Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Amɛbiɔ ní Ahã Amɛ Nitsumɔ, Jeee Koni Awo Amɛ Nyɔmɔ

Amɛbiɔ ní Ahã Amɛ Nitsumɔ, Jeee Koni Awo Amɛ Nyɔmɔ

Nɔ ni fe afii 28 kɛ sɛɛ nɛɛ lɛ, Yehowa Odasefoi 11,000 kɛ sɛɛ eshi amɛshĩai kɛ amɛjakumaŋ po koni amɛyaye amɛbua kɛmamɔ tsũi yɛ maji 120 amli. Amɛ fɛɛ amɛkɛ nitsumɔ mli hesai kɛ hewalɛ ni amɛyɔɔ lɛ ewo bei fɛɛ sɔɔmɔ lɛ mli ni awooo amɛ nyɔmɔ.

Amɛteŋ mɛi babaoo woɔ amɛ diɛŋtsɛ amɛgbɛfãa he nyɔmɔ kɛyaa he ni nitsumɔ lɛ yɔɔ. Mɛi komɛi kɛ amɛ diɛŋtsɛ amɛnitsumɔ mli hejɔɔmɔ bei yatsuɔ. Mɛi komɛi hu biɔ gbɛ yɛ nitsumɔ mli kɛ́ amɛnyɔmɔwoo baaŋmɛɛ amɛ po.

Anyɛɛɛ amɛ nɔ ni amɛshã afɔlei nɛɛ, shi amɛ diɛŋtsɛ amɛjɛɔ amɛtsui mli amɛkɛ amɛhe hãa koni Maŋtsɛyeli lɛ he sane kpakpa lɛ ni ashiɛɔ yɛ je lɛŋ fɛɛ lɛ ashwere. (Mateo 24:14) Amɛmamɔɔ ɔfisii, wɔɔhei, kɛ nitsumɔhei ni akalaa Bibliai kɛ Biblia kasemɔ woji. Yehowa Odasefoi emamɔ Kpeei Asai ni woɔ mɛi aaashɛ 10,000 kɛ Maŋtsɛyeli Asai ni woɔ mɛi aaashɛ 300.

Aaatsu nitsumɔ nɛɛ lolo. Kɛ́ nitsulɔi lɛ shɛ nitsumɔhe lɛ, nitsumɔhe nine ni yɔɔ nakai maŋ lɛ nɔ lɛ toɔ amɛwɔɔhei, amɛniyenii, amɛtadei ahefɔmɔ kɛ nibii krokomɛi ni he baahia amɛ lɛ ahe gbɛjianɔ. Odasefoi ni yɔɔ maŋ lɛ nɔ lɛ hu kɛ amɛhe woɔ nitsumɔ ni yɔɔ miishɛɛ nɛɛ mli.

Yɛ afi 1985 lɛ, ato gbɛjianɔ ko koni akɛkwɛ nitsumɔ kpele nɛɛ nɔ jogbaŋŋ yɛ jeŋ fɛɛ. Esa akɛ mɛi ni sumɔɔ ni amɛkɛ amɛhe ahã kɛhã nitsumɔ nɛɛ afee Yehowa Odasefoi ni eye kɛjɛ afii 19 kɛyashi afii 55 ni yɔɔ tsumaa mli hesaa ko. Bei babaoo lɛ, abaanyɛ ahã mɔ ko abatsu nii otsii enyɔ kɛmiimɔ nyɔji etɛ, kɛ̃lɛ bei komɛi lɛ, abaanyɛ ahã mɔ ko kɛ afi kome loo nɔ ni fe nakai atsu.

Atsɔɔ nitsulɔi nɛɛ aŋamɛi lɛ bɔ ni afimɔɔ dadei, bɔ ni atswaa tais, loo ashãa gbogboi ahe ni apɛnteɔ ahãa. Mɛi komɛi hu yeɔ amɛbuaa kɛhã nihoomɔ kɛ tsui lɛ amli saamɔ.

Kɛ́ nitsulɔi nɛɛ gbe amɛnitsumɔ naa ni amɛshi kɛtee amɛshiai lɛ, amɛteŋ mɛi komɛi ŋmaa wolo kɛtsɔɔ miishɛɛ ni amɛná akɛ ahã amɛhegbɛ nɛɛ. Gbalashihilɛ mli hefatalɔi komɛi ŋma akɛ: “Wɔmiida nyɛ shi kɛhã hegbɛ ni wɔná akɛ wɔbatsu nii yɛ nitsumɔhe nine ni yɔɔ Budapest lɛ. Odasefoi ni yɔɔ Hungary lɛ jieɔ suɔmɔ kɛ hiɛsɔɔ kpo waa! Be ni wɔkɛ amɛ ehi shi nyɔɔŋ kome sɛɛ lɛ, ebawa akɛ wɔkɛ amɛbaaye shɛɛ. Shi bɔ fɛɛ bɔ ni fee lɛ, esa akɛ wɔshi, aloo jeee nakai? Wɔgbɛkpamɔ ji, wɔbaaku wɔsɛɛ ekoŋŋ. Be fɛɛ be ni abaahã wɔ nitsumɔ lɛ, nakai nyɔɔŋ lɛ bafeɔ nyɔɔŋ ko ni nɔ bɛ kɛhã wɔ.”