nakai wiemɔ lɛ kɛhã mɛi srɔtoi ni wie yɛ vidio lɛ mli lɛ ateŋ mɔ fɛɛ mɔ. Agbɛnɛ lɛ, nyɛmimɛi ni kwɛɔ rikɔdiŋ nitsumɔ lɛ nɔ lɛ kwɛɔ ni arikɔdiɔ gbee, ni ji wiemɔi ni atsɔɔ shishi lɛ awoɔ vidio lɛ nɔ, amɛkɛ gbɛɛmɔi kɛ nibii krokomɛi lɛ woɔ mli, ni amɛkɛ niŋmai ni esa akɛ eje kpo yɛ vidio lɛ mli lɛ hu fata he. Naagbee lɛ, akɛ gbee ni arikɔdi, ni ji wiemɔi lɛ, kɛ niŋmai lɛ woɔ vidio lɛ nɔ, kɛkɛ lɛ nɔ fɛɛ nɔ eye emuu agbɛnɛ, no sɛɛ lɛ akɛwoɔ wɛbsait lɛ nɔ koni mɛi anyɛ aŋɔ eko.

Nitsumɔhe niji komɛi yɛ rikɔdiŋ studio, kɛ nyɛmimɛi hu ni atsɔse amɛ kɛhã nitsumɔ nɛɛ. Te afeɔ tɛŋŋ arikɔdiɔ wiemɔi ni awieɔ yɛ hei ni kɛ nitsumɔhe niji lɛ teŋ jekɛ lɛ, ni atsɔɔ shishi yɛ wiemɔi ashishitsɔɔmɔ ɔfis srɔtoi lɛ?

Yɛ je lɛŋ hei srɔtoi lɛ, asafo lɛ hãa nyɛmimɛi ni atsɔse amɛ kɛhã rikɔdiŋ lɛ kɛ mashiŋ pɛmpɛbii ní amɛkɛ gbɛfãa waaa yatsuɔ nii yɛ wiemɔi ashishitsɔɔmɔ ɔfis srɔtoi lɛ. Mɛi ni atsɔse amɛ kɛhã rikɔdiŋ lɛ kɛ maikrofoŋ kɛ laptop kɔmpiuta ní akɛ sɔftwɛɛ ni akɛfeɔ rikɔdiŋ ewo nɔ lɛ yaa ɔfis ko, Maŋtsɛyeli Asa ko nɔ, loo ko shĩa, ni amɛkɛ jɛmɛ tsuɔ nii be kukuoo akɛ rikɔdiŋ studio. Ahãa mɛi ni le wiemɔ lɛ jogbaŋŋ lɛ ekomɛi kaneɔ, amɛteaŋ mɛi komɛi hu kwɛɔ koni akane nɔ ni aŋma lɛ jogbaŋŋ ni ajie henumɔi hu ni yɔɔ mli lɛ akpo.

Kɛtsɔ gbɛ nɛɛ nɔ lɛ, wɔnyɛɔ wɔfeɔ vidioi lɛ babaoo yɛ wiemɔi srɔtoi amli fe tsutsu lɛ.

Mɛi ejie vidioi nɛɛ ayi waa diɛŋtsɛ. Yɛ mɛi babaoo agbɛfaŋ lɛ, wɔvidioi lɛ ji vidio klɛŋklɛŋ ni amɛkwɛ yɛ amɛmaŋ wiemɔ mli.

Wiemɔi ni arikɔdi lɛ ateŋ ekome ji Pitjantjatjara, ni mɛi 2,500 kɛ sɛɛ wieɔ yɛ Australia. Arikɔdi wiemɔ nɛɛ yɛ maŋ ni ji Alice Springs lɛ, yɛ Kooyigbɛ Kpokpai lɛ anɔ lɛ. Nyɛminuu ko ni atsɛɔ lɛ Callan Thomas ni ye ebua kɛrikɔdi vidio lɛ wie akɛ: “Mɛi nya vidioi lɛ ahe waa. “Kɛ́ maŋbii lɛ bɔi vidio lɛ kwɛmɛ, amɛkpaaa, amɛbiɔ akɛ nɛgbɛ amɛbaana vidioi nɛɛ ekrokomɛi yɛ. Ewa akɛ abaaná woji kɛ nibii yɛ wiemɔ nɛɛ mli. Kɛ́ amɛbo toi—ni titri lɛ kɛ́ amɛkwɛ vidio lɛ—amɛnaa kpɛɔ amɛhe.”

