Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Yehowa Odasefoi

Ga

Ato Gilead Skul lɛ Shishi Afii Nyɔŋmai Kpawo Nɛ

Ato Gilead Skul lɛ Shishi Afii Nyɔŋmai Kpawo Nɛ

Yɛ February 1, Afi 1943 lɛ, aje skul krɛdɛɛ ko shishi yɛ New York kooyigbɛ. Skul nɛɛ, ni amrɔ nɛɛ atsɛɔ lɛ Buu-Mɔɔ Gilead Biblia Skul lɛ, kɛ tsɔsemɔ krɛdɛɛ ko ehã hii kɛ yei 8,000 kɛ sɛɛ ni jɛ je lɛŋ hei srɔtoi. Yonatan, ní gbe Gilead skul lɛ naa nyɛsɛɛ nɛɛ lɛ kɛɛ akɛ: “Tsɔsemɔ ni ajɛ Nyɔŋmɔ Wiemɔ lɛ mli akɛhã wɔ lɛ baaye abua wɔ koni wɔnyɛ wɔsɔmɔ jogbaŋŋ yɛ he fɛɛ he ni abaatsu wɔ, kɛ shihilɛ fɛɛ shihilɛ mli.” Ehefatalɔ, Marnie hu kɛshi sɛɛ akɛ: “Oti ni ma mihiɛ ji akɛ maye mabua mɛi fɛɛ koni amɛbale akɛ, shihilɛ gbɛ ko bɛ ni hi fe nɔ ni wɔ-Bɔlɔ lɛ eto ehã wɔ lɛ, ni oti nɛɛ mli ewa kwraa fe tsutsu lɛ. Miyɛ nɔmimaa diɛŋtsɛ akɛ, kɛ́ miye mibua mɛi ni amɛbale Yehowa lɛ, amɛshihilɛ baahi kwraa fe tsutsu lɛ.”

Ŋwɛigbɛ: Gilead Skul lɛ hiɛgbɛ, South Lansing, yɛ New York. Shishigbɛ: Gilead Skul lɛ tsɔɔlɔ ko miitsɔɔ klas ni ji 31 nɔ lɛ nii

Gilead skul lɛ kɛ nyɔji enumɔ tsɔseɔ skulbii lɛ, ni ahãaa amɛwo tsɔsemɔ lɛ he nyɔmɔ. Nibii titri ni nikasemɔ lɛ gbalaa jwɛŋmɔ kɛyaa nɔ ji Biblia lɛ, kɛ bɔ ni shiɛmɔ nitsumɔ lɛ he hiaa hã. Afee skul nɛɛ kɛyiŋtoo akɛ, mɛi ni baagbe naa lɛ anyɛ awaje Nyɔŋmɔ tsuji lɛ, koni amɛtswa amɛ amɛma shi hu. Kɛfata he koni eye ebua skulbii lɛ ní amɛnyɛ amɛwo mumɔ lɛ yibii ni baahã amɛnyɛ amɛdamɔ naagbai ni amɛkɛbaakpe lɛ anaa. Yɛ skul lɛ mli lɛ, nikaselɔi lɛ kɛ ŋmlɛtswai babaoo susuɔ Biblia mli shishitoo mlai ni baawaje wekukpaa ni kã amɛ kɛ Yehowa, amɛ-Nyɔŋmɔ, lɛ teŋ lɛ ahe.

Ŋwɛigbɛ: Afi 1958, Albert Schroeder kɛ kpeebuu lɛ henɔ ko ni afee lɛ miitsɔɔ skulbii lɛ nii. Shishigbɛ: 1968, Ulysses Glass miitsɔɔ Gilead Skul lɛ klas ni ji 46 nɔ lɛ nii

Gbalashihilɛ mli hefatalɔi fɛɛ ni yaa Gilead skul lɛ ji mɛi ni kɛ amɛbei fɛɛ shiɛɔ sane kpakpa lɛ momo. Kɛ́ amɛgbe skul lɛ naa lɛ, anyɛɔ ahãa amɛkuɔ amɛsɛɛ kɛyaa he ni amɛjɛ amɛba skul lɛ, bei komɛi hu lɛ, ahãa amɛyasɔmɔɔ yɛ maŋ kroko nɔ. Ahãa mɛi komɛi yatsuɔ nii yɛ Yehowa Odasefoi anitsumɔhe niji ni fa fe 90 lɛ eko mli. Ahãa mɛi komɛi hu yasɔmɔɔ yɛ maji amli hei ni mɛi fa yɛ koni amɛná mɛi babaoo amɛshiɛ amɛhã.

Klɛŋklɛŋ he ni afee Gilead Skul lɛ yɛ ji Kingdom Farm, ni yɔɔ South Lansing, yɛ New York lɛ. Yɛ afi 1961 lɛ, ajie skul lɛ kɛtee Yehowa Odasefoi anitsumɔhe yitso ni yɔɔ Brooklyn, yɛ New York lɛ. Kɛjɛ afi 1988 kɛbashi afi 1995 lɛ, afee skul nɛɛ yɛ Watchtower Farms, ni yɔɔ Wallkill, yɛ New York lɛ. Kɛkɛ ni yɛ afi 1995 lɛ, ajie skul lɛ kɛtee he ni eyɔɔ amrɔ nɛɛ, ni ji Watchtower Educational Center, ni yɔɔ Patterson, yɛ New York lɛ. Klas ni ji 134 nɔ lɛ gbe skul lɛ naa yɛ March 2013.

Ŋwɛigbɛ: 2003, Gilead klas ni ji 116 nɔ lɛ mli nikaselɔi. Shishigbɛ: Afi 2011, Gilead skulbii miikase nii yɛ Gilead wojiatoohe lɛ

Afii 70 sɔŋŋ nɛ ni ato Buu-Mɔɔ Gilead Biblia Skul lɛ shishi, ni mɛi ni egbe skul nɛɛ naa lɛ efee nɔkwɛmɔnɔ ni sa kadimɔ waa yɛ Yehowa he odaseyeli mli.