Gbi ko lɛ, Yehowa Odasefoi enyɔ ni yɔɔ Cameroon lɛ kɛ lɛlɛ miifã gbɛ. Amɛwa yɛ akrowa ko ni mɛi kpitibii ji mɛi titri ni yɔɔ jɛmɛ, amɛkɛ maŋtsɛ lɛ, ni eji tsɔɔlɔ yɛ akrowa lɛ skul ko lɛ yawie. Be ni amɛná amɛle akɛ maŋtsɛ lɛ wieɔ Bassa lɛ, nyɛmimɛi lɛ kɛ amɛtablɛt lɛ jie vidio ni ji Mɛni Hewɔ Esa akɛ Okase Biblia Lɛ? yɛ Bassa wiemɔ mli amɛtsɔɔ lɛ. Maŋtsɛ lɛ hiɛ sɔ waa, ni ebi koni ahã lɛ woji kɛ nibii lɛ eko.

Yɛ Indonesia akrowa ko lɛ, jamɔ hiɛnyiɛlɔ ko sumɔɔɔ Yehowa Odasefoi asane kwraa, no hewɔ lɛ eshã woji fɛɛ ni Odasefoi lɛ jara amɛhã mɛi yɛ nakai akutso lɛ mli lɛ. Akrowa lɛ mli bii lɛ ekomɛi ka akɛ amɛbaashã Maŋtsɛyeli Asa lɛ. Sɛɛ mli lɛ polisifoi ejwɛ komɛi tee oblayoo Odasefonyo ko shĩa, ni amɛyabibii lɛ kɛ eweku lɛ saji. No mli lɛ, amɛmiitao amɛle nɔ ni yaa nɔ yɛ Maŋtsɛyeli Asa lɛ nɔ, no hewɔ lɛ, yoo lɛ jie vidio ni ji Mɛni Yaa Nɔ yɛ Maŋtsɛyeli Asa lɛ Nɔ? lɛ yɛ Indonesia wiemɔ mli etsɔɔ amɛ.

Be ni amɛkwɛ vidio lɛ amɛgbe naa lɛ, polisifoi lɛ ateŋ mɔ kome wie akɛ: “Kpaako mina akɛ mɛi nuuu nyɛ shishi, ni amɛleee nyɛsane tsɔ.” Polisifonyo kroko bi akɛ: “Nyɛbaanyɛ nyɛkɛ vidio nɛɛ ahã mi koni majie matsɔɔ mɛi krokomɛi? Vidio nɛɛ hãa anaa mɛi diɛŋtsɛ ni nyɛ ji.” Amrɔ nɛɛ, polisifoi lɛ ená Odasefoi lɛ ahe jwɛŋmɔ ni ja ni no fee hebuu nɔ kɛhã nyɛmimɛi lɛ.

Kɛ́ okwɛko vidioi nɛɛ eko lɛ, mɛni hewɔ okwɛɛɛ eko yɛ bo diɛŋtsɛ owiemɔ mli?

Ekrokromɛi Hu Nɛ

Mɛni Ji Biblia Mli Nikasemɔ?

Kanemɔ koni ona wɔ-Biblia mli nikasemɔ ni wɔfeɔ ni wɔheee nɔ ko lɛ he sanebimɔi lɛ ahetoi.

Te Afeɔ Tɛŋŋ Aŋmalaa Yehowa Odasefoi Awoji lɛ ni Atsɔɔ Shishi Lɛ?

Wɔkalaa wɔwoji lɛ yɛ wiemɔi ni fa fe 600 amli. Mɛni hewɔ wɔgboɔ deŋme nɛɛ?